៩ ខែ​ ឆ្នាំ ២០២២ គម្រោងជាង ៣ ពាន់ទទួល​ការ​អនុញ្ញាត​ឱ្យ​សាងសង់

មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់មានប្រសាសន៍ថា នៅក្នុងរយៈពេល ៩ ខែឆ្នាំ​២០២២​នេះ គម្រោង​សាងសង់នៅទូទាំងប្រទេសមាន​ជាង ៣ ពាន់គម្រោង ទុនវិនិយោគប្រមាណជិត​ ២ ពាន់លានដុល្លារអាមេរិកដែលបានចូលរួមលើកស្ទួយដល់សរដ្ឋកិច្ចកាន់តែប្រសើរថែមទៀត។

ថ្លែងក្នុងពិធីសម្ពោធបើកការតាំងពិព័រណ៌វិស័យផ្គត់ផ្គង់ម្ហូបអាហារ សណ្ឋាគារ និងសំណង់ខ្នាតអន្តរជាតិ ​(CAMFOOD/​CAMHOTEL​ and CAMBUILD 2022) នៅព្រឹកថ្ងៃទី ១៦ វិច្ឆិកា នៅ “សហសាលពិព័រណ៍កោះពេជ្រ” លោក​លាង មុនីរិទ្ធិ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់មានប្រសាសន៍ថា រយៈពេល៩ខែឆ្នាំនេះ ក្រសួងបានអនុញ្ញាតសាងសង់នៅទូទាំងប្រទេសចំនួន ៣១៧៦ គម្រោងមានទុនវិនិយោគចំនួន​១៩៦៣ លានដុល្លារអាមេរិក ក្នុងនោះមានគម្រោងបណ្តុំលំនៅដ្ឋានជាលក្ខណៈបុរី​ចំនួន ២០ គម្រោង​ គម្រោងអគារខ្ពស់ៗចាប់ពី ៥ ជាន់​ឡើង​ទៅមានចំនួន ៩៨ គម្រោងស្មើនឹង១០០អគារ ក្នុងនោះមាននៅរាជធានីភ្នំពេញចំនួន ៦៣ គម្រោង ខេត្តព្រះសីហនុ​ ១១ គម្រោង ខេត្តបន្ទាយមានជ័យ១២គម្រោង និង​បណ្តាខេត្តផ្សេងៗទៀត១២គម្រោង។

កំណើននៃគម្រោងសាងសង់នេះ នាំឲ្យមានតម្រូវការលើសម្ភារៈសំណង់បរិក្ខារសំណង់ និងផលិតផលសំណង់និងបច្ចេកវិទ្យាសំណង់ ចាំបាច់មានស្តង់ដារត្រឹមត្រូវអនុឡោមតាមបទប្បញ្ញត្តិបច្ចេកទេសសំណង់ ដើម្បីធានាគុណភាពសំណង់និងសុវត្ថិភាពរបស់អ្នកប្រើប្រាស់សំណង់ រួមទាំងគាំទ្រដល់ការអភិវឌ្ឍធ្វើឲ្យទីក្រុងមានភាពរស់រវើកមានការតភ្ជាប់ និងមានសុវត្ថិភាពប្រកបដោយនិរន្តរភាពនិង​បរិស្ថាននៃការរស់នៅកាន់តែល្អប្រសើរ។

លោក MR.DARREN SIOW អ្នកគ្រប់គ្រងនិងរៀបចំកម្មវិធីបានថ្លែងថា ការត្រលប់មកវិញនៃព្រឹត្តិការណ៍ក្នុងឆ្នាំនេះ គឺជាសញ្ញាដ៏រឹងមាំមួយនៃការងើបឡើងវិញនៃសេដ្ឋកិច្ចជាតិនៅក្នុងប្រទេសកម្ពុជា បន្ទាប់ពីវិបត្តិកូវីដ១៩ រយះពេល២ឆ្នាំ។

ពិព័រណ៏ CAMFOOD/CAMHOTEL’22 និង CAMBUILD’22 ត្រូវបាន​ទទួលស្គាល់ពិព័រណ៏អន្តរជាតិដ៏ធំបំផុតនៅក្នុងប្រទេសកម្ពុជា សម្រាប់វិស័យឧស្សាហកម្ម ម្ហូបអាហារ សណ្ធាគារ បដិសណ្ធារកិច្ច និង ឧស្សាហកម្មសំណង់ ដែល​ទទួលបានការគាំទ្រពីសំណាក់ក្រុមហ៊ុនផ្គត់ផ្គង់ទាំងជាតិ និងអន្តរជាតិសរុបជាង ២៥០ ដាក់តាំងបង្ហាញផលិតផលនិងសេវាកម្មពាក់ព័ន្ធ។

ពិព័រណ៍​ឆ្នាំនេះរំពឹងនឹងទាក់ទាញអ្នកទស្សនាជាង ១០០០០នាក់ ក្នុងរយៈពេល ៣ ថ្ងៃ ចាប់ពីថ្ងៃទី ១៦ ដល់ថ្ងៃ​ទី​១៨ ខែវិច្ឆិកាឆ្នាំ ២០២២។

លោក ថោង ខុន រដ្ឋមន្ត្រីក្រសួងទេសចរណ៍បានកោតសរសើរ និងវាយតម្លៃខ្ពស់ក្នុង​ការ​រៀបចំ​ឱ្យមានកម្មវិធី ពិព័រណ៍វិស័យផ្គត់ផ្គង់ម្ហូបអាហារ សណ្ឋាគារ និងសំណង់ ខ្នាតអន្តរជាតិនេះ បន្ទាប់ពីបានខកខានជាង ០២ឆ្នាំ ដោយសារតែវិបត្តិនៃជំងឺកូវីដ-១៩។ លោករដ្ឋមន្ត្រី រំពឹងនិង​ជឿជាក់ថា នៅ​ឆ្នាំក្រោយៗព្រឹត្តិការណ៍របៀបនេះ​នឹង​រៀបចំ​កាន់តែច្រើនដង កាន់តែធំជាងនេះ និងកាន់តែសំបូរបែបបន្ថែមទៀត៕

អត្ថបទ៖ សំអឿន