អាជ្ញាធរខេត្តកំពង់ឆ្នាំង ស្នើឱ្យម្ចាស់ផ្ទះសំណាក់ និងសណ្ឋាគារកុំដំឡើងថ្លៃសេវាពេលប្រឡងបាក់ឌុប

លោក ស្រ៊ន សំឫទ្ធី អភិបាលរងខេត្តកំពង់ឆ្នាំង បានស្នើឱ្យអាជ្ញាធរជួយអន្តរាគមន៍ម្ចាស់ផ្ទះសំណាក់ និងសណ្ឋាគារ
កុំឱ្យតំឡើងថ្លៃសេវាពេលប្រឡងបាក់ឌុប ដើម្បីជួយសម្រួលដល់ការចំណាយរបស់អាណាព្យាបាល និងប្អូនៗបេក្ខជនប្រឡងមកពីបណ្ដាស្រុកផ្សេងៗ។

ការស្នើនេះបានធ្វើឡើងកាលពីថ្ងៃទី២៥ ខែវិច្ឆិកា ក្នុងឱកាសដែលលោកបានអញ្ជើញចូលរួមប្រជុំពិភាក្សា ដើម្បីរៀបចំយន្តការសម្របសម្រួលការប្រឡងសញ្ញាបត្រមធ្យមសិក្សាទុតិយភូមិនៅកំពង់ឆ្នាំង។

លោក ស្រ៊ន សំឫទ្ធី ក៏បានស្នើឱ្យគណៈបញ្ជាការឯកភាពរដ្ឋបាលក្រុងកំពង់ឆ្នាំង និងគណៈបញ្ចាការឯកភាពរដ្ឋបាលស្រុករលាប្អៀរ ត្រៀមដាក់ផែនការកងកម្លាំងក្នុងការសម្របសម្រួល និងថែរក្សាសណ្ដាប់ធ្នាប់ សន្ដិសុខសុវត្ថិភាពនៅទីតាំងមណ្ឌលប្រឡងក្នុងដែនសម្ថកិច្ចរបស់ខ្លួន។ លោកបានមានប្រសាសន៍ថា ជាងនេះទៅទៀតដើម្បីជួយសម្រួលដល់ការចំណាយរបស់អាណាព្យាបាល និងប្អូនៗបេក្ខជនប្រឡងមកពីបណ្ដាស្រុកផ្សេងៗ រដ្ឋបាលក្រុង ស្រុកទាំងពីរសូមជួយអន្តរាគមន៍ម្ចាស់ផ្ទះសំណាក់ និងសណ្ឋាគារកុំឱ្យតំឡើងថ្លៃសេវា។

លោកបានបន្ថែមថា សម្រាប់ការប្រឡងបាក់ឌុបនៅឆ្នាំនេះ ខេត្តកំពង់ឆ្នាំង មាន៨មណ្ឌលប្រឡង និងមានបេក្ខជនប្រឡងសរុប៤៣៦០ នាក់ ក្នុងនោះថ្នាក់វិទ្យាសាស្ត្រ មានចំនួន ១០៦១នាក់ និងវិទ្យាសាស្ត្រសង្គម មានចំនួន៣២៩៩នាក់។
លោក ស សុខា រដ្ឋលេខាធិការក្រសួងអប់រំ យុវជន និងកីឡាបានជម្រុញឱ្យរដ្ឋបាលរាជធានី ខេត្ត និងអង្គភាពពាក់ព័ន្ធទាំងអស់អនុវត្តឱ្យបានម៉ឺងម៉ាត់តាមសេចក្ដីណែនាំ បទបញ្ញត្តិ បទបញ្ជា និងវិធានការនានារបស់រាជរដ្ឋាភិបាលកម្ពុជា
ដើម្បីធានាដល់ដំណើរការប្រឡងសញ្ញាបត្រមធ្យមសិក្សាទុតិយភូមិប្រព្រឹត្តទៅយ៉ាងរលូន និងទទួលបានជោគជ័យតាមការគ្រោងទុក។

គួរបញ្ជាក់ថា នៅក្នុងសម័យប្រឡងមធ្យមសិក្សាទុតិយភូមិ ៥ ធ្នូ ២០២២នេះ មានបេក្ខជនប្រឡងទូទាំងប្រទេសសរុប ១២៨.១៣៤នាក់ ស្រី៦៩.៧៧១នាក់ មានមណ្ឌលសំណេរ សរុប២២១ បន្ទប់ប្រឡងសរុប ៥១៧៤ក្នុងនោះមានថ្នាក់វិទ្យាសាស្ត្រ ៧៦មណ្ឌល ត្រូវជា១៧៤៣បន្ទប់ថ្នាក់វិទ្យាសាស្ត្រសង្គម ១៥៤មណ្ឌល ត្រូវជា៣៤៣១បន្ទប់៕

អត្ថបទ៖ សំអឿន