គណៈកម្មការជាតិរៀបចំការបោះឆ្នោត នឹងបិទប្រកាសបញ្ជីចុះបោះឆ្នោតផ្លូវការនៅថ្ងៃទី២១ ខែកុម្ភៈ ឆ្នាំ២០២៣ខាងមុននេះ

គណៈកម្មការជាតិរៀបចំការបោះឆ្នោត នឹងបិទផ្សារបញ្ជីឈ្មោះដំបូងនៅថ្ងៃទី១៣ ខែមករា ឆ្នាំ២០២៣ ហើយនឹងបិទប្រកាសផ្សាយបញ្ជីចុះបោះឆ្នោតផ្លូវការនៅថ្ងៃទី២១ ខែកុម្ភៈ ឆ្នាំ២០២៣ខាងមុននេះ។

នៅថ្ងៃទី១៩ ខែធ្នូ ឆ្នាំ២០២៣ លេខាធិការដ្ឋានរៀបចំការបោះឆ្នោតខេត្តកំពង់ធំ រៀបចំកិច្ចប្រជុំបូកសរុបលទ្ធផលបណ្ដោះអាសន្ននៃការបញ្ចប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២។ ក្នុងឱកាសនោះដែរ លោក ជា ពុំ ប្រធានលេខាធិការដ្ឋានគណៈកម្មការជាតិរៀបចំការបោះឆ្នោត ខេត្តកំពង់ធំ លើកឡើងថា ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ មានរយៈពេល៥០ថ្ងៃ គឺចាប់ពីថ្ងៃទី២០ ខែតុលា រហូតដល់ថ្ងៃទី០៨ ខែធ្នូ ឆ្នាំ២០២២ ដោយចាប់ផ្ដើមធ្វើនៅសាលាឃុំសង្កាត់ បន្ទាប់មកចល័តទៅតាមភូមិតាមប្រតិទិនឃុំសង្កាត់ជាក់ស្ដែង និងមកបញ្ចប់វិញនៅសាលាឃុំសង្កាត់ដោយរលួន។ លោកបន្តថា អ្នកមកពិនិត្យឈ្មោះ និងចុះបោះឆ្នោតអាយុ១៨ឆ្នាំ ឡើងចំនួនជាង ៥០៧.០០០ នាក់ បញ្ជីប៉ាន់ស្មានឆ្នាំ២០២១មានចំនួនជិត ៤៣២.០០០ នាក់ ។ បញ្ជីឈ្មោះបោះឆ្នោតដំបូង បញ្ជីឈ្មោះអ្នកបោះឆ្នោត និងត្រូវលុបចេញពីបញ្ជីបោះឆ្នោតឃុំសង្កាត់ នឹងធ្វើការបិទផ្សាយនៅតាមឃុំសង្កាត់នាថ្ងៃទី១៣ ខែមករា ឆ្នាំ២០២៣ ក្នុងអំឡុងពេលនេះប្រជាពលរដ្ឋទាំងអស់មានសិទ្ធិស្នើរកែតម្រូវក្នុងករណីមានកំហុសខុសឆ្គងរយៈពេល១០ថ្ងៃ បន្ទាប់ពីបិទផ្សាយ។ បន្ទាប់ពីការកែតម្រូវរួច គណៈកម្មាធិការរៀបចំការបោះឆ្នោត នឹងប្រកាសផ្សាយបញ្ជីបោះឆ្នោតផ្លូវការនាថ្ងៃទី២១ ខែកុម្ភៈ ឆ្នាំ២០២៣ខាងមុខ។

ក្នុងកិច្ចប្រជុំនេះដែរ លោក សុក ហៃ អភិបាលរងខេត្តកំពង់ធំ បញ្ជាក់ដែរថា ការបិទបញ្ជីបោះឆ្នោតដំបូង មានសារ​សំខាន់​ណាស់សម្រាប់ប្រជាពលរដ្ឋគ្រប់រូបដែលនឹងត្រូវចូលរួមបោះឆ្នោត ដូច្នេះអាជ្ញាធរពាក់ព័ន្ធទាំងអស់ត្រូវជំរុញឲ្យប្រជាពលរដ្ឋធ្វើការផ្ទៀងផ្ទាត់ពិនិត្យឱ្យបានល្អិតល្អន់។ ក្នុងករណីមានកំហុសត្រូវធ្វើការសហការកែតម្រូវឲ្យបានទាន់ពេលវេលា ហើយគ្រប់ភាគីពាក់ព័ន្ធទាំងអស់ត្រូវ ចូលរួមផ្សព្វផ្សាយដល់បងប្អូនប្រជាពលរដ្ឋឲ្យទៅពិនិត្យបញ្ជីឈ្មោះ និងចុះឈ្មោះបោះឆ្នោតឲ្យបានគ្រប់ៗគ្នាពិសេសអាជ្ញាធរក្រុង ស្រុក ត្រូវធ្វើយ៉ាងណាជំរុញដល់អាជ្ញាធរឃុំសង្កាត់ធ្វើការសហការ​ និងសម្របសម្រួលការងារដល់តំណាងគណៈបក្សនយោបាយដើម្បីចៀសវាងមានការរិះគន់នៅសកម្មភាពអសកម្មមួយចំនួនដែលកើតឡើងពីមន្ត្រីមូលដ្ឋាន។ ទន្ទឹមនេះក៏ត្រូវរក្សាឲ្យបាននៅការការពារ សន្តិសុខសណ្ដាប់ធ្នាប់ជូនដល់បងប្អូនប្រជាពលរដ្ឋដោយរក្សាឲ្យបាននូវសុខសុវត្ថិភាពផងដែរ៕

អត្ថបទ៖ ឈាង មករា