លោកជំទាវ ម៉ែន សំអន ៖ សម្ដេចតេជោ និងសម្តេចកិត្តិព្រឹទ្ធបណ្ឌិត តែងតែយកចិត្តទុកដាក់ចំពោះសុខទុក្ខពលរដ្ឋគ្រប់រូប

លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងថា ជានិច្ចកាលសម្ដេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែ យកចិត្តទុកដាក់គិតគូរខ្ពស់បំផុត ចំពោះសុខទុក្ខរបស់ប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។

លោកជំទាវ ម៉ែន សំអន ថ្លែងបែបនេះ ខណៈជួបសំណេះសំណាលជាមួយប្រជាពលរដ្ឋទីទាល់ក្រចំនួន ៣០០គ្រួសារ ស្ថិតនៅក្នុងភូមិតាពៅ សង្កាត់បាវិត ក្រុងបាវិត ខេត្តស្វាយរៀង កាលពីរសៀលថ្ងៃទី ៣០ ខែមករា ឆ្នាំ ២០២៣។

នៅក្នុងឱកាសនោះ លោកជំទាវ ម៉ែន សំអន បាននាំយកនូវការផ្ដាំផ្ញើសួរសុខទុក្ខពីសម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលសម្ដេចទាំងទ្វេរ តែងតែយកចិត្តទុកដាក់គិតគូរខ្ពស់បំផុត ចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរជំនឿសាសនា ឬនិន្នាការនយោបាយណាមួយឡើយ ហើយទោះដល់ទីជនបទដាច់ស្រយ៉ាលបែបណាក្តី។

លោកជំទាវ ក៏បាននាំយកអំណោយរបស់លោកស្រី ឆឹង ណេង ចែកជូនប្រជាពលរដ្ឋចំនួន ៣០០គ្រួសារ ដោយក្នុងមួយគ្រួសារទទួលបាន ភួយ ១ អង្ករ ២០គីឡូក្រាម និងថវិកា ២ម៉ឺនរៀល ផងដែរ៕

អត្ថបទ៖ វិមាន