ព្រឹត្តិការណ៍ប្រកួតស្នាដៃគំនូរកុមារ អបអរកម្ពុជា ជាម្ចាស់ផ្ទះ ស៊ីហ្គេម និងអាស៊ានប៉ារ៉ាហ្គេម ២០២៣

ក្រសួងអប់រំ យុវជន និងកីឡា សហការជាមួយសហភាពសហព័ន្ធយុវជនកម្ពុជាបានរៀបចំព្រឹត្តិការណ៍ប្រកួតស្នាដៃគំនូរកុមារគាំទ្រយុទ្ធនាការ‍ “Beyond the Games” ក្រោមប្រធានបទ “បេះដូងលោតក្នុងចង្វាក់តែមួយ” ដើម្បីអបអរ កម្ពុជា ធ្វើជាម្ចាស់ផ្ទះរៀបចំ ស៊ីហ្គេមលើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣។

ពិធីនេះបានប្រព្រឹត្តទៅក្រោមអធិបតីភាព លោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា ដោយមានការចូលរួមពីគណៈគ្រប់គ្រង លោកគ្រូ អ្នកគ្រូ និងសិស្សានុសិស្សជ័យលាភីជាច្រើន នៅថ្ងៃទី៧ ខែកុម្ភៈ ឆ្នាំ២០២៣នេះ។

លោកស្រី គឹម សេដ្ឋានី មានប្រសាសន៍ថា “Beyond the Games” ជាឈ្មោះយុទ្ធនាការដែលនឹងផ្សារភ្ជាប់ជាមួយមហាជនទូទៅតាមរយៈមនោសញ្ចេតនា និងមោទនភាពទៅនឹងភាពជាម្ចាស់ផ្ទះ នៃព្រះរាជាណាចក្រកម្ពុជាសម្រាប់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣។

លើសពីការប្រកួតកីឡា ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ពិតជាព្រឹត្តិការណ៍ប្រវត្តិសាស្រ្ត នៃព្រះរាជាណាចក្រកម្ពុជាដែលជាមុខមាត់ និងកេរិ៍្តឈ្មោះជាកម្លាំងថាមពល ដែលត្រូវបង្ហាញពិភពលោកឱ្យស្គាល់ និងយល់ដឹងពីវប្បធម៌ អរិយធម៌ ទេសចរណ៍ សេដ្ឋកិច្ច សង្គមខ្មែរ ដ៏រុងរឿងថែមទៀត៕

លោកស្រីបានបន្ថែមថា ព្រឹត្តិការណ៍ប្រកួតស្នាដៃគំនូរកុមារ ដែលបានរៀបចំឡើងក្រោមប្រធានបទ “បេះដូងលោតក្នុងចង្វាក់តែមួយ” បានបង្ហាញថា ទោះបីមនុស្សម្នាក់ៗមានទស្សនៈ និងការយល់ឃើញ គំនិត ឬការពិចារណាផ្សេងៗគ្នាក៏ដោយ ប៉ុន្តែចំនុចរួមមួយនៃភាពខុសគ្នាទាំងនោះគឺ ក្តីស្រឡាញ់ចំពោះជាតិមាតុភូមិ។

គួរបញ្ជាក់ថា ព្រឹត្តិការណ៍ប្រកួតស្នាដៃគំនូរកុមារនេះ មានការចូលរួមពីសិស្សានុសិស្សដែលកំពុងសិក្សានៅគ្រឹះស្ថានសិក្សាសាធារណៈ និងឯកជននៅកម្រិតបឋមសិក្សាពីថ្នាក់ទី១ ដល់ទី៦ នៅទូទាំងព្រះរាជាណាចក្រកម្ពុជា ដែលមានផ្ទាំងគំនូរសរុបចំនួន ១៥០៧ផ្ទាំង មកពីគ្រឹះស្ថានសិក្សាចំនួន ១២៦៥ ដែលបានជ្រើសរើសចេញពីស្នាដៃកុមារចំនួន ៨០០០ផ្ទាំង ដើម្បីបង្ហាញជាសាធារណៈ៕