កម្ពុជាចូលរួមសន្និសីទក្រុមប្រឹក្សារដ្ឋមន្ត្រីអប់រំអាស៊ីអាគ្នេហ៍លើកទី ៥២ នៅហ្វីលីពីន

ប្រតិភូក្រសួងអប់រំ យុវជន និងកីឡា នៃព្រះរាជាណាចក្រកម្ពុជា ដឹកនាំដោយ លោក ពិត ចំណាន រដ្ឋលេខាធិការប្រចាំការ ក្រសួងអប់រំ យុវជន និងកីឡា តំណាង បណ្ឌិតសភាចារ្យរដ្ឋមន្ត្រីក្រសួងអប់រំ យុវជន និងកីឡា បានអញ្ជើញចូលរួមក្នុងសន្និសីទក្រុមប្រឹក្សារដ្ឋមន្ត្រីអប់រំអាស៊ីអាគ្នេយ៍លើកទី ៥២ នៅទីក្រុងម៉ានីឡា ប្រទេសហ្វីលីពីន។

នាព្រឹកថ្ងៃទី៨ ខែកុម្ភៈ ឆ្នាំ២០២៣នេះ ប្រតិភូកម្ពុជាបានចូលរួមក្នុងកិច្ចប្រជុំចង្អៀត ដែលមានការចូលរួមពីពីសំណាក់រដ្ឋមន្ត្រី ឧត្តមមន្ត្រី និងមន្ត្រីអមនៃប្រទេសជាសមាជិកស៊ីមេអូ ទាំង១១ប្រទេស។ កិច្ចប្រជុំនេះ ផ្ដោតលើការពិនិត្យ និងពិភាក្សាលើឯកសារគោលចំនួន ១២។ ជាលទ្ធផល ក្រុមប្រឹក្សាបានអនុម័តលើឯកសារគោលទាំង១២។

គួរបញ្ជាក់ថា សន្និសីទក្រុមប្រឹក្សារដ្ឋមន្ត្រីអប់រំអាស៊ីអាគ្នេហ៍លើកទី ៥២នេះ ប្រព្រឹត្តទៅរយៈពេលបីថ្ងៃ ចាប់ពីថ្ងៃទី៨ ដល់ថ្ងៃទី១០ ខែកុម្ភៈ ឆ្នាំ២០២៣៕