ព័ត៌មានជាតិ

សិស្សចប់ថ្នាក់ទី១២ ក្នុងខេត្តកំពង់ធំ ស្ទើរទាំងអស់បានបន្តការសិក្សានៅឧត្តមសិក្សា

បានផុស

២ years មុន

នៅ

ថ្ងៃអង្គារ ១៤ កុម្ភៈ ២០២៣

ដោយ

លោក តាន់ ប៊ុនហុង ប្រធានមន្ទីរអប់រំ យុវជន និងកីឡា ខេត្តកំពង់ធំមានប្រសាសន៍ថា សិស្សានុសិស្សនៅក្នុងខេត្តកំពង់ធំ ដែលបានបញ្ចប់ការសិក្សាមធ្យមសិក្សាទុតិយភូមិ បានទៅបន្តការសិក្សានៅថ្នាក់ឧត្ដមសិក្សាឬសិក្សាជំនាញបណ្តុះបណ្តាលវិជ្ជាជីវៈផ្សេងៗទៀតមិនថាជាស្ថាប័នរដ្ឋ និងឯកជន។ លោកបានអះអាងបែបនេះ ក្នុងសន្និសីទសារព័ត៌មានស្តីពី «ភាពជោគជ័យរយៈពេល ៥ ឆ្នាំកន្លងមករបស់រដ្ឋបាលខេត្តកំពង់ធំ» នាព្រឹកមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក តាន់ ប៊ុនហុង បានឱ្យដឹងថា អត្រាសិស្សក្នុងខេត្តដែលបញ្ចប់ការសិក្សាមធ្យមសិក្សាទុតិយភូមិស្ថិតនៅចន្លោះ ៣០-៤០ ភាគរយ។ ដោយសារតែមានការរីកចម្រើនខាងវិស័យអប់រំ ផ្នែកឧត្ដមសិក្សាទាំងសាធារណៈនិងឯកជន និងសាលាបណ្ដុះបណ្ដាលវិជ្ជាជីវៈនៅក្នុងប្រទេសជាច្រើននោះ ដូច្នេះសិស្សដែលបានបញ្ចប់ការសិក្សាថ្នាក់ទី១២ ក្នុងខេត្តកំពង់ធំស្ទើរតែទាំងអស់បានទៅបន្តការសិក្សាថ្នាក់ឧត្ដមសិក្សា តាមគ្រឹះស្ថានសិក្សានានាទាំងរដ្ឋ និងឯកជន ព្រមទាំងសាលាបណ្ដុះបណ្ដាលជំនាញវិជ្ជាជីវៈតាមខេត្តមួយចំនួនផងដែរ។

លោកបន្តថា សិស្សមួយចំនួនទៀត ពួកគេអាចបន្តសិក្សាដោយចាប់យកជំនាញបណ្ដុះបណ្ដាលវិជ្ជាជីវៈនៅតាមក្រសួងការងារ ឬក្រសួងផ្សេងៗ ដែលរាជរដ្ឋាភិបាលបាននឹងកំពុងធ្វើការពង្រឹងផ្ដោតលើការសិក្សាជំនាញសម្រាប់ប្រើប្រាស់ក្នុងជីវភាពប្រចាំថ្ងៃនេះ។

ជាមួយគ្នានេះដែរ ចំពោះសិស្សក្រីក្រ និងសិស្សស្រី ដែលបញ្ចប់ការសិក្សាថ្នាក់ទី ១២ ប៉ុន្តែមានជីវភាពខ្វះខាត មិនអាចទៅបន្តការសិក្សាទៀតបាន លោក តាន់ ប៊ុនហុង បន្ថែមថា ខាងរាជរដ្ឋាភិបាល ក៏ដួចជាអង្គការដៃគូរជាច្រើន បានផ្ដល់ជាអាហារូបករណ៍ សម្រាប់ផ្គតផ្គង់ដល់ការសិក្សារៀនសូត្ររបស់ពួកគេផងដែរ។

បើលោកតាន់ ប៊ុនហុង សិស្សដែលបានប្រឡងជាប់សញ្ញាប័ត្រមធ្យមសិក្សាទុតិយភូមិនាខេត្តកំពង់ធំឆ្នាំសិក្សា ២០២២ មានចំនួនប្រមាណ ៤១៣៦នាក់, ឆ្នាំសិក្សា ២០២១ កន្លងទៅ មានចំនួន ៣២៤៥នាក់។ ដោយឡែកក្នុងឆ្នាំសិក្សា២០២០ ព្រោះតែការរីករាលដាលនៃជំងឺសាកលកូវីដ ១៩ ដែលក្រសួងអប់រំ យុវជន និងកីឡា សម្រេចឱ្យសិស្សជាប់ដោយស្វ័យប្រវត្ត ដូច្នេះមានចំនួន ៤៩៣០នាក់៕

ដោយ៖ ថារី

Related Topics:ខេត្តកំពង់ធំ