ស្ថាបនិកមីល្ពៅខ្មែរ បង្ហើប​គម្រោង​ថ្មី ផលិតមីបន្លែដាក់ក្នុងហាងស៊ុបវិញម្តង​

ស្ថាបនិកសិប្បកម្មផលិតមីល្ពៅខ្មែរបាត់ដំបង កំពុងរៀបចំគម្រោង​សិប្បកម្មផលិតមីបន្លែមួយ​ប្រ​ភេទទៀត បន្ទាប់ពីទទួល​បានការគាំទ្រលើស្នាដៃចាស់។

លោក វ៉ាន់ គិមវ៉ាង ម្ចាស់សិប្បកម្មមីល្ពៅខ្មែរបាត់ដំបង បានបង្ហើបប្រាប់កម្ពុជាថ្មីនៅថ្ងៃពុធនេះថា លោកកំពុងរៀបចំគម្រោងផលិតមីបន្លែមួយប្រភេទទៀត ដោយកំពុងរៀបចំដាក់​ជូនទៅហាង​ដៃគូផ្តាច់មុខរបស់លោក ដែលស្នើឲ្យលោកផលិតមីបន្លែដាក់ក្នុងហាងស៊ុបរបស់ខ្លួន។

លោក វ៉ាន់ គិមវ៉ាង មិនទាន់​អាច​បញ្ជាក់ឈ្មោះប្រភេទបន្លែបានទេ ដោយបង្ការពីការចម្លង​ដោយ​គ្រាន់តែបង្ហើបប្រាប់ថា នៅ​ស្រុកខ្មែរ​មិន​ទាន់មានអ្នកធ្វើ​មីប្រភេទនេះនោះទេ ដោយគ្រោង​ចេញ​យ៉ាងយូរបំផុតរយៈពេល ១ ខែ ឬ២ខែ​ដ៍ខ្លីខាងមុខ។

ស្ថាបនិកសិប្បកម្មផលិតមីល្ពៅខ្មែររូបនេះ រំពឹងថា ប្រសិនបើលោកអាចផលិតបាន អាចនឹងមាន​ការ​ទាក់ទាញ និងទទួលបានការគាំទ្រ ពីអតិថិជន ដោយសារតែបន្លែអាច​ជួយសុខភាព​បានច្រើន​សម្រាប់មនុស្ស។

លោកថា កាលណាយើងលាយផលិតផលម្ស៉ៅ​បញ្ចូលជាមួយជាមួយ​បន្លែចម្រាញ់​ចេញជាមីនោះ​នឹង​មាន សារធាតុចិញ្ចឹមច្រើន ដែលខុសពីផលិតផលមីនៅលើទីផ្សារបច្ចុប្បន្ន ដោយ​លោកព្យា​យាម​បន្ថែមសារធាតុចិញ្ចឹមឲ្យបានច្រើនដែលមិនប៉ះពាល់ដល់សុខភាព៕