ព័ត៌មានជាតិ

អភិបាលរាជធានីនឹងប្រើប្រាស់គ្រប់វិធានការ ដុសក្អែល តម្រង់ទិសមន្ត្រីអោយអនុវត្តការងារផ្តល់សេវាជូនពលរដ្ឋ អោយបានទាន់ពេលនិងមានតម្លាភាព

បានផុស

៣ years មុន

នៅ

ថ្ងៃសុក្រ ២៤ កុម្ភៈ ២០២៣

ដោយ

ភ្នំពេញ ៖ ដើម្បីបម្រើសេវាសាធារណៈជូនប្រជាពលរដ្ឋអោយកាន់តែល្អប្រសើរ ទទួលបានការជឿទុកចិត្តពីពួកគាត់កាន់តែខ្លាំងឡើងនោះ ក្នុងនាមអភិបាលនៃគណៈអភិបាលរាជធានីភ្នំពេញនឹងប្រើប្រាស់គ្រប់វិធានការ ដុសក្អែល តម្រង់ទិស មន្ត្រីទាំងអស់នៅថ្នាក់ក្រោមជាតិ ដើម្បីអនុវត្តការងារលើការផ្តល់សេវាជូនប្រជាពលរដ្ឋ អោយបានទាន់ពេលវេលានិងមានតម្លាភាព ហើយ ការរក្សាសន្តិសុខ សុវត្ថិភាពជូនប្រជាពលរដ្ឋក៏ជាការងារចំបង ដែលយើងទាំងអស់គ្នារួមគ្នាធ្វើផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឃួង ស្រេង អភិបាលរាជធានីភ្នំពេញ កិច្ចប្រជុំការពង្រឹងការផ្តល់សេវាសាធារណៈតាមយន្តការច្រកចេញ-ចូលតែមួយ ជូនប្រជាពលរដ្ឋនៅថ្នាក់ខណ្ឌ និងសង្កាត់ ជាមួយអាជ្ញាធរខណ្ឌទាំង១៤ សង្កាត់ទាំង១០៥និងស្មៀន នៅសាលារាជធានីភ្នំពេញនារសៀលថ្ងៃទី២៤ ខែកុម្ភៈ ឆ្នាំ២០២៣នេះ បានមានប្រសាសន៍លើកឡើងថា ការបង្កើតច្រក ចេញចូលតែមួយ យើងមានគោលបំណងតែមួយគត់ នោះគឺបម្រើសេវាសាធារណៈជូនប្រជាពលរដ្ឋ អោយបានទាន់ពេលវេលានិងមានតម្លាភាព។ ដូច្នេះ មន្ត្រីដែលជាប្រតិបត្តិករទាំងអស់ ត្រូវរួមគ្នាធ្វើ ដើម្បីបម្រើប្រជាពលរដ្ឋ អោយបានល្អ រាប់តាំងពីពាក្យសំដីឡើងទៅ។

លោកឃួង ស្រេង បានបន្តទៀតថា ការកោះហៅអាជ្ញាធរខណ្ឌទាំង១៤ សង្កាត់ និងស្មៀន មកប្រជុំពេលនេះ គឺមានបំណងកោតសរសើរបងប្អូន ជាមន្ត្រីរបស់យើង ដែលបានបំពេញការងារបានយ៉ាងល្អជាមួយរាជរដ្ឋាភិបាល ក្នុងកិច្ចការងារបម្រើប្រជាពលរដ្ឋ រហូតទទួលបានការជឿទុកចិត្តយ៉ាងខ្លាំងពីប្រជាពលរដ្ឋគ្រប់គ្នា។

កិច្ចប្រជុំនេះ លោកក៏បានបំណង ណែនាំដុសក្អែល តម្រង់ទិសចំពោះមន្ត្រីរបស់យើងមួយចំនួនផងដែរ ដើម្បីឲ្យមន្ត្រីទាំងអស់ នៅថ្នាក់ក្រោមជាតិ អនុវត្តការងារលើការផ្តល់សេវាជូនប្រជាពលរដ្ឋ អោយកាន់តែល្អ ទាន់ពេលវេលានិងមានតម្លាភាព ជាមួយនិងការរក្សាបានសន្តិសុខ សុវត្ថិភាពជូនប្រជាពលរដ្ឋផងដែរ។

លោកបញ្ជាក់ថា នៅពេលខាងមុខនេះ លោកនិងដាក់កម្លាំងបង្កប់ជាប្រជាពលរដ្ឋ ទៅទទួលសេវា ពីមន្ត្រីរបស់យើង ដើម្បីអោយដឹងថា មន្ត្រីរបស់យើងបំរើប្រជាពលរដ្ឋបានល្អក្នុងកម្រិតណា ។ ក្នុងនាមជាមន្ត្រី ត្រូវកែប្រែឥរិយាបទពីពេលនេះទៅ ។នៅពេលមានបញ្ហា កុំថា អភិបាលរាជធានីភ្នំពេញ មិនបានណែនាំជាមុនអោយសោះ។

លោកឃួង ស្រេង បានបន្ថែមទៀតថា ល្បែងស៊ីសងគ្រប់ប្រភេទ គឺមិនអនុញ្ញាតអោយមានជាដាច់ខាតនៅក្នុងផ្សារនានានៅក្នុងរាជធានីភ្នំពេញ កុំថាឡើយ ល្បែងឡូតូដែលស្របច្បាប់ ក៏មិនអោយមានដែរ ។ បើរកឃើញថា នៅក្នុងផ្សារណាមួយមានល្បែងស៊ីសងនោះ ប្រធានផ្សារនឹងមានបញ្ហាមិនខានឡើយ៕

ដោយ ៖ ស្រីរ័ត្ន