នៅក្នុងឆ្នាំ ២០២២ រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bui) បានប្រើប្រាស់រថយន្តក្រុងចំនួន ៦០គ្រឿង ដោយមានអ្នកជិះចំនួនជាង ១ លាននាក់ ដើម្បីរួមចំណែកក្នុងការកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ។

ក្នុងអង្គសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅអនុវត្តការងារ ឆ្នាំ២០២៣ របស់រដ្ឋបាលរាជធានីភ្នំពេញដែលបាននឹងកំពុងធ្វើឡើងនៅថ្ងៃទី ០៩ និងទី១០ មីនា ឆ្នាំ២០២៣នេះ លោកសេង វណ្ណៈ នាយករដ្ឋបាលរាជធានីភ្នំពេញបានឱ្យដឹងថា៖ ក្នុងឆ្នាំ២០២២ រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bui) ប្រើប្រាស់រថយន្ត ក្រុងចំនួន ៦០ គ្រឿង មានចំនួន ០៤ខ្សែរត់ មានអ្នកជិះសរុបចំនួន ១៣៨១៣៧៦នាក់ ក្នុងនោះអ្នកជិះ ថេយន្តក្រុងបង់ប្រាក់ចំនួន ៣៦៨,២២១នាក់ អ្នកជិះរថយន្តក្រុងមិនបង់ប្រាក់ ចំនួន ១.០០០.៩៦៧នាក់, អ្នកជិះកាណូតបង់ប្រាក់ចំនួន ២.០៧២នាក់ អ្នកជិះកាណូតមិនបង់ប្រាក់ចំនួន ១០,១១៦នាក់។

គួរបញ្ជាក់ថា៖ ថ្ងៃទី២៨ ខែកុម្ភៈ ឆ្នាំ២០២៣កន្លងមកនេះរថយន្តក្រុងចំនួន ២០០ គ្រឿងទៀត ដែលជាអំណោយរបស់ក្រុមហ៊ុន ប៊ូយ៉ុង គ្រុប» បានប្រគល់ជូនរដ្ឋបាលរាជធានីភ្នំពេញ ដើម្បីរួមចំណែកពង្រឹងប្រសិទ្ធភាពនៃការផ្តល់សេវាដឹកជញ្ជូនសាធារណៈ រថយន្តក្រុង (City Bus) ក្នុងរាជធានីភ្នំពេញអោយកាន់តែប្រសើរឡើងមួយកម្រិតថែមទៀត៕

អត្ថបទ៖ ស្រីរ័ត្ន