រដ្ឋជួយសន្សំពលរដ្ឋជាង១លាន៤សែនដុល្លារលើថ្លៃធ្វើដំណើររាល់បុណ្យចូលឆ្នាំ និងភ្ជុំបិណ្ឌ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានលើកឡើងថាក្នុងមួយរដូវបុណ្យចូលឆ្នាំ ឬភ្ជុំបិណ្ឌ រដ្ឋាភិបាលជួយដល់ការចំណាយរបស់ពលរដ្ឋជាង១លាន៤សែនដុល្លារ លើការផ្ដល់សេវារថយន្តក្រុងដោយឥតគិតថ្លៃដឹកពលរដ្ឋចេញពីរាជធានីភ្នំពេញទៅតាមបណ្ដាខេត្តនានា។

ថ្លែងក្នុងពិធីសម្ពោធដាក់ឱ្យប្រើប្រាស់ស្ពានអាកាសមរតកតេជោ ព្រឹកថ្ងៃទី៧ ខែមេសា សម្ដេចធិបតី ហ៊ុន ម៉ាណែត ថា ទំហំលុយជាង ១លាន៤សែនដុល្លារនេះបានជួយសម្រួលដល់ជីវភាពពលរដ្ឋជាច្រើន និងជំរុញឱ្យផ្ដល់សេវានេះបន្តទៀត។

សម្ដេចថា៖ «ថ្ងៃមុនខ្ញុំចុះទៅមើលនៅទីលានប្រជាធិបតេយ្យដែលរៀបចំពិធីហ្នឹង ខ្ញុំសួរមួយគ្រួសារទៅបន្ទាយមានជ័យ ខ្ញុំសួរគាត់ថាទៅ(បើឡានតាក់ស៊ី)គេយកប៉ុន្មាន? គាត់ថា​ម្នាក់ទៅ១០ម៉ឺនមកវិញ១០ម៉ឺន ហើយគ្រួសារគាត់មាន៥នាក់ អ៉ីចឹងប្រពន្ធ កូន និងយាយទៀត! អ៉ីចឹងក្នុង១ជើងគាត់សន្សំបាន៤០ម៉ឺន បើទៅមកគាត់សន្សំបាន២០០ដុល្លារ។ ២០០ដុល្លារហ្នឹងគាត់ទុកចាយធ្វើបុណ្យនៅផ្ទះ ឬក៏ធ្វើអីផ្សេងបាន»។

ជារៀងរាល់ឆ្នាំក្នុងរដូវចូលឆ្នាំខ្មែរ និងភ្ជុំបិណ្ឌសាលារាជធានីភ្នំពេញតែងតែបញ្ចេញរថយន្តក្រុងសាធារណៈដឹកពលរដ្ឋចេញពីរាជធានីភ្នំពេញ ទៅតាមបណ្ដាខេត្តនានា ខណៈក្នុងពេលចូលឆ្នាំខ្មែរខាងមុខ សាលារាជធាន៏ក៏ត្រៀមរថយន្តក្រុងចំនួន ៥៩៧គ្រឿង ដើម្បីដឹកប្រជាពលរដ្ឋធ្វើដំណើរដោយឥតគិតថ្លៃ ទៅលេងស្រុកកំណើតផងដែរ៕

អត្ថបទដោយ ហ៊ុន សិរីវឌ្ឍន៍