ច្រាំងស្ទឹងសង្កែ ត្រូវបានជួសជុល និងកែប្រែថ្មីដើម្បីសោភ័ណភាពទីក្រុងស្អាត

មួយរយ:នៃការបញ្ជាអោយទឹកស្ទឹងសង្កែស្រកដល់បាតទៅតាមផែនការរបស់លោកអភិបាលខេត្ត គឺក្នុងន័យជួសជុល និងរៀបចំច្រាំងស្ទឹងអោយមានសោភ័ណភាព និងបរិស្ថានល្អ ដើម្បីលើកមុខមាត់សម្រស់ទីក្រុងដែលទទួលបានជ័យលាភីផ្ការំដួល៣ទងនាពេលថ្មីៗនេះ។

ប៉ុន្មានខែចុងក្រោយនេះ ឯកឧត្តមអភិបាលខេត្ត សុខ លូ បានចាត់អោយមន្ទីរជំនាញបិទទ្វារទឹកនៅទំនប់កង្ហត និងបើកទ្វារទឹកនៅទំនប់សាលាតាអន ដើម្បីធ្វើយ៉ាងណាអោយទឹកស្រកដល់បាតស្ទឹង ងាយស្រួលដល់កម្លាំងធ្វើការជួសជុលតាមចំណុចច្រាំងស្ទឹងដែលបាក់ស្រុត និងងាយស្រួលដល់ការកែលំអរច្រាំងស្ទឹង នៅកណ្តាលក្រុងបាត់ដំបង អោយមានសម្រស់ស្រស់ស្អាត ដើម្បីទាក់ទាញភ្ញៀវទេសចរគ្រប់ស្រទាប់អោយចាប់អារម្មណ៍លើខេត្តបាត់ដំបង។

នៅក្នុងដំណាក់កាលនៃការបញ្ជាអោយទឹកស្រកនេះដែរ គេសង្គេតឃើញថា ការបាក់ស្រុតច្រាំង នៅតាមបណ្តោយដងស្ទឹងសង្កែ គឺមានច្រើនកន្លែងគួរអោយកត់សម្គាល់ ប៉ុន្តែទោះបីជាយ៉ាងនេះក្តី ក៏រដ្ឋបាលខេត្ត និងមន្ទីរសាធារណការ និងដឹកជញ្ជូនខេត្ត បានដាក់គ្រឿងចក្រចុះគ្រប់គោលដៅ ដើម្បីធ្វើការសម្រុកជួសជុលអោយទាន់ក្នុងរដូវប្រាំងនេះ ដោយ​ឡែកក្រុមកែលំអរច្រាំងក៏ធ្វើសកម្មភាពយ៉ាងសស្រាក់សស្រាំផងដែរ ដើម្បីសម្រេចតាមទិសដៅរបស់គណអភិបាលខេត្តបាត់ដំបង។

ប្រជាពលរដ្ឋជាច្រើន បានកោតសរសើរដល់ស្នាដៃរបស់ឯកឧត្តម សុខ លូ ដែលបានផ្លាស់ប្តូរមុខមាត់ខេត្តបាត់ដំបង ជាច្រើនកន្លែង ចាប់តាំងពីលោកមកកាន់តំណែងលើទឹកដីដ៏អស្ចារ្យនេះ ។ ស្របពេលនេះដែរ ពលរដ្ឋក៏បានសំណូមពរដល់អាជ្ញាធរខេត្ត ធ្វើយ៉ាងណាត្រូវលុបបំបាត់អោយអស់ នូវបែរចិញ្ចឹមត្រីក្នុងទឹកស្ទឹង ដើម្បីទទួលបាននូវបរិស្ថានល្អ និងធ្វើអោយទឹកស្ទឹងមានអនាម័យល្អផងដែរ ដល់ការប្រើប្រាស់ និងសម្រាប់មនុស្សគ្រប់រូបបរិភោគ ៕

អត្ថបទ៖ សោ និយមរ័ត្ន