ព័ត៌មានអន្ដរជាតិ

វៀតណាមប្រាប់ឱ្យប្រជាជន អាជីវកម្ម បន្ថយការប្រើប្រាស់អគ្គិសនី ដោយសារវាហក់ឡើងខ្ពស់ពេក

បានផុស

២ ខែ មុន

នៅ

ថ្ងៃសុក្រ ១៥ ឧសភា ២០២៦

ដោយ

រដ្ឋាភិបាលវៀតណាមបានអំពាវនាវដល់គ្រួសារ និងអាជីវកម្ម ឱ្យសន្សំសំចៃថាមពលបន្ថែមទៀត ក្រោយការប្រើប្រាស់អគ្គិសនីរបស់ប្រទេសនេះ បានហក់ឡើងខ្លាំងពេកដល់កម្រិតខ្ពស់បំផុតក្នុងរយៈពេល១ថ្ងៃ ដោយសារតែធាតុអាកាសក្ដៅហួតហែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ក្រុមហ៊ុនថាមពលរដ្ឋ EVN បានឱ្យដឹងថា ការប្រើប្រាស់អគ្គិសនីនៅថ្ងៃពុធ បានហក់ឡើងដល់ ១,១ ប៊ីលានគីឡូវ៉ាត់ម៉ោង ដែលជាកម្រិតប្រចាំថ្ងៃខ្ពស់បំផុតនៅឆ្នាំ ២០២៦ នេះ។

ថាមពលដើរដោយធ្យូងថ្ម បានរួមចំណែក ៥៣,៤% នៃផលិតកម្មអគ្គិសនីអំឡុងម៉ោងប្រើប្រាស់កំពូល ខណៈរោងចក្រវារីអគ្គិសនីរួមចំណែក ២៦%។

រដ្ឋាភិបាលវៀតណាមនិយាយកាលពីថ្ងៃព្រហស្បតិ៍ថា រលកកម្ដៅដែលរំពឹងថានឹងវាយប្រហារវៀតណាមជាថ្មីនៅចុងខែឧសភានេះ នឹងដាក់សម្ពាធដល់បណ្តាញអគ្គិសនីរបស់ប្រទេស។

ប៉ុន្មានឆ្នាំកន្លងមក គ្រួសារ អាជីវកម្ម ក្នុងប្រទេសវៀតណាម ដែលជាមជ្ឈមណ្ឌលផលិតកម្មដ៏ធំមួយរបស់អាស៊ីអាគ្នេយ៍ តែងតែរងគ្រោះដោយការដាច់ចរន្តអគ្គិសនីពេលមានរលកកំដៅ ដែលបង្កផលប៉ះពាល់ផ្សេងៗជាពិសេសផ្នែកសេដ្ឋកិច្ច និងសុខភាព។

ការជំរុញឱ្យប្រជាជន និងអាជីវកម្មកាត់បន្ថយការប្រើប្រាស់អគ្គិសនីនាពេលនេះ ធ្វើឡើងចំពេលដែលវៀតណាម ដូចនឹងប្រទេសផ្សេងទៀតក្នុងតំបន់ដែរ ប្រឈមមុខនឹងវិបត្តិថាមពល ដែលបណ្ដាលមកពីជម្លោះនៅមជ្ឈិមបូព៌ា ដែលបង្កការបិទច្រកហ័រមូហ្ស។

កាលពីថ្ងៃព្រហស្បតិ៍ ប្រទេសហ្វីលីពីនក៏បានព្រមានអំពីការដាច់ចរន្តអគ្គិសនីរហូតដល់ ៧ ម៉ោង នៅទូទាំងបណ្តាញអគ្គិសនីសំខាន់ៗចំនួន ២ របស់ខ្លួន (តំបន់ Visayas និងកោះ Luzon រួមទាំងទីក្រុងម៉ានីល) ដោយសារតែរលកកម្ដៅ និងការដាច់ប្រតិបត្តិការនៅរោងចក្រថាមពល៕