សមាគមអ្នកនិពន្ធថា វគ្គរៀនតែងនិពន្ធលើកនេះ សិក្ខាកាម ៥០% ជាមនុស្សវ័យចំណាស់

ក្នុងវគ្គទី៣៤ នៃការបង្រៀនតែងនិពន្ធ មានសិក្ខាកាមចូលរៀនច្រើន ហើយអ្វីដែលគួរឱ្យកត់សម្គាល់ នោះ អ្នកចូលរួមវគ្គ​បណ្តុះ​បណ្តាល​នេះ គឺមានប្រមាណ ៥០ភាគរយ ជាអ្នកដែលមានវ័យចំណាស់ ជាអតីតមន្ត្រីរដ្ឋ រួមទាំងអ្នកប្រកបរបររកស៊ី​ផង​ដែរ។ នេះបើតាមការឱ្យដឹងពី អ្នកស្រី ប៉ុល ពិសី អនុប្រធានសមាគមអ្នកនិពន្ធខ្មែរ និងជាប្រធានផ្នែកផ្សព្វផ្សាយរបស់សមាគម ទ្រទ្រង់ការបោះពុម្ព និងអប់រំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនិពន្ធជើងចាស់រូបនេះ អះអាងថា សម្រាប់វគ្គទី៣៤ នៃការបង្រៀនតែងនិពន្ធ ដែលរាប់បញ្ជូលទាំងប្រភេទរឿងខ្លី កំណាព្យ ប្រលោមលោកខ្នាតវែង-ខ្លី និងអត្ថបទភាពយន្តជាដើម គឺមានការផុសផុលចូលរៀនច្រើន ក្នុងគ្រប់ជំនាញ​ទាំងអស់។ អ្នកស្រីបន្តថា អ្វីដែលចម្លែកសម្រាប់វគ្គនេះនោះគឺ សិក្ខាកាមករៀនវគ្គនេះ ភាគច្រើនជាអ្នករៀន និងធ្វើការ​ជំនាញផ្សេង ដូចជាគ្រូពេទ្យ យោធា អតីតមន្ត្រីចូលនិវត្តន៍របស់អង្គការ ឬសាលារៀន ដោយក្នុងនោះ មានទាំង​អ្នកជំនួញតូច-មធ្យម ដែលពួកគាត់សុទ្ធសឹងមករៀនក្រោមហេតុផលដូចគ្នា គឺស្រឡាញ់ការតែងនិពន្ធ។

ចំពោះវគ្គបណ្តុះបណ្តាលទាំងអស់របស់សមាគមអ្នកនិពន្ធខ្មែរ អ្នកគ្រូថា កន្លងមក ក៏មានអ្នកជាប់ជ័យលាភី ក្នុងការ​ប្រកួត​ស្នាដៃ​តែងនិពន្ធផ្សេងៗផងដែរ ដែលនេះអាចចាត់ទុកថា ជាផ្លែផ្កាមួយ ដែលវគ្គបណ្តុះបណ្តាល​របស់សមាគម​អ្នកនិពន្ធខ្មែរ​ទទួលបាន។

ក្នុងនាមជាគ្រូបង្រៀនមួយរូបរបស់សមាគម អ្នកស្រីអះអាងថា ការបង្រៀនរបស់លោកគ្រូ-អ្នកគ្រូ នៃសមាគមអ្នកនិពន្ធខ្មែរ គឺសុទ្ធសឹងជាការស្ម័គ្រចិត្ត ចំណាយទាំងទឹកចិត្ត និងពេលវេលាខ្លួនផ្ទាល់ សម្រាប់បណ្តុះបណ្តាលអ្នកជំនាន់ក្រោយ ហើយអ្វីដែលជាកម្លាំងជំរុញធំបំផុត ដែលធ្វើឱ្យអ្នកគ្រូមានទឹកចិត្តបង្រៀន គឺវត្តមានរបស់សិក្ខាកាម ពិសេសភាពរីក​ចម្រើន​នៃសមត្ថភាពរបស់ពួកគាត់។ អ្នកស្រីថា ដោយសារតែសិក្ខាកាមមានវ័យច្រើន រួមនឹងបទពិសោធន៍ ជីវិត-ការងារក៏ច្រើន ពួកគាត់គឺឆាប់ទទួលបាន ហើយរីកចម្រើនលឿនក្នុងវគ្គបណ្តុះបណ្តាលនេះ។​

នៅពេលឃើញមានសិក្ខាកាមផុសផុលចូលរៀនច្រើនបែបនេះ ពិសេសសិក្ខាកាមវ័យចំណាស់ អ្នកស្រីបង្ហាញចំណាប់ អារម្មណ៍ថា អ្នកស្រីមានចិត្តរីករាយខ្លាំង ខណៈវ័យដែលត្រូវចូលនិវត្តន៍ទៅហើយ នៅតែមានឱកាសនិងទទួលបានតម្លៃ ក្នុងនាមជាអ្នកជំរុញគ្រាប់ពូជអ្នកនិពន្ធជំនាន់ក្រោយ ហើយអ្នកស្រី នៅតែមានកម្លាំងចិត្តបន្តការងារនេះ។

បើតាមអនុប្រធានសមាគមអ្នកនិពន្ធខ្មែរ សមាគមអ្នកនិពន្ធខ្មែរ គឺមានការគាំទ្រផ្តល់ឱ្យនូវកន្លែងបណ្តុះបណ្តាល ពីប្រមុខ រាជរដ្ឋាភិបាល ដែលរហូតមកដល់ពេលនេះ គឺបើកវគ្គបណ្តុះបណ្តាល ៣៤វគ្គទៅហើយ។ អ្នកនិពន្ធជើងចាស់រូបនេះថា សមាគមនឹងបន្តលើកស្ទួយវិស័យតែងនិពន្ធនៅកម្ពុជានេះបន្ថែមទៀត តាមរយៈការបើកវគ្គបង្ហាត់បង្រៀនអ្នកជំនាន់ក្រោយ៕