ព័ត៌មានជាតិ

ជនសង្ស័យម្នាក់ល្បួងរំលោភក្មេងអនីតិជន ត្រូវសមត្ថកិច្ចឃាត់ខ្លួន

បានផុស

៤ years មុន

នៅ

ថ្ងៃសៅរ៍ ១៦ មករា ២០២១

ដោយ

រតនគិរី ៖ ជនសង្ស័យម្នាក់ត្រូវបានកម្លាំងអាវុធហត្ថស្រុកកូនមុំ ឃាត់ខ្លួនពាក់ព័ន្ធករណីរំលោភសេពសន្ថវៈលើអនីតិជន។

ការឃាត់ខ្លួននេះធ្វើឡើងនៅវេលាម៉ោង១៤និង១០នាទី កាលពីថ្ងៃទី១៥ ខែមករា ឆ្នាំ២០២១ កម្លាំងកងរាជអាវុធហត្ថស្រុកចំនួន៦នាក់ ដឹកនាំដោយលោកវរសេនីយ៍ត្រី រស់ វណ្ណា មេបញ្ជាការកងរាជអាវុធហត្ថស្រុកកូនមុំបានទៅដល់ចំណុចកើតហេតុនៅការដ្ឋានទី៣ ក្នុងក្រុមហ៊ុនហ័ងអញ់យ៉ាឡាយ ស្ថិតនៅក្នុងភូមិ៣ ឃុំស្រែអង្គ្រង ស្រុកកូនមុំ ខេត្តរតនគិរី។

យោងតាមរបាយការណ៍ពីអាវុធហត្ថស្រុកកូនមុំ បានឲ្យដឹងថា ជនសង្ស័យនេះឈ្មោះ ផាសុ ភេទប្រុស អាយុ២៨ឆ្នាំ ជនជាតិខ្មែរ មានស្រុកកំណើតនៅភូមិបុស្សក្រឡាញ់ ឃុំសៀមរាប ស្រុកសូរនិគមន៍ ខេត្តសៀមរាប មានទីលំនៅបច្ចុប្បន្នភូមិ៣ ឃុំស្រែអង្គ្រង ស្រុកកូនមុំ ខេត្តរតនគិរី បានធ្វើសកម្មភាពចាប់រំលោភសេពសន្ថវៈទៅលើជនរងគ្រោះឈ្មោះ ធ. ស.ជ.ត អាយុ៧ឆ្នាំ ជនជាតិខ្មែរ មានទីលំនៅភូមិ-ឃុំជាមួយគ្នា។

របាយការណ៍បានបញ្ជាក់ទៀតថា ករណីរំលោភសេពសន្ថវៈនេះ កាលពីថ្ងៃទី១៤ ខែមករា ឆ្នាំ២០២១កន្លងទៅ នៅវេលាម៉ោង១១និង៣០នាទី បន្ទាប់ពីមានពាក្យបណ្តឹងពីឪពុកម្តាយក្មេងរងគ្រោះនោះ។

បច្ចុប្បន្នជនសង្ស័យត្រូវបានអាវុធហត្ថស្រុកកូនមុំ បញ្ជូនទៅទីបញ្ជាការដ្ឋានកងរាជអាវុធហត្ថខេត្ត ដើម្បីសួរនាំនិងកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់៕

ដោយ ៖ វុទ្ធឦសាន

Related Topics:រំលោភសេពសន្ថវៈ