អ្នកនាំពាក្យ ៖ គ.ជ.ប មិនទាន់ទទួលបានការចុះឈ្មោះអ្នកសារព័ត៌មាននៅឡើយទេ បើគិតត្រឹមព្រឹកថ្ងៃទី ៦ មេសានេះ  

គិតត្រឹមព្រឹកថ្ងៃទី ៦ ខែមេសា ឆ្នាំ ២០២៣នេះ គណៈកម្មាធិការជាតិរៀបចំការបោះឆ្នោត (គ.ជ.ប) មិនទាន់ទទួលបានការចុះឈ្មោះអ្នកសារព័ត៌មានជាតិ-អន្តរជាតិ សម្រាប់ចូលរួមយកព័ត៌មានជុំវិញដំណើរការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅឡើយទេ។ នេះបើតាមអ្នកនាំពាក្យ គ.ជ.ប។

កាលពីថ្ងៃទី ១ ខែមេសា ឆ្នាំ ២០២៣កន្លងទៅនេះ គ.ជ.ប បានប្រកាសចាប់ផ្ដើមទទួលពាក្យសុំចុះឈ្មោះអ្នកសារព័ត៌ មានជាតិ-អន្តរជាតិ ដើម្បីចូលរួមយកព័ត៌មានក្នុងដំណើរការ នៃការរៀបចំការបោះឆ្នោតជ្រើសតាំងតំណាងរាស្រ្ត នីតិកាលទី ៧។

លោក សោម​ សូរីដា អគ្គលេខាធិការរង និងជាអ្នកនាំពាក្យ គ.ជ.ប ប្រសាសន៍ប្រាប់កម្ពុជាថ្មីថា គ.ជ.ប មិនទាន់ទទួលបានការចុះឈ្មោះអ្នកសារព័ត៌មានជាតិ-អន្តរជាតិ នៅឡើយទេ បើគិតត្រឹមព្រឹកថ្ងៃទី ៦ ខែមេសា ឆ្នាំ ២០២៣នេះ។

បើតាមលោក សោម សូរីដា គឺការចូលរួមរបស់អ្នកសារព័ត៌មានជាតិ-អន្តរជាតិ នៅក្នុងដំណើរការបោះឆ្នោតជ្រើសតាំង តំណាងរាស្រ្ដ គឺពិតជាមានសារៈសំខាន់។ សំខាន់ពីព្រោះការផ្សព្វផ្សាយអំពីដំណើរការបោះឆ្នោត គឺពិតជាតម្រូវចាំបាច់ ដើម្បីឲ្យប្រជាពលរដ្ឋដែលជាអ្នកបោះឆ្នោត អាចទទួលបាននូវព័ត៌មានសំខាន់ៗ ពាក់ព័ន្ធនឹងការបោះឆ្នោត ព្រឹត្តិការណ៍ទូទៅនៃដំណើរការបោះឆ្នោត និងកម្មវិធីន​យោបាយរបស់គណបក្សនយោបាយ ជាដើម។

តែយ៉ាងណាក៏ដោយ អ្នកនាំពាក្យ គ.ជ.បរូបនេះ បានអំពាវនាវដល់អ្នកសារព័ត៌មានជាតិ-អន្តរជាតិ ត្រូវចូលរួមផ្សព្វផ្សាយព័ត៌មានជុំវិញដំណើរការបោះឆ្នោត ដែលជាព័ត៌មានពិត ដើម្បីផ្សព្វផ្សាយជូនប្រជាពលរដ្ឋ។

សូមជម្រាបថា យោងតាមប្រតិទិន នៃការបោះឆ្នោតជ្រើសតាំងតំណាងរាស្រ្ត នីតិកាលទី ៧ ឆ្នាំ ២០២៣ បានឲ្យដឹងថា កាលបរិច្ឆេទ នៃការចុះឈ្មោះអ្នកសារព័ត៌មានជាតិ នឹងត្រូវបញ្ចប់ត្រឹមថ្ងៃទី ១២ ខែកក្កដា និងថ្ងៃទី ១៩ ខែកក្កដា ឆ្នាំ ២០២៣ សម្រាប់អ្នកសារព័ត៌មានអន្តរជាតិ៕