អាជីវករលក់កាំភ្លើងបាញ់ទឹកលក់រហូតដាច់ស្ដុករកកាំភ្លើងលក់អត់បាន

អាជីវករលក់ប្រដាប់ប្រដាក្មេងលេងនៅផ្សារច្បារអំពៅលោក សុខ វិន បានប្រាប់ថា នៅថ្ងៃបុណ្យចូលឆ្នាំនេះលោកពុំបានទៅលេងតាមបណ្តាខេត្តទេគឺជាប់លក់កាំភ្លើងបាញ់ទឹក។

អាជីវកររូបនេះបញ្ជាក់ថា ថ្ងៃបុណ្យចូលឆ្នាំថ្ងៃទី១ កាំភ្លើងបាញ់ទឹកលេខ១ (ធុនធំ) លក់បានតម្លៃ៤០ដុល្លារ។ លុះដល់ថ្ងៃទី២ និងទី៣លក់បានរហូតដល់ ៥០ ទៅដល់៥៥ដុល្លារ។ អ្វីដែលគួរឲ្យស្តាយនោះគឺអត់មានកាំភ្លើងលក់។

ចំណែកអាជីវករ តុង វិញ ដែលលក់គ្រឿងជរ័នៅភូមិព្រែកសង្កាត់ច្បារអំពៅទី១ ខណ្ឌច្បារអំពៅរាជធានីភ្នំពេញបានឲ្យដឹងថា ឆ្នាំនេះកាំភ្លើងបាញ់ទឹកលក់ដាច់ខ្លាំងណាស់រហូតគ្មានកាំភ្លើងលក់ហើយចំណេញសឹងពាក់កណ្តាល។

ព្រោះទទួលទិញចូលថ្លៃ៣០ដុល្លារហើយលក់ចេញបានទៅដល់ ៥៥ ដុល្លារឯណោះ។ អាជីវកររូបនេះអះអាងថា ថ្ងៃដែលលក់ដាច់ខ្លាំងគឺចាប់ថ្ងៃចូលឆ្នាំទី២ និងថ្ងៃទី ៣ លក់អស់ទាំងព្រឹករហូតគ្មានកាំភ្លើងលក់ថែមទៀតផង។

លោក ជា សុខៃ ចៅសង្កាត់ចាក់អង្រែក្រោមបានឲ្យដឹងថា បុណ្យចូលឆ្នាំខ្មែរឆ្នាំនេះបងប្អូនប្រជាពលរដ្ឋក្នុងសង្កាត់របស់លោកនាំំគ្នារាំលេងសប្បាយហើយអ្នកខ្លះអត់មានកាំភ្លើងបាញ់ទឹកបែរជាទាញទុយោទឹកពីក្នុងផ្សារមកងូតទឹកដល់អ្នកដំណើរដែលឆ្លងកាត់។

ប៉ុន្តែក្នុងនោះលោកចៅសង្កាត់បានចាត់កម្លាំងឲ្យចុះណែនាំកុំឲ្យបាញ់ទឹកលើអ្នកដំណើរចំផ្ទៃមុខអាចបង្កឲ្យដួលម៉ូតូនាំតែគ្រោះថ្នាក់ដល់អាយុជីវិត។ ចំពោះការលក់ដូរកាំភ្លើងបាញ់ទឹកវិញគឺពិតជាលក់ដាច់មែន៕

អត្ថបទ៖ នរា