សម្តេច​ ស ខេង ៖ បញ្ហាធំៗមួយចំនួន ​នឹងអាចកើតឡើងនាពេល​ខាងមុខ

រដ្ឋមន្ត្រីក្រសួងមហាផ្ទៃ បានបញ្ជាឱ្យមន្រ្តីពាក់ព័ន្ឋត្រៀមខ្លួនចាត់វិធានការ និងដោះស្រាយបញ្ហាធំៗមួយចំនួន ដែលនឹងអាចកើតឡើងនាពេលខាងមុខ បើទោះបីក្នុងរយៈពេល១០ឆ្នាំមកនេះ ការអនុវត្តនូវគោល​នយោបាយភូមិ ឃុំ មានសុវត្ថិ​ភាព ទទួលបានលទ្ឋផលល្អក៏ដោយ។

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ក្នុងពិធីប្រកាសផ្សព្វផ្សាយដាក់ឲ្យប្រើប្រាស់ជាផ្លូវការ”ផែនការសកម្មភាពជាតិ ស្តីពីការទប់ស្កាត់អំពីហិង្សាលើស្ត្រី ២០១៩-២០២៣” នាព្រឹកថ្ងៃទី​១៩ ខែមករា ឆ្នាំ២០២១ថា រយៈពេល១០ឆ្នាំ គិតចាប់ពីឆ្នាំ ២០១០ រហូតដល់ឆ្នាំ២០២០ ការអនុវត្ត​គោលនយោបាយភូមិ ឃុំ មានសុវត្ថិភាព ទទួលបានលទ្ឋផលល្អគួរឱ្យកត់សម្គាល់។

រដ្ឋមន្ត្រីក្រសួងមហាផ្ទៃ មានប្រសាសន៍លើកឡើងថា នៅមានបញ្ហាខ្លះ ដែលនៅតែជាបញ្ហា នឹងអាចធំជាងពេលមុន​ថែម​ទៀត ក្នុងនោះគឺបញ្ហាគ្រឿងញៀន ជាដើម។

ជាមួយគ្នានេះ សម្តេច​ ស ខេង បានស្នើសុំនូវយោបល់មួយចំនួនទៅកាន់សម្ដេចតេជោ ហ៊ុន សែន នាយករដ្ឋមន្រ្តីកម្ពុជា លើ​ការ លើកកម្ពស់កម្រិតគោលនយោបាយភូមិ ឃុំ មានសុវត្ថិភាព ផងដែរ៕