ព័ត៌មានជាតិ

ដំណាំកសិកម្ម ៥ ប្រភេទ ដាំដុះច្រើនបំផុតនៅខេត្តស្ទឹងត្រែង

បានផុស

១ សប្តាហ៍ មុន

នៅ

ថ្ងៃអង្គារ ២៥ មេសា ២០២៣

ដោយ

ពលរដ្ឋមួយភាគធំក្នុងខេត្តស្ទឹងត្រែងពឹងផ្អែកលើការធ្វើកសិកម្ម ដើម្បីធានាសន្តិសុខស្បៀងនិងលើកកម្ពស់ជីវភាពរស់នៅប្រចាំថ្ងៃ។

ខេត្តនៅភូមិភាគឦសាននេះមានផ្ទៃដីដាំដុះដំណាំកសិកម្មប្រមាណជាង ១០០.០០០ហិកតា។ ក្នុងចំណោមដំណាំកសិកម្មផ្សេងៗ មានដំណាំកសិកម្មចំនួន ៥ ប្រភេទដែលពលរដ្ឋក្នុងខេត្តបានដាំដុះច្រើនបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះស្វាយចន្ទីចំនួន ៤៤.៥២៧ ហិកតា ដំណាំស្រូវមានចំនួន ២៧.០០០ហិកតា កៅស៊ូចំនួន ១៣.៣៤១ ហិកតា ដំឡូងមី ២៥.០៦៧ហិកតា ស្វាយ ៣.៩៨០ ហិកតា និងដំណាំរួមផ្សំផ្សេងៗចំនួន ៤.០០០ហិកតា។

លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែងបានថ្លែងនៅក្នុងសន្និសីទជោគជ័យរយៈពេល ៥ ឆ្នាំ របស់រដ្ឋបាលខេត្តកាលពីម្សិលមិញនេះថា វិស័យកសិកម្មបានចូលរួមចំណែកប្រមាណ ៦៧ ភាគរយ នៃផលិតផលក្នុងស្រុកសរុប (GDP) ដែលផ្ដល់ចំណូលចន្លោះពី ៧០០លានដុល្លារ ទៅ ៨០០លានដុល្លារ នៅក្នុងរយៈពេល ៥ ឆ្នាំចុងក្រោយនេះ។

ខេត្តស្ទឹងត្រែងមានផ្ទៃដីធំទូលាយមានជីជាតិអំណោយផលដល់ការវិយោគលើវិស័យកសិកម្ម កសិ-ឧស្សាហកម្ម និងទេសចរណ៍។ ក្នុងមួយឆ្នាំៗចំណូលជាមធ្យមដែលទទួលបានពីផលកសិកម្មក្នុងរង្វង់ ១៤០ ទៅ ១៦០ លានដុល្លារអាមេរិក។

អត្រាភាពក្រីក្ររបស់ប្រជាជនក្នុងខេត្តស្ទឹងត្រែងបានថយចុះពី ២៣% ក្នុងឆ្នាំ ២០១៨ មកត្រឹម ២១% ក្នុងឆ្នាំ២០២៣ ខណៈផលិតផលក្នុងស្រុកសរុបសម្រាប់ប្រជាជនម្នាក់ៗ (GDP) កើនឡើងពី ១.៤២៣ដុល្លារ ក្នុងឆ្នាំ ២០១៨ ដល់ ១.៥៨៥ ដុល្លារ ក្នុងឆ្នាំ២០២៣៕

Related Topics:ខេត្តស្ទឹងត្រែង