វគ្គបំប៉នសមត្ថភាពគ្រូឧទ្ទេសថ្នាក់ជាតិលើកទី៣ បញ្ចប់ដោយជោគជ័យ

ក្រសួងអប់រំ យុវជន និងកីឡា សហការគាំទ្រដោយ អង្គការយូនីសេហ្វ គម្រោងមូលនិធិភាពជាដៃគូសម្រាប់ការអភិវឌ្ឍសមត្ថភាពវិស័យអប់រំ (CDPF III) និងការគាំទ្របច្ចេកទេសពីអង្គការ VVOB ប្រចាំកម្ពុជា បានរៀបចំបិទវគ្គបំប៉នសមត្ថភាពគ្រូឧទ្ទេសថ្នាក់ជាតិលើកទី៣ នៅខេត្តសៀមរាប ស្ដីពី ការប្រើប្រាស់ សៀវភៅណែនាំគ្រូបង្រៀន លើវិធីសាស្ត្របង្រៀន និងការប្រើប្រាស់កញ្ចប់សម្ភារគណិតវិទ្យាថ្នាក់ទី២ ឆមាសទី២។

សិក្ខាសាលានេះប្រព្រឹត្តទៅមានរយៈពេល ៣ថ្ងៃ ចាប់ពីថ្ងៃទី២៤ ដល់២៦ ខែមេសា ឆ្នាំ២០២៣ ដោយមានការចូលរួមពីថ្នាក់ដឹកនាំនាយកដ្ឋានបឋមសិក្សា នាយកដ្ឋានពាក់ព័ន្ធ អង្គការដៃគូ អ្នកសម្របសម្រួល លោកគ្រូ អ្នកគ្រូ ដែលជាគ្រូឧទ្ទេសថ្នាក់ជាតិសរុប ១៥២នាក់ ស្រី ៥៧នាក់។

សិក្ខាសាលានេះមានគោលបំណងឱ្យសិក្ខាកាម៖

– យល់ច្បាស់ពីខ្លឹមសារ វិធីសាស្រ្តបង្រៀន ការវាយតម្លៃក្នុងដំណើរការសិក្សា ដែលមាននៅក្នុង សៀវភៅណែនាំគ្រូ

– អនុវត្តវិធីសាស្ត្រ ល្បិចបង្រៀន និងយុទ្ធវិធីថ្មីៗ ដែលមានក្នុងសកម្មភាពតាមមេរៀននីមួយៗ ឱ្យមានប្រសិទ្ធភាព

– មានសមត្ថភាពប្រើប្រាស់កញ្ចប់សម្ភារគណិតវិទ្យាថ្នាក់ដំបូង សម្រាប់បំប៉នបន្តដល់គ្រូបង្រៀនថ្នាក់ទី២ ប្រកបដោយប្រសិទ្ធភាព។

ក្រោយពីបញ្ចប់សិក្ខាសាលានេះទៅ គ្រូឧទ្ទេសថ្នាក់ជាតិនឹងយកចំណេះដឹងដែលទទួលបានក្នុងវគ្គសិក្ខាសាលានេះ ទៅបំប៉នបន្តដល់គ្រូបឋមសិក្សានៅតាមសាលារៀន នៃខេត្តគោលដៅ៕