អ្នកកាសែតជាតិ-អន្តរជាតិជាង៥០នាក់ ចុះទស្សនកិច្ចសិក្សានៅក្រសួងបរិស្ថាន និងកំពង់ផែស្វយ័តភ្នំពេញ

នៅថ្ងៃទី២៧ ខែមេសានេះ រាជបណ្ឌិត្យសភាកម្ពុជាបានដឹកនាំអ្នកកាសែតជាតិ-អន្តរជាតិ ជាង៥០នាក់ មកពី៦ប្រទេសក្នុងតំបន់ទន្លេមេគង្គ ជាមួយនឹងមន្រ្តីផ្សេងៗទៀត ជួបសំណេះណាលជាមួយលោក សាយ សំអាល់ រដ្ឋមន្រ្តីក្រសួងបរិស្ថាន ជុំវិញបញ្ហានានានៅទន្លេមេគង្គ និងចុះទស្សនកិច្ចសិក្សានៅកំពង់ផែស្វយ័តភ្នំពេញ។

ក្រោមការដឹកនាំរបស់លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បានដឹកនាំអ្នកកាសែតជាតិ-អន្តរជាតិ ប្រមាណជាង ៥០នាក់ ដែលមកពីប្រទេសកម្ពុជា ចិន ថៃ វៀតណាម ឡាវ និងមីយ៉ាន់ម៉ា ជួបពិភាក្សា និងទស្សនកិច្ចតាមទីតាំងទាំងពីរខាងលើ។

ក្នុងវេទិការជួបជាមួយរដ្ឋមន្រ្តីក្រសួងបរិស្ថាន ជជែកទាក់ទងជាមួយនឹងបញ្ហាបរិស្ថាន និងតំបន់អភិរក្សនៅតាមតំបន់ទន្លេមេគង្គ ព្រមទាំងបើកឱកាសឱ្យអ្នកសារព័ត៌មានគ្រប់រូបមានឱកាសសួរជាសំណួរផ្សេងៗផងដែរ។

ឆ្លៀតក្នុងឱកាសនេះ លោក សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងថា ក្រសួងបានយកចិត្តទុកដាក់ និងអភិរក្សយ៉ាងច្រើននៅតំបន់ទន្លេមេគង្គ ព្រោះទន្លេមេគង្គពិតជាមានតម្លៃ និងសារសំខាន់ខ្លាំងណាស់សម្រាប់ពិភពលោក។ ក្រសួង ក៏បានសហការជាមួយក្រសួង និងស្ថាប័នផ្សេងៗក្នុងការអភិរក្សនៅតាមតំបន់ទន្លេមេគង្គដូចជាការអភិរក្សសត្វផ្សោត ឬ ដាំដើមឈើជាដើម។

លោករដ្ឋមន្ត្រីបានបន្ថែមថា ក្នុងនាមជារដ្ឋមន្ត្រីក្រសួងបរិស្ថាន លោកមានក្តីរីករាយក្នុងការសហការជាមួយរាជបណ្ឌិត្យសភាកម្ពុជា ក៏ដូចជាអ្នកសារព័ត៌មាន ចំពោះការធ្វើសិក្ខាសាលានាឱកាសក្រោយៗទៀតជុំវិញនឹងបញ្ហានានានៅតំបន់ទន្លេមេគង្គ។

បន្ទាប់ពីបញ្ចប់ជំនួបជាមួយរដ្ឋមន្ត្រីក្រសួងបរិស្ថាន សិក្ខាកាមក៏បានបន្តចុះទស្សនកិច្ចនៅកំពង់ផែស្វយ័តភ្នំពេញ។ ក្នុងដំណើរទស្សនកិច្ចនេះ ក៏មានជាការធ្វើបទបង្ហាញអំពីកំពង់ផែ ដោយលោកស្រី ហ៊ឺ ផានិន អគ្គនាយករងទទួលបន្ទុកអាជីវកម្ម/ប្រតិបត្តិការ នៃកំពុងផែស្វយ័តភ្នំពេញ ដើម្បីស្វែងយល់អំពីកំពង់ផែទន្លេ និងខ្សែសង្វាក់ផ្គត់ផ្គង់ថ្មីផងដែរ។ ជាមួយគ្នានោះក៏បានបើកឱកាសឱ្យមានការសួរសំណួរ និងចុះទស្សនាកំពង់ផែ។

គួរបញ្ចាក់ថា វិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បានរៀបចំសិក្ខាសាលាតំបន់មេគង្គលើកទី២ស្តីពី “ការចូលរួមរបស់ប្រព័ន្ធផ្សព្វផ្សាយដើម្បីតំបន់មេគង្គសន្តិភាព ស្ថេរភាព និងវិបុលភាព” ចាប់ពីថ្ងៃទី២៦ ដល់ថ្ងៃទី២៨ ខែមេសា ឆ្នាំ២០២៣។

ការចុះទស្សនកិច្ចសិក្សានេះ គឺជាថ្ងៃទី២ នៃសិក្ខាសាលានេះ។ ដោយឡែកសិក្ខាសាលាក៏មានសិក្ខាកាមជាអ្នកសារព័ត៌មានមកពី៦ប្រទេសតាមតំបន់មេគង្គដូចជា កម្ពុជា ថៃ ឡាវ វៀតណាម មីយ៉ាន់ម៉ា និងចិន ព្រមទាំងមន្ត្រីពាក់ព័ន្ធចំនួន ៧១នាក់ ចូលរួមជាមួយរាជបណ្ឌិត្យសភាកម្ពុជា៕

ដោយ៖ អុន ស្រីមាន