អភិបាលរងខេត្តស្វាយរៀង៖ តម្លៃនៃសន្តិភាព មានសារសំខាន់ក្នុងការអភិវឌ្ឍគ្រប់វិស័យ

(ស្វាយរៀង)៖ លោក  ប៉េង ពោធិ៍សា អភិបាលរងខេត្តស្វាយរៀង  បានអញ្ជើញក្នុងពិធីកាត់ឫសសីមា និងឆ្លងសមិទ្ធផលនានា នៅវត្តក្រសាំងជ្រំ ស្ថិតនៅក្នុងសង្កាត់សង្ឃ័រ ក្រុងស្វាយរៀង ខេត្តស្វាយរៀង នៅព្រឹកថ្ងៃទី០៩  ខែឧសភា  ឆ្នាំ២០២៣។

លោក  ប៉េង ពោធិ៍សា បានបញ្ជាក់ថា តម្លៃនៃសុខសន្តិភាពគឺមានសារៈសំខាន់ណាស់ក្នុងការអភិវឌ្ឍប្រទេស​ឲ្យរីកចម្រើនលើគ្រប់វិស័យ ហើយព្រះវិហារ និងសមិទ្ធផលនានា នៅវត្តក្រសាំងជ្រំ ក្រុងស្វាយរៀង ដែលធ្វើពិធីបញ្ចុះខណ្ឌសីមា និងឆ្លងនាពេលនេះ ក៏កើតចេញដោយសារតែប្រទេសមានសុខសន្តិភាពពេញលេញ ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលអនុញ្ញាត​ឲ្យប្រជាពលរដ្ឋ​អាចប្រារព្ធពិធីសាសនាទៅតាមបែបប្រពៃណីរៀងៗខ្លួន។

លោកក៏បានផ្តាំផ្ញើការសួរសុខទុក្ខពីសំណាក់សម្តេចកិត្តិសង្គហបណ្ឌិត ម៉ែន សំអន ប្រធានក្រុមការងារ​គណបក្សប្រជាជនកម្ពុជាចុះជួយខេត្តស្វាយរៀង និងលោក  ម៉ែន វិបុល អភិបាលខេត្ត ដែលជានិច្ចកាល​តែងតែគិតគូរអំពីសុខទុក្ខរបស់ប្រជាពលរដ្ឋនៅខេត្តស្វាយរៀង ហើយបានដោះស្រាយនូវទុក្ខលំបាក​នានាជូនប្រជាពលរដ្ឋបានទាន់ពេលវេលាផងដែរ។

ទន្ទឹមនេះលោក បានថ្លែងអំណរគុណដល់សប្បុរជនជិតឆ្ងាយដែលបានចូលរួមដោយទឹកចិត្តកសាងព្រះវិហារ និងសមិទ្ធផលនានានៅវត្តក្រសាំងជ្រំ ក្រុងស្វាយរៀង ឱ្យលេចជាសមិទ្ធផល រួចរាល់ជាស្ថាពរហើយរៀប​ចំពិធីបញ្ចុះខណ្ឌសីមា និងឆ្លងដែលមានការចូលរួមពីអាជ្ញាធរ ប្រជាពលរដ្ឋជាច្រើនកុះករផងដែរ។

លោក  បានថ្លែងអំពាវនាវឱ្យអាជ្ញាធរ មន្ត្រីរាជការគ្រប់លំដាប់ថ្នាក់នៅក្រុងស្វាយរៀងត្រូវបន្តបំពេញការងារ​ឲ្យកាន់តែមានប្រសិទ្ធភាពថែមទៀត ត្រូវអនុវត្តគោលនយោបាយភូមិឃុំមានសុវត្ថិភាពឱ្យមានប្រសិទ្ធភាពខ្ពស់ និងដោះស្រាយសេវាសាធារណៈផ្សេងៗជូនប្រជាពលរដ្ឋឲ្យមានតម្លាភាព និងគណនេយ្យភាព ជាពិសេសត្រូវចុះឲ្យដល់​មូលដ្ឋានជាក់ស្ដែងក្តាប់ឲ្យច្បាស់លាស់ពីកង្វះខាត សំណូមពរផ្សេងៗ ដែលប្រជាពលរដ្ឋនៅមូលដ្ឋានត្រូវការជាចាំបាច់ ដើម្បីរួមចំណែកកាត់បន្ថយការលំបាក ភាពក្រីក្រ និងជួយលើកកម្ពស់ ជីវភាព រស់នៅរបស់ពួកគាត់ឲ្យកាន់​តែល្អប្រសើរឡើងថែមទៀត។

នៅក្នុងឱកាសនោះ  លោក និងក្រុមការងារ ក៏បាននាំនូវបច្ច័យចំនួន៥លានរៀល ប្រគេនដល់វត្តក្រសាំងជ្រំផងដែរ៕ ដោយ:ភក្ដី