កីឡាករសិង្ហបុរីម្នាក់ សុំមិត្តស្រីរៀបការក្រោយទទួលបានមេដាយសំរឹទ្ធ កីឡាស៊ីហ្គេមនៅកម្ពុជា

កីឡាករទ្រីយ៉ាត្លុងរបស់សង្ហបុរី​ Bryce Chong បានសុំមិត្តស្រីដែលទាក់ទងគ្នាជាច្រើនឆ្នាំរៀបការ នៅឆ្នេរកែប ប្រទេសកម្ពុជា បន្ទាប់ពីទទួលបានមេដាយសំរឹទ្ធនៅក្នុងការប្រគួតកីឡាស៊ីហ្គេមលើកទី៣២។

សារព័ត៌មាន​The Strait Time បានឲ្យដឹងថា កីឡាករទ្រីយ៉ាត្លុងរបស់សង្ហបុរី Bryce Chong មានវ័យ២៦ឆ្នាំរូបនេះ បានលុតជង្គង់នៅមុខមិត្តស្រីរបស់គាត់ដែលមានឈ្មោះថា Shery Foo ដើម្បីសុំរៀបការ បន្ទាប់ពីចប់ការប្រកួតមិនប៉ុន្មានម៉ោង នៅឆ្នេរកែបរបស់ប្រទេសកម្ពុជា។​ ដំបូងឡើយ លោកចង់សុំមិត្តស្រីរៀបការនៅកន្លែងប្រារព្ធពិធីទទួលមេដាយ ប៉ុន្តែ មានមនុស្សច្រើនពេក ទើបលោកមកសុំមិត្តស្រីរបស់ខ្លួនរៀបការនៅឯឆ្នេរកែបវិញ។ ចំណែក មិត្តស្រីរបស់លោក ក៏បានឆ្លើយ”យល់ព្រម”ចំពោះការសុំរៀបការរបស់លោក Bryce Chong យ៉ាងរីករាយបំផុត។

គួរជម្រាបថា Bryce Chong ទទួលបានមេដាយសំរឹទ្ធដំបូងសម្រាប់ប្រទេសសិង្ហបុរីក្នុងព្រឹត្តិការណ៍ស៊ីហ្គេមឆ្នាំ២០២៣ លើវិញ្ញាសា អាគ័រត្លុង(Aquathlon) ផ្នែកបុរសកាលពីព្រឹកថ្ងៃសៅរ៍ (៦ ឧសភា) ខណៈដែលកីឡាករូបនេះ បានបញ្ចប់ក្នុងចំណាត់ថ្នាក់លេខ៥ លើវិញ្ញាសាទ្រីយ៉ាត្លុងកាលពីថ្ងៃចន្ទ៕