រដ្ឋមន្ត្រីក្រសួងអប់រំ បន្តអំពាវនាវឲ្យប្រជាពលរដ្ឋត្រូវចេះថែរក្សាសុខភាពឲ្យបានល្អថែមទៀត

លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអំពាវនាវដល់ប្រជាពលរដ្ឋទាំងអស់ត្រូវចេះថែរក្សាសុខភាពខ្លួនឯងឲ្យល្អថែមទៀតដោយហូបស្អាត ផឹកស្អាត និងរស់នៅស្អាត និងបន្តយកចិត្តទុកដាក់ បង្ការនូវជំងឺឆ្លងផ្សេងៗ ជាពិសេស គឺបង្ការសុខភាពពីការរីករាលដាលនៃជំងឺកូវីដ-១៩ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវនេះធ្វើឡើងនៅក្នុងអំឡុងពេលក្រុមការងាររបស់លោកចុះទៅពិនិត្យ និងព្យាបាលជំងឺដោយឥតគិតថ្លៃជូនប្រជាពលរដ្ឋក្នុងស្រុកកងមាស កាលពីថ្ងៃទី២៨ ខែឧសភា ឆ្នាំ​២០២៣។ ការចុះពិនិត្យ ព្យាបាលនេះ ត្រូវបានដឹកនាំដោយលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាប្រធានក្រុមការងារថ្នាក់ជាតិចុះជួយស្រុកកងមាស អមដំណើរដោយលោក ហាន កុសល តំណាងលោក អ៊ុន ចាន់ដា អភិបាលខេត្តកំពង់ចាម តំណាងក្រុមគ្រូពេទ្យស្ម័គ្រចិត្ត និងលោក លោកស្រី មកពីភាគីពាក់ព័ន្ធទាំងអស់បានចូលរួម។

លោករដ្ឋមន្ត្រី​ ក្រសួងអប់រំ បានថ្លែងអំណរគុណដល់ឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្ត ដែលបានខិតខំកៀរគរថវិកា និងចាត់បញ្ជូនក្រុមការងារគ្រូពេទ្យស្ម័គ្រចិត្ត ចុះបំពេញបេសកកម្មមនុស្សធម៌ក្នុងការជួយពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃ នៅក្នុងស្រុកកងមាសនេះ ក៏ដូចជា នៅទូទាំងប្រទេសផងដែរ។ ទាំងអស់នេះ ជាសកម្មភាពមនុស្សធម៌ ដ៏ឧត្តុងឧត្តម និងបានរួមចំណែក ជាមួយរាជរដ្ឋាភិបាលកម្ពុជាក៏ដូចជាអាជ្ញាធរដែនដីក្នុងស្រុកកងមាស ដែលបាននឹងកំពុងយកចិត្តទុកដាក់យ៉ាងខ្លាំង ក្នុងគោលដៅអនុវត្តយុទ្ធសាស្ត្រនៃការលើកកម្ពស់សុខភាពប្រជាជន និងអាហារូបត្ថម្ភ ដើម្បីគាំទ្រដល់ការអភិវឌ្ឍធនធានមនុស្ស កំណើនសេដ្ឋកិច្ច និងវឌ្ឍនភាពសង្គមប្រកបដោយចីរភាព។

សកម្មភាពទាំងអស់នេះបានសរបញ្ជាក់ឲ្យឃើញពីការយកចិត្តទុកដាក់ខ្ពស់ពីថ្នាក់ដឹកនាំ ចំពោះសុខទុក្ខ និងសុខភាពប្រជាពលរដ្ឋទូទៅ ព្រោះសុខភាព គឺជាកត្តាចម្បងដែលប្រជាពលរដ្ឋអាចមានលទ្ធភាពប្រកបរបររកស៊ីចិញ្ចឹមជីវិតបាន ធ្វើឲ្យសេដ្ឋកិច្ចសង្គម ក៏ដូចជា សេដ្ឋកិច្ចគ្រួសារមានកំណើនជាបន្តបន្ទាប់ នៅក្នងឱកាសដែលប្រជាពលរដ្ឋកំពុងរស់ក្នុងសុខសន្តិភាពពេញលេញ៕