ព័ត៌មានជាតិ

ប្រាប់គន្លឹះ មុនស៊ីញេកិច្ចសន្យាខ្ចីលុយពីធនាគារ ត្រូវប្រយ័ត្នអីខ្លះ?

បានផុស

៣ years មុន

នៅ

ថ្ងៃអង្គារ ៦ មិថុនា ២០២៣

ដោយ

ពេលដែលអ្នកសម្រេចចិត្តខ្ចីលុយពីធនាគារមិនថាដើម្បីប្រើប្រាស់ផ្ទាល់ខ្លួន និងពង្រីកមុខរបរ អ្នកត្រូវប្រាកដថារាល់ឯកសារផ្សេងៗមុនចុះហត្ថលេខាត្រូវបានពិនិត្យយ៉ាងហ្មត់ចត់ ហើយក៏ត្រូវចេះជជែកចរចាដើម្បីទទួលបានលក្ខខណ្ឌល្អ។

លោក ម៉ី វាសនា នាយកប្រតិបត្តិប្រាក់កម្ចីនៃធនាគារប្រៃសណីយ៍កម្ពុជាបានកត់សម្គាល់ថា ពលរដ្ឋមួយចំនួនពេលទៅខ្ចីលុយធនាគារ ហាក់ធ្វេសប្រហែសមិនសូវពិនិត្យទៅលើកិច្ចសន្យាឲ្យបានគ្រប់ជ្រុងជ្រោយ ដែលអាចនាំផលវិបាកទៅថ្ងៃក្រោយ។ ការសិក្សាឲ្យច្បាស់ពីកិច្ចសន្យា ដើម្បីទទួលបានការការពារ និងកាត់បន្ថយភាពប្រឈមដែលកើតឡើង។

លោកក្រើនរំលឹកឲ្យប្រុងប្រយ័ត្នមិនមែនឲ្យតែគេឲ្យខ្ចី ស៊ីញេមិនបានមើលមុខមើលក្រោយ។

លោកបានលើកឡើងករណីជាក់ស្ដែងដូចជាការដំឡើងការប្រាក់។ ថ្មីៗនេះធនាគារមួយចំនួនបានប្រកាសដំឡើងអត្រាការប្រាក់ទាំងអតិថិជនចាស់និងអតិថិជនថ្មី។

ត្រង់ចំណុចនេះ លោកបានរំលឹកក្នុងកិច្ចសន្យាមុនស៊ីញេត្រូវតែពិនិត្យមានការកំណត់ចងយ៉ាងណា។ បើសិនមានការដំឡើងអត្រាការប្រាក់ថ្មីក្នុងកាលៈទេសៈណាមួយ ប៉ះពាល់ដល់អតិថិជនចាស់លើអត្រាការប្រាក់មុនដែរឬទេ។

មួយទៀតករណីអតិថិជនស្នើបង់ផ្តាច់។ ធនាគារខ្លះផាកពិន័យលើចំនួនទឹកប្រាក់ដែលនៅសល់ តែក៏មានករណីគឺគេពិន័យទៅលើចំនួនទឹកប្រាក់បញ្ចេញដើមដំបូង។

«ឧទាហរណ៍អតិថិជនខ្ចី ១០ ម៉ឺនដុល្លារ ក្នុងកិច្ចសន្យាបញ្ជាក់បើករណីអតិថិជនស្នើបង់ផ្តាច់មុនកាលកំណត់ ត្រូវពិន័យ ៣%។ ត្រង់នេះត្រូវប្រាកដពិន័យ ៣% ហ្នឹងទៅលើប្រាក់ដើម ១០ ម៉ឺនដែលបានខ្ចីដំបូង ឬចំនួនដែលនៅសល់ឧទាហរណ៍បើយើងបង់បាន ៥ ម៉ឺន។ ត្រង់ចំណុចហ្នឹងត្រូវបញ្ជាក់ឲ្យច្បាស់»។

លោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជាក៏ចូលរួមរំលែកបទពិសោធន៍ដល់អតិថិជនមុនប្រើប្រាស់សេវាកម្ចីគ្រឹះស្ថានឥណទានណាមួយ ត្រូវចេះប្រៀបធៀបចេះតថ្លៃ ដើម្បីទទួលបានលក្ខខណ្ឌល្អ។

លោកណែនាំឲ្យចេះសិក្សាប្រៀបធៀបអត្រាការប្រាក់ រយៈពេលសង លក្ខខណ្ឌកម្ចី ការផាកពិន័យផ្សេងៗ មុនដាក់ស្នើទៅគ្រឹះស្ថានណាមួយ។ អត្រាការប្រាក់ធនាគារមួយចំនួនថោកមែន តែក៏ភ្ជាប់លក្ខខណ្ឌដូចតម្រូវឲ្យមានប្លង់រឹង ហើយអចលនទ្រព្យនោះសោតត្រូវស្ថិតនៅក្នុងតំបន់ប្រជុំជនឬក្នុងទីក្រុង។

ជាមួយគ្នានេះលោកបានលើកពីការចំណាយបន្ថែមផ្សេងៗរបស់អតិថិជនពីសេវារបស់ធនាគារដូចជា ថ្លៃមេធាវី ថ្លៃវាយតម្លៃអចលនទ្រព្យ ថ្លៃសេវាឥណទាន (Loan Fee) និងធនាគារខ្លះគិតថ្លៃសេវាសារការីទៀត។ តែបើអតិថិជនចេះចរចា ការចំណាយបន្ថែមទាំងនេះអាចទទួលបានការលើកលែង និងអនុគ្រោះបានខ្លះដែរ។

លោកក្រើនរំលឹកឲ្យប្រុងប្រយ័ត្ន កុំគិតឲ្យតែបានលុយផ្តិតមេដៃប្រយ័ត្នកិច្ចសន្យាចងជាប់ពិបាកដោះស្រាយ៕