សេដ្ឋកិច្ច

គម្រោង WCAD រួមចំណែកគាំទ្រផ្នែកហិរញ្ញវត្ថុផ្គត់ផ្គង់ទឹកស្អាត-អនាម័យ សរុប ២៧៩ លានដុល្លារ

បានផុស

១០ ខែ មុន

នៅ

ថ្ងៃពុធ ១៧ កញ្ញា ២០២៥

ដោយ

លោកស្រី ឌិត នីតា ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានគូសបញ្ជាក់ឱ្យដឹងថាចាប់តាំងពីដំណាក់កាលសាកល្បងក្នុងឆ្នាំ២០១៧ រហូតដល់ការដាក់ឱ្យអនុវត្តយ៉ាងពេញលេញ គម្រោង WCAD បានចូលរួមចំណែកជួយគាំទ្រផ្នែកហិរញ្ញវត្ថុសម្រាប់ការផ្គត់ផ្គង់ទឹកស្អាត និងអនាម័យជាមួយនឹងសមតុល្យឥណទានសរុបចំនួន ២៧៩ លានដុល្លារ ដល់ប្រជាពលរដ្ឋកម្ពុជាចំនួនជាង ២,១លាននាក់ ជាមួយនឹងឥណទានសរុបជាង ៤៦៨.០០០ គណនី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំ WATER CREDIT PARTNERS MEETING ក្រោមប្រធានបទ “Flowing Together: Financing Sustainable Solutions for Water and Sanitation” នាថ្ងៃទី១៦ ខែកញ្ញា ឆ្នាំ២០២៥ នាទីក្រុងម៉ានីល ប្រទេស ហ្វីលីពីន លោកស្រី ឌិត នីតា បានលើកឡើងពីផលជះជាវិជ្ជមានក៏ដូចជាការចូលរួមចំណែកដ៏សំខាន់របស់គម្រោង WCAD ក្នុងកិច្ចការជំរុញលទ្ធភាពទទួលបានឥណទានសម្រាប់ការផ្គត់ផ្គង់ទឹកស្អាត និងអនាម័យដល់ប្រជាពលរដ្ឋមូលដ្ឋានក្នុងសហគមន៍ ជាពិសេសប្រជាពលរដ្ឋនៅតំបន់ដាច់ស្រយាល។

លោកស្រី បានសង្កត់ធ្ងន់ថា “ចាប់តាំងពីគម្រោង WCAD បានផ្តួចផ្តើមឡើងតាំងពីដំណាក់កាលសាកល្បងក្នុងឆ្នាំ២០១៧ រហូតដល់ការដាក់ឱ្យអនុវត្តយ៉ាងពេញលេញ គម្រោងនេះបានចូលរួមចំណែកជួយគាំទ្រផ្នែកហិរញ្ញវត្ថុសម្រាប់ការផ្គត់ផ្គង់ទឹកស្អាត និងអនាម័យជាមួយនឹងសមតុល្យឥណទានសរុបចំនួន ២៧៩ លានដុល្លារ ដល់ប្រជាពលរដ្ឋកម្ពុជាចំនួនជាង ២,១ លាននាក់ ជាមួយនឹងឥណទានសរុបជាង ៤៦៨.០០០ គណនី”។

លោកស្រី ក៏បានរំលេចដែរថា គម្រោង WCAD មិនត្រឹមតែជាផលិតផល ឬសេវាកម្មហិរញ្ញវត្ថុប៉ុណ្ណោះទេ ប៉ុន្តែគម្រោងនេះគឺស្ពានចម្លងសម្រាប់ប្រជាពលរដ្ឋដើម្បីទទួលបាននូវសុខមាលភាពល្អប្រសើរ អនាម័យ ការអប់រំ និងឱកាស ដែលយើងអាចឃើញផលជះទាំងនេះនៅប្រទេសកម្ពុជា។

គួរបញ្ជាក់ថា គម្រោងឥណទានទឹកស្អាតនិងអនាម័យ (WCAD) ដែលជាគំនិតផ្តួចផ្តើមរបស់សមាគមមីក្រូហិរញ្ញវត្ថុកម្ពុជា និងទទួលបានការគាំទ្រថវិការពីអង្គការ Water.org មានគោលបំណងលើកកម្ពស់បរិយាបន្នហិរញ្ញវត្ថុតាមរយៈការជំរុញនូវលទ្ធភាពទទួលបានហិរញ្ញប្បទានសម្រាប់សេវាទឹកស្អាត និងអនាម័យក្នុងចំណោមប្រជាពលរដ្ឋកម្ពុជាជាពិសេសនៅតំបន់ដាច់ស្រយាល។

សូមជម្រាបថា កិច្ចប្រជុំដែលត្រូវបានរៀបចំឡើងដោយអង្គការ Water.Org មានគោលបំណងចូលរួមលើកកម្ពស់កិច្ចសហប្រតិបត្តិការរួមគ្នារវាងភាគីពាក់ព័ន្ធ ជាពិសេសដៃគូដែលបានចូលរួមក្នុងគម្រោងឥណទានទឹកស្អាត និងអនាម័យ (WCAD) ក៏ដូចជាចែករំលែកនូវចំណេះដឹង បទពិសោធល្អៗ ព្រមទាំងឧត្តមាននុវត្តន៍ពាក់ព័ន្ធនឹងការអនុវត្តគម្រោង WCAD។

កិច្ចប្រជុំដដែលនេះ ក៏នឹងផ្តល់នូវកាលានុវត្តភាពដ៏ល្អដល់សិក្ខាកាមដើម្បីសិក្សាស្វែងយល់កាន់តែស៊ីជម្រៅពាក់ព័ន្ធនឹងផលជះ និងការពង្រីកវិសាលភាពនៃការអនុវត្តគម្រោង WCAD ព្រមទាំងឈ្វេងយល់អំពីនិន្នាការ និងឱកាសនានា សំដៅធានាបាននូវការលើកកម្ពស់បរិយាបន្នហិរញ្ញវត្ថុ និងលទ្ធភាពទទួលបានទឹកស្អាត និងអនាម័យចំពោះប្រជាពលរដ្ឋនៅសហគមន៍បានកាន់តែល្អប្រសើរ៕