ព័ត៌មានជាតិ

សម្ដេច ម៉ែន សំអន ៖ ថែរក្សាឲ្យបានដាច់ខាតនូវសុខសន្តិភាពដែលជាមូលដ្ឋានគ្របដណ្ដប់ចម្បងបំផុត ដើម្បីធានាបាននូវក្ដីសង្ឃឹម

បានផុស

៣ years មុន

នៅ

ថ្ងៃព្រហស្បតិ៍ ៨ មិថុនា ២០២៣

ដោយ

សម្ដេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងថា កត្តាសំខាន់គឺថែរក្សាឲ្យបានដាច់ខាតនូវសុខសន្តិភាព ដែលជាមូលដ្ឋានគ្របដណ្ដប់ចម្បងបំផុត ដើម្បីធានាបាននូវក្តីសង្ឃឹម និងឱកាសប្រកបដោយនិរន្តរភាពក្នុងការអភិវឌ្ឍសង្គមជាតិលើគ្រប់វិស័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈអញ្ជើញក្នុងពិធីសម្ពោធអគារសិក្សា ១ ខ្នង កម្ពស់ ៣ ជាន់ ២០ បន្ទប់ មានទីតាំងស្ថិតក្នុងអនុវិទ្យាល័យ និងបឋមសិក្សាផ្ទះកណ្ដាល ស្រុកស្រីសន្ធរ ខេត្តកំពង់ចាម កាលពីព្រឹកថ្ងៃព្រហស្បតិ៍ ៥ រោច ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី ៨ ខែមិថុនា ឆ្នាំ ២០២៣។

សម្ដេចកិត្តិសង្គហបណ្ឌិត បានពាំនាំនូវការផ្ដាំផ្ញើសាកសួរសុខទុក្ខពីសំណាក់ សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដោយក្ដីនឹករលឹក និងការគិតគូរអំពីសុខទុក្ខប្រជាពលរដ្ឋនៅទូទាំងប្រទេស។

សម្ដេចកិត្តិសង្គហបណ្ឌិត បានសម្ដែងនូវការអបអរសាទរចំពោះសមិទ្ធផលដែលបន្តកើតមាននៅក្នុងអនុវិទ្យាល័យ និងបឋមសិក្សាផ្ទះកណ្ដាល ក្រោមកម្លាំងសាមគ្គីធម៌របស់ឧកញ៉ា ស៊ុយ សុផាន និងលោក តាំង គឹមថុង ព្រមទាំងក្រុមគ្រួសារ ក្នុងការចូលរួមចំណែកអភិវឌ្ឍន៍វិស័យអប់រំនៅក្នុងស្រុកស្រីសន្ធរ ដែលបានចំណាយថវិកាសាងសង់អស់ជិត ៤០ ម៉ឺនដុល្លារ។ ជាមួយគ្នានេះ ក៏សូមសម្ដែងនូវការរឭកនឹកគុណ និងឧទ្ទិសបុណ្យកុសល ជូនដល់វិញ្ញាណក្ខន្ធរបស់ឧកញ៉ា ស៊ុយ សុផាន ដែលបានខិតខំជួយកសាងសមិទ្ធផលយ៉ាងច្រើនសន្ធឹកសន្ធាប់សម្រាប់បន្សល់ទុកជាកេរដំណែលដល់សិស្សានុសិស្សជំនាន់ក្រោយៗទៀត។

សម្ដេចកិត្តិសង្គហបណ្ឌិត បានរំលេចផងដែរថា រាជរដ្ឋាភិបាល ដែលដឹកនាំដោយ សម្ដេចអគ្គមហាសេនាបតីតេជោ ហ៊ុន សែន តែងបានផ្ដល់អាទិភាពដល់វិស័យអប់រំ ហើយក៏នឹងបន្តខិតខំអភិវឌ្ឍន៍វិស័យនេះជាមួយនឹងចក្ខុវិស័យច្បាស់លាស់ ឆ្ពោះទៅអនាគតមួយដ៏ភ្លឺត្រចះត្រចង់ ដើម្បីបង្កើតឱកាសសិក្សារៀនសូត្រឲ្យបានទូលំទូលាយ និងប្រកបដោយគុណភាព សំដៅធានាបាននូវការរីកចម្រើនរុងរឿងជូនសង្គមគ្រួសារ និងប្រទេសជាតិ។ យ៉ាងណាមិញ មូលដ្ឋានគ្រឹះចម្បង នៃដំណើរផ្លូវនេះ គឺការថែរក្សាឲ្យបានដាច់ខាតនូវសុខសន្តិភាព ដែលជាកត្តាគ្របដណ្ដប់ចម្បងបំផុត ដើម្បីធានាបាននូវក្តីសង្ឃឹម និងឱកាសប្រកបដោយនិរន្តរភាពក្នុងការអភិវឌ្ឍសង្គមជាតិ លើគ្រប់វិស័យ។

សម្ដេចកិត្តិសង្គហបណ្ឌិត ម៉ែន សំអន ក៏សូមអគុណចំពោះប្រជាពលរដ្ឋនៅក្នុងខេត្តកំពង់ចាម រួមទាំងអ្នកស្រុកស្រីសន្ធរនេះផ្ទាល់ ដែលតែងជឿជាក់លើរាជរដ្ឋាភិបាល និងការចូលរួមក្នុងការថែរក្សា សុខសន្តិភាព និងស្ថិរភាពរបស់ប្រទេសជាតិយើង ជាពិសេសតាមរយៈការជ្រើសរើសមេដឹកនាំត្រឹមត្រូវ គឺ សម្ដេចតេជោ ដែលជាមេដឹកនាំប្រកបដោយធម៌ ព្រមជាមួយនឹងសមត្ថភាព ស្នាដៃ និង បទពិសោធន៍យ៉ាងច្រើនលើសលប់នៅក្នុងការដឹកនាំប្រកបដោយការទទួលខុសត្រូវ ម៉ឺងម៉ាត់ទាំងក្នុងដំណាក់កាលជួបគ្រោះវិបត្តិ និងក្នុងកិច្ចការកសាង និងអភិវឌ្ឍន៍ជាតិឲ្យរុងរឿងថ្កើងថ្កានទៅមុខ៕

អត្ថបទ ៖ វិមាន