ព័ត៌មានជាតិ

មន្ត្រីជាន់ខ្ពស់អប់រំ ៖ ការអប់រំស្ទែមជំរុញឱ្យសិស្សមានគំនិតច្នៃប្រឌិត និងចេះបង្កើតនូវអ្វីថ្មីៗ

បានផុស

១០ ខែ មុន

នៅ

ថ្ងៃសៅរ៍ ១០ មិថុនា ២០២៣

ដោយ

មន្ត្រីជាន់ខ្ពស់ក្រសួងអប់រំយុវជននិងកីឡាបានអះអាងថា ការអប់រំស្ទែមបានជំរុញឱ្យសិស្សមានគំនិតច្នៃប្រឌិត បង្កើតពហុគំនិត និងចេះបង្កើតនូវអ្វីថ្មីៗដើម្បីចូលរួមចំណែកក្នុងការអភិវឌ្ឍប្រទេសឱ្យកាន់តែរីកចំរើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបើកវគ្គបណ្ដុះបណ្ដាលស្ដីពី “ការរៀន និងបង្រៀនស្ទែមនៅមធ្យមសិក្សាទុតិយភូមិ”នៅថ្ងៃទី១០ មិថុនា នេះ នៅមជ្ឈមណ្ឌលគរុកោសល្យភូមិភាគ ខេត្តតាកែវ លោក ថោង បូរ៉ាន់ អនុរដ្ឋលេខាធិការក្រសួងអប់រំ យុវជន និងកីឡា និងជានាយករងគម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២ (USESDP-II)បានមានប្រសាសន៍ថាការអប់រំស្ទែមនឹងធ្វើឱ្យប្រសើរឡើងនូវគុណភាព ការវាយតម្លៃលើការអនុវត្ត លទ្ធផលតេស្តរបស់សិស្សនៅកម្រិតសាលារៀន និងជំរុញឱ្យសិស្សចង់រៀនព្រមទាំង ជួយឱ្យពួកគេ មាន លទ្ធភាពអភិវឌ្ឍន៍ មានគំនិតច្នៃប្រឌិត បង្កើតពហុគំនិត មានអន្តរកម្មឥតឈប់ឈរ បង្កើនការ រិះគិតស៊ីជម្រៅ ចេះបង្កើតថ្មីដោយខ្លួនឯង និងមានសមត្ថភាពចូលរួមប្រកួតប្រជែងលើមុខវិជ្ជាគណិតវិទ្យា និង វិទ្យាសាស្ត្រ នៃកម្មវិធីអន្តរជាតិ PISA ។

លោកបានបន្តទៀតថា វិស័យនីមួយៗខាងលើនេះ មានទិសដៅ និងផ្តល់សារៈសំខាន់ ទៅលើវត្ថុបំណងខុសៗគ្នា និងជាវិស័យដែលកម្ពុជាយើងកំពុងត្រូវការចាំបាច់ ក្នុងការប្រែក្លាយទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសជឿនលឿននៅឆ្នាំ២០៥០ ពោល គឺជា ប្រទេសអ្នកផលិត។

លោកអនុរដ្ឋលេខាធិការ ក៏បានថ្លែងអំណរគុណដល់គ្រប់ភាគីពាក់ព័ន្ធទាំងអស់ដែលបានចូលរួមរៀបចំវគ្គបណ្តុះណ្តាលនេះឡើង ជាពិសេសការគាំទ្រពីធនាគារអភិវឌ្ឍន៍អាស៊ីក្រោមការអនុវត្តគម្រោង USESDP-II ដែលធ្វើការការអប់រំផ្នែកវិទ្យាសាស្ត្រ និងបច្ចេកវិទ្យា បានរីកចម្រើនទៅមុខ ចូលរួមយ៉ាងសំខាន់នៃកំណែទម្រង់វិស័យអប់រំ យុវជន និងកីឡា ស្របតាមបរិវត្តកម្មអប់រំក្នុងបរិបទសាកលផងដែរ៕

អត្ថបទ៖ សំអឿន