ព័ត៌មានជាតិ

លោក ហ៊ុន ម៉ាណែត ទទួលជំនួយឧបត្ថម្ភពីសមាគមស្បែកជើងកម្ពុជា ដើម្បីជួយសង្គ្រោះពលរដ្ឋ

បានផុស

៥ years មុន

នៅ

ថ្ងៃសុក្រ ៣០ តុលា ២០២០

ដោយ

នៅថ្ងៃទី៣០ ខែតុលា ឆ្នាំ២០២០ លោកឧកញ៉ា លី ឃុនថៃ ប្រធានសមាគមស្បែកជើងកម្ពុជា បានដឹកនាំអនុប្រធាន និងគណៈកម្មការសមាគម ជួបសម្ដែងការគួរសមជាមួយ លោក ហ៊ុន ម៉ាណែត ដោយនាំយកអំណោយរបស់សមាគមរួមមាន មី២១៦៦កេស ទឹកបរិសុទ្ធ៦០០កេស និងស្បែកជើង២០០កេស ជូនដល់កងទ័ពជើងគោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ដើម្បីចូលរួមចំណែកជួយដល់កងទ័ពជើងគោកក្នុងយុទ្ធនាការដោះស្រាយការងារជួយសង្គ្រោះប្រជាពលរដ្ឋនៅតាមមូលដ្ឋានទូទាំងប្រទេស ដែលកំពុងរងគ្រោះដោយទឹកជំនន់។

លោកប្រធានសមាគម បានលើកឡើងថា ដោយមើលឃើញយុទ្ធនាការជួយជនរងគ្រោះដោយសារទឹកជំនន់រហ័សទាន់ពេលវេលា ក្រោមការដឹកនាំរបស់មេបញ្ជាការកងទ័ពជើងគោក សមាគម ព្រមទាំងអ្នកវិនិយោគនៅក្នុងប្រទេសកម្ពុជា បានចូលរួមចំណែកឧបត្ថម្ភគាំទ្រចំពោះកងទ័ព ដើម្បីជួយសង្គ្រោះប្រជាជនឲ្យបានទាន់ពេលវេលា។ លោកបន្តថា នេះគឺជាទឹកចិត្ត និងការថ្លែងអំណរគុណរបស់សមាគមស្បែកជើងកម្ពុជា ចំពោះកងទ័ព ដែលតែងតែឃើញកងទ័ពនៅជួរមុខជានិច្ច និងតែងចុះជួយសង្គ្រោះប្រជាពលរដ្ឋរាល់ពេលមានគ្រោះមហន្តរាយផ្សេងៗ។

លោក ហ៊ុន ម៉ាណែត បានថ្លែងអំណរគុណចំពោះទឹកចិត្តសប្បុរសធម៌ និងការចូលរួមគាំទ្រដ៏ថ្លៃថ្លាបំផុតចំពោះ លោកឧកញ៉ា លី ឃុនថៃ ប្រធានសមាគមស្បែកជើងកម្ពុជា និងគណៈកម្មការទាំងអស់ដែលបានចូលរួមឧបត្ថម្ភអំណោយជួយដល់កងទ័ព ដើម្បីសង្គ្រោះប្រជាជននៅក្នុងគ្រាដ៏លំបាកនេះ៕