ខណ្ឌមានជ័យ សហការ មន្ទីរសាធារណការរាជធានី​ ស្តារ និងបូមលូជាច្រើនខ្សែ

អនុវត្តតាមការណែនាំរបស់ លោក ឃួង ស្រេង អភិបាលរាជធានីភ្នំពេញ នៅព្រឹកថ្ងៃទី៦ ខែកក្កដា ឆ្នាំ២០២៣នេះ អាជ្ញាធរខណ្ឌមានជ័យ បានសហការជាមួយ ក្រុមការងារនៃមន្ទីរសាធារណការ និងដឹកជញ្ជូន រាជធានីភ្នំពេញ​ ធ្វើការស្តារ និងបូមលូនៅតាមដងផ្លូវជាច្រើនខ្សែនៅក្នុងភូមិសាស្ត្រ សង្កាត់បឹងទំពុនទី១ ខណ្ឌមានជ័យ ដើម្បីកាត់បន្ថយឱ្យបាន នូវភាពលិចលង់លំនៅដ្ឋានប្រជាពលរដ្ឋដោយជំនន់ទឹកភ្លៀង។

លោក សៅ សារុំ សមាជិកក្រុមប្រឹក្សាសង្កាត់បឹងទំពុនទី១ និង លោក ទឹម ម៉ន មេភូមិសន្សំកុសលទី៤ សង្កាត់បឹងទំពុនទី១ ខណ្ឌមានជ័យបានឱ្យដឹងស្រដៀងគ្នាថា ប្រព័ន្ធលូនៅតាមបណ្តោយផ្លូវបេតុងលេខ៣១BT, ១២BT, ១៦BT ក្នុងភូមិសាស្ត្រ សង្កាត់បឹងទំពុនទី១ ខណ្ឌមានជ័យ ទឹកមិនអាចហូរនោះទេ ពោលគឺនៅពេលភ្លៀងម្តងៗ តែងតែ​លិច​លង់។ ជាក់ស្តែងនាប៉ន្មានថ្ងៃកន្លងមកនេះ ភ្លៀងបានបង្អុរឡើងយ៉ាងខ្លាំង បណ្តាលឱ្យតំបន់បឹងទំពុនទទួលរងការលិច​លង់យ៉ាងខ្លាំង។ ដោយមានការណែនាំពី លោក ឃួង ស្រេង អភិបាលរាជធានីភ្នំពេញ រដ្ឋបាលខណ្ឌមានជ័យ សហការជាមួយមន្ទីរសាធារណការ និងដឹកជញ្ជូន រាជធានីភ្នំពេញ​ ធ្វើសកម្មភាពបូមទឹកចេញភ្លាមៗរហូតស្រកអស់ពីក្នុងមូលដ្ឋាន។

ដោយឡែកសម្រាប់ប្រព័ន្ធលូ នៅតាមបណ្តោយផ្លូវបេតុងលេខ៣១BT, ១២BT, ១៦BT ក្នុងភូមិសាស្ត្រ សង្កាត់បឹងទំពុនទី១នេះ បើទោះបីទឹកហូរអស់ពីផ្លូវ និងពីក្នុងផ្ទះក្តី ក៏បណ្តាញលូខាងលើនៅស្ទះដែរ។ ដោយមើលឃើញពីបញ្ហាប្រឈមនេះ រដ្ឋបាលខណ្ឌមានជ័យ អនុវត្ត តាមការណែនាំរបស់ លោក ឃួង ស្រេង អភិបាលរាជធានី បានធ្វើសហការជាមួយមន្ទីរសាធារណការ និងដឹកជញ្ជូន រាជធានីភ្នំពេញ​ ស្តារ និងបូមលូនៅតាមដងផ្លូវជាច្រើនខ្សែ និងក្នុងភូមិសាស្ត្រ សង្កាត់បឹងទំពុនទី១ និងទី២ តែម្តង។

លោក សៅ សារុំ បានបញ្ជាក់ថា ប្រព័ន្ធលូ នៅតាមបណ្តោយផ្លូវបេតុងលេខ៣១BT, ១២BT, ១៦BT មានតួនាទីយ៉ាងសំខាន់ក្នុងការនាំទឹកទៅប្រឡាយបឹងទំពុន មុននឹងហូរទៅដល់ស្ថានីយបូមទឹកបឹងទំពុន។ បើប្រពន្ធ័លូទាំងនេះស្ទះហើយ គឺពិតណាស់ នៅពេលមានភ្លៀងធ្លាក់ម្តងៗ តំបន់នេះត្រូវលិចលង់។ ដូច្នេះទើបអាជ្ញាធររាជធានីភ្នំពេញណែនាំឱ្យអាជ្ញាធរ និងមន្ទីរជំនាញស្តារ និងបូមលូទាំងនេះតែម្តង សំដៅធ្វើយ៉ាងណាដោះស្រាយការលិចលង់ផ្លូវ និងផ្ទះប្រជាពលរដ្ឋ។

គួរបញ្ជាក់ថា អាជ្ញាធរខណ្ឌមានជ័យ បានសហការជាមួយ ក្រុមការងារនៃមន្ទីរសាធារណការ និងដឹកជញ្ជូន រាជធានីភ្នំពេញ​ ធ្វើការស្តារ និងបូមលូនៅតាមដងផ្លូវ ក្នុងភូមិសាស្ត្រ សង្កាត់បឹងទំពុនទី១ និងសង្កាត់បឹងទំពុនទី២ ខណ្ឌមានជ័យនេះ បានចំនួន ២ថ្ងៃមកហើយ ដោយប្រើប្រាស់រថយន្តបូមលូ ៣គ្រឿង និងបុក ស្តារដោយកម្លាំងដៃផងដែរ៕

អត្ថបទ៖ ស្រីរ័ត្ន