អភិបាលខេត្តស្ទឹងត្រែង៖ ប្រជាពលរដ្ឋទៅបោះឆ្នោតយ៉ាងរីករាយ

ពាក់ព័ន្ធដំណើរការបោះឆ្នោតនៅខេត្តស្ទឹងត្រែង នាថ្ងៃទី២៣ ខែកក្ដដា ឆ្នាំ២០២៣នេះ លោក ស្វាយ សំអ៊ាង អភិបាលខេត្តស្ទឹងត្រែង ចាត់ទុកការរៀបចំនីតិវិធី នៃការបោះឆ្នោតជ្រើសតាំងតំណាងរាស្ត្រអាណត្តិទី៧ នៅខេត្តស្ទឹងត្រែង ទទួលបានលទ្ធផលល្អ ចំណែកប្រជាពលរដ្ឋបានទៅបោះឆ្នោតជ្រើសរើសតំណាងដឹកនាំប្រទេសតាមបំណងប្រកបដោយភាពរីករាយ ដើម្បីសុខសន្តិភាព និងការអភិវឌ្ឍ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស្វាយ សំអ៊ាង ប្រសាសន៍ថា បងប្អូនប្រជាពលរដ្ឋបាននាំគ្នាទៅបោះឆ្នោតប្រកបដោយទឹកមុខសប្បាយរីករាយ  ព្រោះពួកគាត់យល់ថា ការសម្រេចចិត្តបោះឆ្នោតជ្រើសរើសថ្នាក់ដឹកនាំបានល្អ ត្រឹមត្រូវ ដើម្បីសុខសន្តិភាព និងការអភិវឌ្ឍប្រទេសឱ្យកាន់តែរីកចម្រើនបន្ថែមទៀត។

លោក ហង់ កុង ប្រធានគណៈកម្មការរៀបចំការបោះឆ្នោតខេត្ត បានបញ្ចាក់ថា ការបោះឆ្នោតបានដំណើរការទៅបានតាមកម្មវិធីគ្រប់ការរិយាល័យបោះឆ្នោតទាំង ២៤៥ការិយាល័យ ទាំងការបោះឆ្នោត និងការរាប់សន្លឹកឆ្នោត។ លោកបន្តថា ស្ថិតក្នុងមានស្ថានភាពល្អប្រសើរនេះ មានមន្ត្រីអ្នកសង្កេតការបានមកចូលរួមពិនិត្យតាមដានចាប់ពីដំណើរបោះ រហូតដល់បញ្ជាប់ការរាប់សន្លឹកឆ្នោត និងចេញជាលទ្ធផលជាបណ្តោះអាសន្នបង្ហាញពីកិច្ចការងារបោះឆ្នោតមានតម្លាភាពល្អ។

លោកវរៈសេនីយ៍ទោ ទី ចាន់ធា មន្ត្រីសន្តិសុខប្រចាំនៅការិយាល័យបោះឆ្នោត លេខ០១១៩ និង ០១២០ នៅមណ្ឌលសាលាគរុកោសល្យភូមិភាគក្រុងស្ទឹងត្រែង បានបញ្ចាក់ថា ដំណើរការបោះឆ្នោតតំណាងរាស្ត្រនីតិកាលអាណត្តិទី៧ ទទួលបានលទ្ធផលល្អប្រកបដោយជោគជ័យ ព្រោះកិច្ចការការពារសន្តិសុខ ត្រូវបានមន្ត្រីបានសហការបានល្អ ការពារសន្តិសុខ ជូនប្រជាពលរដ្ឋមកបោះឆ្នោត បញ្ជាប់ដោយគ្មានអំពើហឹង្សាអ្វីឡើយ។

គួរបញ្ជាក់ថា ខេត្តស្ទឹងត្រែងមានការិយាល័យបោះឆ្នោត ២៤៥ ការិយាល័យ អ្នកមានឈ្មោះក្នុងបញ្ជីបោះឆ្នោតមានចំនួន ៩៧ ៤៥២ នាក់ និងមានអ្នកទៅបោះឆ្នោតបានចំនួន ៨១ ៤០៥ នាក់ ស្មើនឹង ៨៣,៥៣ ភាគរយ។ លទ្ធផលបណ្តោះអាសន្នបានបង្ហាញឱ្យឃើញពីសច្ចភាព ត្រឹមត្រូវ យុត្តិធម៌ មានតម្លាភាព គ្មានអំពើហឹង្សា គ្មានការគំរាមគំហែង។ ខេត្តស្ទឹងត្រែង មានគណបក្សនយោបាយឈរឈ្មោះបោះឆ្នោតចំនួន ១០ ក្នុងចំណោមគណបក្សទាំង១៨៕

អត្ថបទ៖ ងិន លីម