វេទិកាសន្តិភាពកម្ពុជា៖ អត្រាអ្នកទៅបោះឆ្នោតច្រើនបញ្ជាក់ថា ពលរដ្ឋយល់ច្បាស់នូវតម្លៃនៃការបោះឆ្នោត

វេទិកាសន្តិភាពកម្ពុជា បានមើលឃើញថា តាមរយៈអត្រានៃអ្នកចូលរួមបោះឆ្នោតច្រើនលើសលប់ បានបញ្ជាក់ថា ប្រជាពលរដ្ឋម្ចាស់ឆ្នោត បានយល់កាន់តែច្បាស់នូវតម្លៃនៃការបោះឆ្នោត និងបានបង្ហាញនូវភាពរស់រវើកនៃលទ្ធិប្រជាធិបតេយ្យរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសេចក្តីថ្លែងការណ៍នៅថ្ងៃទី២៥ ខែកក្កដា វេទិកាសន្តិភាពកម្ពុជា យល់ឃើញថា ទិន្នន័យជាបឋមរបស់ គ.ជ.ប ចំនួនប្រជាពលរដ្ឋទៅបោះឆ្នោតរហូតដល់ជាង៨លាននាក់ ស្មើនឹង៨៤.៥៨% គឺជាអត្រាខ្ពស់បើធៀបនឹងអត្រាអ្នកចូលរួមបោះឆ្នោតជាតិចំនួនបួនលើកកន្លងមក ចាប់តាំងពីឆ្នាំ២០០៣។  

វេទិកាសន្តិភាព បានចាត់ទុកអត្រាដ៏ខ្ពស់នេះបានឆ្លុះបញ្ចាំងពីការជឿទុកចិត្តរបស់ប្រជាពលរដ្ឋក្នុងដំណើរការបោះឆ្នោត និងបង្ហាញយ៉ាងច្បាស់នូវភាពរស់រវើកនៃលទ្ធិប្រជាធិបតេយ្យរបស់កម្ពុជា ចាប់ពីឆ្នាំ១៩៩៣ ដល់ឆ្នាំ២០២៣ ហើយចំណុចទាំងនេះ ជាភស្តុតាងដ៏រឹងមាំដែលអាចបញ្ជាក់ថា ប្រជាពលរដ្ឋពិតជាបានយល់ដឹងកាន់តែច្បាស់អំពីតម្លៃនៃការបោះឆ្នោត ដែលសន្លឹកឆ្នោតមួយសន្លឹករបស់ពលរដ្ឋអាចផ្ដល់មកវិញនូវសន្តិភាព និងការអភិវឌ្ឍលើគ្រប់វិស័យ។

បើតាមការសង្កេតរបស់វេទិកាសន្តិភាព ដំណើរការនៃការបោះឆ្នោតជ្រើសតាំងតំណាងរាស្ត្រ នីតិកាលទី៧នេះ គឺបានប្រព្រឹត្តទៅដោយសេរី ត្រឹមត្រូវ យុត្តិធម៌ តម្លាភាព និងសម្ងាត់ ស្របតាមគោលការណ៍នៃលទ្ធិប្រជាធិបតេយ្យសេរីពហុបក្ស ជាពិសេសស្របតាមរដ្ឋធម្មនុញ្ញកម្ពុជា និងច្បាប់ស្តីពីការបោះឆ្នោតជ្រើសតាំងតំណាងរាស្ត្រ។

ទន្ទឹមនេះ បរិយាកាសនៃការបោះឆ្នោត គឺប្រព្រឹត្តទៅដោយសន្តិសុខ សុវត្ថិភាព មានសណ្តាប់ធ្នាប់ល្អ មិនមានអំពើហិង្សា ឬការគំរាមកំហែងណាមួយកើតឡើងឡើយ ក្រោមការសង្កេតការណ៍ជាតិ-អន្ដរជាតិ អ្នកសារព័ត៌មានជាតិ និងអន្តរជាតិ ក៏ដូចជាសមាគម អង្គការក្រៅរដ្ឋាភិបាល ព្រមទាំងអ្នកសង្កេតការណ៍មកពីគណបក្សនានា។ ជាមួយគ្នានេះដែរ វេទិកាសន្តិភាពកម្ពុជា ក៏បានចូលរួមអបអរសាទរចំពោះគណបក្សប្រជាជនកម្ពុជា ដែលទទួលបានជ័យជំនះក្នុងការបោះឆ្នោតជាសកលនេះ៕