ព័ត៌មានជាតិ
តើផ្សារធំៗបី អូឡាំពិច អូឬស្សី និងបឹងកេងកង មានដំណើរការយ៉ាងណាហើយ?
ផ្សារបោះដុំ និងលក់រាយអីវ៉ាន់គ្រប់ប្រភេទជាពិសេសសម្លៀកបំពាក់ ចំនួនបី នៅរាជធានីភ្នំពេញ ដែលមានអាយុកាលយូរមកហើយ រួមមាន ផ្សារអូឡាំពិច ផ្សារអូឬស្សី និងផ្សារបឹងកេងកង មានដំណើរការយ៉ាងណាហើយ នៅក្រោយវិបត្តិកូវីដ-១៩នេះ។
លោក ឡយ ស៊ាងអាង ប្រធានផ្សារអូរឫស្សី បានថ្លែងប្រាប់កម្ពុជាថ្មីថា ក្នុងឆ្នាំ ២០២៣នេះ ការលក់ដូររបស់ក្រុមអាជីវករ មានដំណើរការល្អ បើធៀបទៅនឹងឆ្នាំ ២០២២ កន្លងទៅ។ ប៉ុន្តែក្រឡែកទៅមើលលំហូររបស់អតិថិជនចូលផ្សារហាក់មានការធ្លាក់ចុះបន្ដិចបន្ដួចជាងឆ្នាំមុន។ ទោះយ៉ាងណា លោកមើលឃើញថា ក្រោយពេលបោះឆ្នោតបានបញ្ចប់ប៉ុន្មានថ្ងៃមកនេះ កំណើនអតិថិជនមានស្ថានភាពល្អប្រសើរឡើងវិញ។
លោក ឡយ ស៊ាងអាង បានឱ្យដឹងទៀតថា មកទល់ពេលនេះនៅក្នុងផ្សារអូឬស្សី មានតូបលក់ដូរប្រមាណជិត ៦ពាន់កន្លែង ដោយមានអីវ៉ាន់ច្រើនមុខ ដូចជា សម្ភារៈប្រើប្រាស់ សម្លៀកបំពាក់ និងគ្រឿងឧបភោគបរិភោគ ជាដើម។ ក្នុងនោះ ផ្នែកលក់ដូរម្ហូបអាហារ មិនមានការប្រែប្រួលនោះទេ ប៉ុន្តែផ្នែកសម្លៀកបំពាក់ មានការធ្លាក់ចុះបន្តិចបន្តួច បើធៀបទៅនឹងឆ្នាំ ២០២២។
ដូចគ្នានេះដែរ លោក ឯក និមល ប្រធានផ្សារបឹងកេងកង បានឱ្យដឹងថា បច្ចុប្បន្ននេះ ចរន្តនៃការលក់ដូរនៅក្នុងផ្សារបឹងកេងកង មានការធ្លាក់ចុះបន្តិចទាំងអាជីវករ និងតូបលក់ដូរ ពោលគឺប្រហែល ១៥ ភាគរយ បើធៀបនឹងមុនកើតមានវិបត្តិកូវីដ។ លោកបានបន្ថែមថា ស្ថានភាពនៃការធ្លាក់ចុះបរិមាណផ្គត់ផ្គង់ ចែកចាយ ទៅលើសម្លៀកបំពាក់ បន្លែផ្លែឈើ តែមានការកើនឡើងចំពោះការលក់ដូរម្ហូបចម្អិតស្រាប់។ ទន្ទឹមនឹងការធ្លាក់ចុះទីផ្សារនេះ លោក ឯក និមល បានសំណូមពរដល់អាជីវករទាំងអស់ ត្រូវប្រើប្រាស់ពាក្យសម្ដី និងឥរិយាបទ ប្រកបដោយភាពរួសរាយរាក់ទាក់ ដើម្បីទាក់ទាញអតិថិជនឡើងវិញ។
ដោយឡែកផ្សារអូឡាំពិច នៅឆ្នាំ ២០២៣នេះ មានដំណើរការលក់ដូរល្អប្រសើរជាងមុន បន្ទាប់ពីការឆ្លងរាលដាលជំងឺកូវីដ-១៩ មានភាពស្ងប់ស្ងាត់។ នេះបើតាមការបញ្ជាក់របស់លោក ថៃ ធួន ប្រធានផ្សារអូឡាំពិច។
លោក ថៃ ធួន បានថ្លែងប្រាប់កម្ពុជាថ្មីថា មកទល់ពេលនេះ ផ្សារអូឡាំពិចមានតូបលក់ដូរប្រហែលជាង ៣ពាន់កន្លែង ដែលកំពង់ដំណើរការ។ ក្រៅពីដំណើរការលក់ដូរល្អប្រសើរហើយនោះ ចំពោះបញ្ហាសន្តិសុខ សុវត្ថិភាព ផ្សារអូឡាំពិច អាជ្ញាធរ បានយកចិត្តទុកដាក់ខ្ពស់ ដោយរក្សាសន្តិសុខជូនអាជីវករ និងអតិថិជនយ៉ាងតឹងរ៉ឹងគ្រប់ច្រកទាំងអស់។
សូមបញ្ជាក់ថា បើទោះបីជារាជរដ្ឋាភិបាល បានផ្តល់សិទ្ធិដល់វិស័យឯកជន ឱ្យមានការអភិវឌ្ឍផ្សារទំនើបៗជាច្រើននៅរាជធានីភ្នំពេញយ៉ាងណាក្តី តែផ្សារប្រពៃណីទាំងបី នៅតែពេញនិយមទាក់ទាញអតិថិជនយ៉ាងច្រើនទាំងបោះដុំ និងលក់រាយ ជាពិសេសទំនិញចេញពីផ្សារទាំងបីនេះ ចែកចាយស្ទើរគ្រប់ខេត្តក្រុងនៃប្រទេសកម្ពុជា៕
អត្ថបទ ៖ ផល ធារិត
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ