អាជីវករផ្សារអូរឫស្សី ប្រាប់ថា​ការលក់ដូរមានកំណើនតិចតួច ក្រោយចូលឆ្នាំខ្មែរ

បន្ទាប់ពិធីបុណ្យចូលឆ្នាំប្រពៃណីខ្មែរបានកន្លងផុតទៅថ្មីៗនេះ បណ្តាអាជីវករដែលជាអ្នកលក់បន្លែត្រីសាច់ និងសម្ភារៈប្រើប្រាស់ផ្សេងៗប្រចាំថ្ងៃ បានប្រាប់ឱ្យដឹងថា ការលក់ដូររបស់ពួកគាត់​ គឺមានកំណើនតិចតួច មិនខុសអ្វីពីកាលមុនបុណ្យចូលឆ្នាំខ្មែរ នោះឡើយ។

លោក ឡយ ស៊ាងអាង ប្រធានផ្សារអូរឫស្សី ប្រាប់ កម្ពុជាថ្មី នៅថ្ងៃទី២៤ ខែមេសានេះថា កាលពីសម្រាករយៈពេល៣ថ្ងៃ ក្នុងពិធីបុណ្យចូលឆ្នាំប្រពៃណីខ្មែរួចមក អាជីវករទាំងអស់ក្នុងផ្សារអូរឬស្សី បាននាំគ្នាបើកតូបលក់ដូរឡើងវិញជាធម្មតា ចំណែកការលក់ដូរទៀតសោត គឺមានកំណើនតិចតួច មិនខុសអ្វីពីកាលពីមុនចូលឆ្នាំប្រពៃណីខ្មែរ នោះឡើយ។

លោក បន្តថា សម្រាប់ការលក់ដូររបស់អាជីវករផ្សារអូរឫស្សី នាពេលបច្ចុប្បន្ន ឃើញថាកន្លែងខ្លះក៏រៀងស្ងាត់បន្ដិចដែរ ខណៈអាជីវករខ្លះបានចេញមកលក់នៅក្រៅផ្សារ ដែលនាំឱ្យ អ្នកទិញ ឬអតិថិជនមួយចំនួន ក៏មិនសូវនាំគ្នាចូលដើរទិញទំនិញនៅខាងក្នុងដូចសព្វមួយដង។

លោក ឡយ ស៊ាងអាង បានប្រាប់ឱ្យដឹងទៀតថា ចំពោះការលក់ដូររបស់អាជីវ​ករក្នុងផ្សារអូរឫស្សី នាពេលចុងក្រោយនេះ លោកទទួលស្គាល់ថា ទំនិញខ្លះក៏លក់ដាច់ រីឯខ្លះទិញក៏ស្ងាត់ភ្ញៀវផងដែរ។

ជាក់ស្ដែង កាលពីមុនចូលឆ្នាំខ្មែរ ទំនិញដែលលក់ដាច់ មានដូចជា៖ សម្ភារសែនចិន គ្រឿងតុបតែងផ្ទះ ទាន ធូប និងប្រភេទគ្រឿងទេសមួយចំនួនដែលជាតម្រូវការសម្រាប់ថ្ងៃបុណ្យទាន។

យ៉ាងណាមិញ លោក ឡយ ស៊ាងអាង បញ្ជាក់ថា ក្នុងនាមលោកជាប្រធានគណៈកម្មការផ្សារអូរឫស្សី ក៏សុំស្នើ និងលើកទឹកចិត្តដល់អាជីវករទាំងអស់ សូមមេត្តារក្សានៅតម្លៃលក់ដូរប្រចាំថ្ងៃរបស់ខ្លួន មិនថាថ្ងៃធម្មតា ឬថ្ងៃបុណ្យទាន នោះឡើយ។ ការដែលធ្វើបែបនេះ អាជីវករទាំងអស់នឹងរក្សាបាននូវអតិថិជន ពិសេសគឺម៉ូយរបស់ពួកគាត់ បានកាន់យូរអង្វែងរហូតទៅ៕

អត្ថបទ ៖ សួស សិត