បណ្ឌិត គី សេរីវឌ្ឍន៍៖ ភាពជាអ្នកដឹកនាំរបស់​ឯកឧត្តម ហ៊ុន ម៉ាណែត នឹងជំរុញ​គោលនយោបាយសេដ្ឋកិច្ច​កម្ពុជា ជោគជ័យ

រាជរដ្ឋាភិបាលអាណត្តិទី៧ នឹងដឹកនាំដោយបញ្ញវន្តវ័យក្មេង គឺឯកឧត្តមបណ្ឌិត ហ៊ុន ម៉ាណែត ។ ឯកឧត្តមបណ្ឌិត ហ៊ុន ម៉ាណែត មានការសិក្សាបានខ្ពង់ខ្ពស់ និងទទួលបានសញ្ញាបត្រថ្នាក់អនុបណ្ឌិតសេដ្ឋកិច្ច នៅសាកលវិទ្យាល័យ New York សហរដ្ឋអាមេរិក និងថ្នាក់បណ្ឌិតសេដ្ឋកិច្ច នៅសាកលវិទ្យាល័យ Bristol នៃចក្រភពអង់គ្លេស។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានកត់សម្គាល់អំពីបុគ្គលិកលក្ខណៈ​មេដឹក​នាំថ្មីថា ​ឯកឧត្តមបណ្ឌិត ហ៊ុន ម៉ាណែត គឺមានភាពជាអ្នកដឹកនាំរឹងមាំ នឹងធឹង ម៉ឺងម៉ាត់ នឹងអាចជំរុញឱ្យកម្ពុជា អនុវត្ត​គោល​នយោបាយសេដ្ឋកិច្ចបានជោគជ័យនាថ្ងៃខាងមុខ។

លោកបណ្ឌិត បានបន្តថា ភាពម៉ឺងម៉ាត់នេះ គឺជាលក្ខខណ្ឌចាំបាច់បំផុត។ លោកថា ប្រសិនបើការអនុវត្ត​គោល​នយោបាយ​មិនមានភាពម៉ឺងម៉ាត់ម៉ត់ចត់ ប្រាកដជាណាស់ថា នឹងបង្កភាពយឺតយ៉ាវ មិនទទួលបានលទ្ធផល​បានល្អនោះទេ ។ លោកមានជំនឿជាក់ លើការដឹកនាំរាជរដ្ឋាភិបាលថ្មី របស់ឯកឧត្តមបណ្ឌិត ហ៊ុន ម៉ាណែត។

ថ្លែងនៅក្នុងវេទិកាតុមូលរបស់កម្ពុជាថ្មី លោកបណ្ឌិត គី សេរីវឌ្ឍន៍ បានលើកឡើងទៀតថា ស្ថិតនៅអមជាមួយមេ​ដឹក​នាំថ្មី ដែលមានជំនាញផ្នែកសេដ្ឋកិច្ច នៅមានឧត្តមមន្រ្តីមួយរូបទៀត គឺរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុលោក អូន ព័ន្ធមុនីរ័ត្ន ដែលបានដឹកនាំក្រសួងនេះ ធ្វើឱ្យសេដ្ឋកិច្ចកម្ពុជា មានស្ថិរភាពល្អ បើទោះជាកន្លងមក កើតមាន​វិបត្តិ​សេដ្ឋកិច្ច​នៅលើពិភពលោក តែកម្ពុជានៅអាចរក្សាបានកំណើនសេដ្ឋកិច្ចល្អ។ លើសពីនេះទៀតការប្រមូលពន្ធរបស់​រាជរដ្ឋាភិបាល លើសផែនការ ក៏បានឆ្លុះបញ្ចាំងថា សេដ្ឋកិច្ចមានដំណើរការល្អ និងរីកចម្រើនផងដែរ។

លើសពីនេះទៅទៀត លោកបណ្ឌិត គី សេរីវឌ្ឍន៍ មើលឃើញថា ការផ្លាស់ប្តូរមេដឹកនាំ គឺជាការផ្លាស់ប្តូររចនា​សម្ព័ន្ធ​សេដ្ឋ​កិច្ចថ្មី​មួយ ពី Grow ដែលមានកម្រិត Smooth ឱ្យកាន់តែស្ទុះងើបឡើងមួយកម្រិតថែមទៀត។​ ដោយលោក​ឱ្យតម្លៃទៅលើយុវជន គឺជាកម្លាំងផលិត និងបង្កើតផលិតភាពយ៉ាងសំខាន់សម្រាប់ប្រទេស។ ដោយហេតុនេះហើយ ទើបរាជរដ្ឋាភិបាល ចាប់ផ្តើមជំរុញការបណ្តុះបណ្តាលវិជ្ជាជីវៈ ដើម្បីបង្កើតសមត្ថភាព​កម្លាំងពលកម្មបន្ថែម។

ទន្ទឹមនឹងនេះ រាជរដ្ឋាភិបាល ក៏បាននិងកំពុងអភិវឌ្ឍវិស័យឧស្សាហកម្ម ដែលជាវិស័យមួយជួយបង្កើតតម្លៃបន្ថែមខ្ពស់។ លោកបណ្ឌិត គី សេរីវឌ្ឍន៍ មើលឃើញទៀតថា រាជរដ្ឋាភិបាលអាណត្តិទី៧នេះ អាចនឹងរៀបចំគោលនយោបាយ​សម្រាប់ជួយវិស័យសហគ្រាសធុនតូច និង មធ្យម SME ឱ្យកាន់តែរឹងមាំថែមទៀត ព្រោះ ៦០ភាគរយ នៃអាជីវកម្មនៅ​ក្នុងប្រទេស គឺជា SME។

សូមរំលឹកថា កាលពីថ្ងៃទី២៦ ខែកក្កដា សម្ដេចតេជោ ហ៊ុន សែន នាយករដ្ឋមន្រ្តី បានប្រកាសថា សម្ដេចនឹងមិន​បន្តធ្វើជា​នាយករដ្ឋមន្ត្រីសម្រាប់អាណត្តិថ្មីនេះទេ ដោយតំណែងនេះ នឹងត្រូវជំនួសដោយឯកឧត្តមបណ្ឌិត ហ៊ុន ម៉ាណែត។ បើតាមការប្រកាសរបស់សម្ដេចតេជោ រដ្ឋសភា សម្រាប់នីតិកាលទី៧ នឹងចូលមកជំនួសនៅថ្ងៃទី២១ ខែសីហា ខណៈរាជរដ្ឋាភិបាលថ្មី ដែលដឹកនាំដោយឯកឧត្តមបណ្ឌិត ហ៊ុន ម៉ាណែត នឹងត្រូវចូលកាន់​តំណែងជាផ្លូវ​ការនៅល្ងាចថ្ងៃទី២២ ខែសីហា ឆ្នាំ២០២៣ ខាងមុខ៕