ផ្លូវវាងត្រង់ចំណុចបាក់ស្រុត​នៅមណ្ឌលគិរីអាចធ្វើដំណើរបានក្រោយឈូសឆាយមួយសប្ដាហ៍

រដ្ឋបាលខេត្តមណ្ឌលគិរី​បានប្រកាសថា ​ផ្លូវវាងត្រង់ចំណុចបាក់ស្រុតលេខ 76A ត្រង់ចំណុចអូរងើយ ស្ថិតនៅក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំងអាចធ្វើដំណើរឆ្លងកាត់បានហើយចាប់ពីថ្ងៃទី ៧ ខែសីហា ឆ្នាំ២០២៣។

សូមជំរាបថា ជំនន់ទឹកភ្លៀងកាលពីយប់ថ្ងៃទី ០១ ខែសីហា នៅស្រុកអូរាំង ទៅស្រុកកែវសីមា ខេត្តមណ្ឌលគិរីបានបណ្ដាលឱ្យបាក់ស្រុតផ្លូវ និងដាច់ផ្លូវ នៅចន្លោះគីឡូម៉ែត្រលេខ ៩១ ដល់ ៩៩ ផ្លូវជាតិលេខ ៧៦ ដែលផ្លូវត្រូវបានកាត់ផ្ដាច់ និងខូចទាំងស្រុងមិនអាចធ្វើដំណើរបានសម្រាប់យានយន្តគ្រប់ប្រភេទ។

រដ្ឋបាលខេត្តបានបិទចរាចរណ៍បណ្ដោះអាសន្នចាប់ពីថ្ងៃទី ១ ខែសីហា ដោយប្រាប់អ្នកដំណើររកផ្លូវវាងទៅតាមខេត្តក្រចេះ ស្ទឹងត្រែង និងរតនគិរី។ ចំពោះស្ថានភាពបាក់ស្រុត និងប្រេះស្រាំ មានប្រវែងសរុប ១៦៦ ម៉ែត្រ ក្នុងនោះបាក់ស្រុតទាំងស្រុង ៩៦ ម៉ែត្រ៕