អ្នកនាំពាក្យ៖ ក្រសួងកសិកម្មមានយន្តការ​មិនឱ្យអង្ករឡើងថ្លៃគំហុក​ប៉ះពាល់ជីវភាព​ពលរដ្ឋ

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោកជំទាវ អ៊ឹម រចនា បានលើកឡើងថា ការឡើងថ្លៃស្រូវអង្ករ នារយៈពេលចុងក្រោយនេះ មិនទាន់មានបញ្ហាប្រឈម ឬហានិភ័យណាមួយ ដល់សន្តិសុខស្បៀងនៅកម្ពុជា នៅ​ឡើយ។

លោកជំទាវ បានបញ្ជាក់ថា ក្រសួងកសិកម្មមានយន្តការច្បាស់លាស់ក្នុងការតាមដាន អង្កេត និងវិភាគនូវទិន្នផល​ស្រូវ​ដែលប្រមូលបាន ជាពិសេសទៅលើការនាំចេញស្រូវអង្ករទៅកាន់ទីផ្សារអន្តរជាតិ។ បើតាមលោកជំទាវ អ៊ឹម រចនា យន្តការ​នេះដាក់ចេញ ដើម្បីធានាធ្វើយ៉ាងណារក្សាឱ្យបាននូវសន្តិសុខស្បៀង ជាពិសេសរក្សាតម្លៃអង្ករឱ្យមាន​ស្ថិរភាព​នៅលើទីផ្សារក្នុងស្រុក។

អ្នកនាំពាក្យក្រសួងកសិកម្ម ថ្លែងប្រាប់កម្ពុជាថ្មីដូច្នេះថា«ជាការពិតហើយ នៅពេលដែលស្រូវឡើងថ្លៃ អង្ករលក់​នៅលើទីផ្សារ ត្រូវតែឡើងថ្លៃដោយជៀសមិនរួច ប៉ុន្តែបើពិនិត្យលើតម្លៃវិញយើងសង្កេតឃើញថា ការឡើងថ្លៃអង្ករ​លើទីផ្សារនេះ វាស្ថិតនៅក្នុងកម្រិតមួយដែលអាចគ្រប់គ្រងបាន ហើយក្រសួងនឹងបន្តតាមដាន​បញ្ហានេះយ៉ាង​យកចិត្តទុកដាក់»។

លោកជំទាវ អ៊ឹម រចនា បានសង្កត់ធ្ងន់ថា យន្តការរបស់​ក្រសួងកសិកម្មគឺធ្វើយ៉ាងណា មិនឱ្យតម្លៃអង្ករឡើងថ្លៃ​គំហុករហូតដល់ប៉ះពាល់ជីវភាពរបស់ប្រជាពលរដ្ឋនោះទេ។ បើតាមអ្នកនាំពាក្យ ការឡើងថ្ងៃអង្ករនាពេលនេះ គឺជានិន្នាការសកល មិនមែនកើតឡើងតែនៅកម្ពុជានោះទេ។

តាមរបាយការណ៍ដែលផ្តល់ដោយអ្នកនាំពាក្យក្រសួងកសិកម្ម បានបង្ហាញថា អង្ករក្រអូបធម្មតា ម្ល៉េះស្រូវប្រាំង/សែន​ក្រអូប​មានតម្លៃពី ១៥៥ ០០០-១៦០ ០០០រៀល/ការ៉ុង។ តម្លៃអង្ករសប្រណិតដូចជា ផ្កាខ្ញី នាងខុន ក្ងោកពង្ស ពីមុនមា​នតម្លៃ ១០៥០០០-១៣០០០០រៀល/ការ៉ុង ៥០គីឡូក្រាម បានឡើងដល់ ១៤០០០០-១៥០០០០រៀល/​ការ៉ុង៥០​គីឡូក្រាម ពោលគឺតម្លៃលក់រាយពី ២៥០០- ៣០០០រៀល ឡើងដល់ ៣០០០-៣៥០០រៀល/១គីឡូក្រាម។ ចំណែក​តម្លៃអង្ករចម្រុះប្រភេទ IR និងនាងមិញពីមុនមានតម្លៃ ១០០ ០០០-១០៥ ០០០រៀល/ការ៉ុង៥០គក្រ បានកើនឡើងដល់ ១៤០ ០០០រៀល/ការ៉ុង ពោលគឺតម្លៃអង្ករលក់រាយបានកើនឡើងចន្លោះពី ២០០-៥០០ រៀលក្នុង១គក្រ។

ប្រធានក្រុមប្រឹក្សាភិបាលសហព័ន្ឋស្រូវអង្ករ លោកឧកញ៉ា សុង សារ៉ន បានលើកឡើងថា ស្រូវបាន​ឡើងថ្លៃពី៣០%​ទៅ៤០% ខណៈអង្ករឡើងថ្លៃប្រមាណ ១៥% ដោយសារការសម្រុកទិញស្រូវពីវៀតណាម។ អ្នកជំនាញ​ស្រូវអង្ករ មើលឃើញថា ការឡើងថ្លៃនេះ ជាការចំណេញសម្រាប់កសិករ ក៏ប៉ុន្តែជាផលលំបាកសម្រាប់​រោងម៉ាស៊ីនកិន​ស្រូវមួយចំនួន ដោយសារការបញ្ជាទិញពីទីផ្សារអន្តរជាតិមានការធ្លុះចុះ ដែលបញ្ហានេះខាងសហព័ន្ធកំពុងដាក់​ស្នើឱ្យមានការ​សម្រប​សម្រួលពីរដ្ឋាភិបាល។​

យោងតាមរយបាយការណ៍របស់ក្រសួងកសិកម្ម បានបង្ហាញថា ក្នុងរយៈពេល ៧ខែ ឆ្នាំ២០២៣ កម្ពុជាបាននាំ​ចេញអង្ករចំនួន ៣៦២ ៧០៨,០០តោន និងស្រូវចំនួន ១ ៥១០ ៨៥០,០០តោន ទៅកាន់ទីផ្សារអន្តរជាតិ។ ក្នុងនោះ ការនាំចេញអង្ករកើនឡើង ៣,៣៦% បើធៀបនឹងរយៈពេលដូចគ្នាកាលពីឆ្នាំ២០២២។ ចំណែកការនាំចេញ​ស្រូវកើន​ឡើងចំនួន ១៣,៦៧%៕