ប្រជានេសាទក្នុងខេត្តបាត់ដំបងត្អូញត្អែរ រក​ត្រី​មិន​បាន​ ខាត​ទាំង​ថ្លៃ​សាំង​កាណូត

គ្រួសារប្រជានេសាទជាលក្ខណះគ្រួសារកំពុងប្រឈមសេដ្ឋកិច្ចគ្រួសារ ខណះមុខរបរនេសាទដែលប្រើប្រាស់​ឧបករណ៍ មិនខុសច្បាប់ដូចជាដាក់មងឡើជាដើមមិនកាក់កបក្នុងរដូវកាលឆ្នាំនេះ បើធៀបរដូវកាល​ដូចគ្នាក្នុងឆ្នាំ ២០២២។

ប្រជានេសាទក្នុងឃុំ​កោះជីវាំង ស្រុកឯកភ្នំ​ជាច្រើនគ្រួសារបានលើកឡើងថា មុខរបរនេសាទជាលក្ខណះគ្រួសាររបស់ពួកគាត់កំពុងប្រឈមខ្លាំង ខណះដែលចេញប្រកបមួយថ្ងៃៗមិនបានត្រីសម្រាប់ធ្វើ​ប្រហុក​ផ្អក សម្រាប់លក់បានកម្រៃខ្លះនោះទេ ខាតបង់តែថ្លៃសាំងកាណូត បើធៀបឆ្នាំកន្លងទៅក្នុងរយ:ពេលដូចគ្នា បានកាក់កប​និងមានលុយកាក់ផ្គត់ផ្គង់គ្រួសារបានសមល្មមមិនប្រឈមដូចឆ្នាំនេះនោះទេ។

«ឆ្នាំនេះអត់បាន ពេលខ្លះមានគេលួចសារមង​ ខ្ញុំអស់ទៀតផង ហើយមងដែលពួកខ្ញុំប្រើប្រាស់ មន្ត្រីជំនាញពិនិត្យថាមិនខុសច្បាប់ទេ ព្រោះពួកខ្ញុំមិនដែលប្រើឧបករណ៍ខុសច្បាប់រករបរដោយមិនបំពាន ហើយរស់នៅបានសុខដោយ​តាម​រយះមុខរបរនេសាទជាលក្ខណះគ្រួសារបន្តវេនរាប់ឆ្នាំមកហើយ គ្រាន់បានទ្រទ្រង់សេដ្ឋកិច្ចគ្រួសារ តែឆ្នាំនេះរកតែត្រីធ្វើ ប្រ ហិក លក់រកកម្រៃខ្លះមិនបានផង ដោយសារតែទំនប់ខាងលើត្រូវបានបិទ ទើបមិនមានទឹកឡើងដាក់ មង ឡើ និង ឧបករ ណ៍ផ្សេងៗដែលមិនខុសច្បាប់ មិនបានត្រីសោះ បើសិនជាបែបនេះ ពួកខ្ញុំគិតថានឹងទៅធ្វើសំណាកស្រុកមួយរយះហើយមើល ទៅទើបមានថវិការ ផ្គត់ផ្គង់គ្រួសារបាន ខណះដែលពួកខ្ញុំគ្មានមុខរបរអីផ្សេងពីនេះទេ”។ នេះ​បើ​យោង​តា​មសម្តី​ប្រជានេសាទ។

ពាក់ព័ន្ធការលើកឡើងពីប្រជានេសាទ មន្ត្រីអាជ្ញាធរភូមិឃុំក៏ទទួលស្គាល់ថា ប្រជាពលរដ្ឋក្នុងមូលដ្ឋានភាគច្រើនពិតជាបានប្រកបមុខរបរដាក់មងដាក់ឡើ ដែលជាមុខរបរបន្តជំនាន់ដើម្បីធ្វើជាប្រហុក ផ្អក ត្រីឆ្អើ លក់ដើម្បីដោះស្រាយជីវភាពប្រចាំថ្ងៃ។ តែឆ្នាំនេះពួកគាត់រកត្រីមិនបានទេ បានត្រឹមតែធ្វើជាម្ហូបប្រចាំគ្រួសារពី ១ថ្ងៃ ទៅ ១ថ្ងៃ ប៉ុណ្ណោះ។

បើតាមមតិមហាជនបានលើកឡើងថា ការរកត្រីមិនបានដូចឆ្នាំមុនរបស់ប្រជាពលរដ្ឋដែលប្រកបរបរនេសាទជាលក្ខណះគ្រួសារនេះ ដោយសារតែទំនប់ស្ទាក់ទឹកសាលាតាអនក្នុងស្រុកឯកភ្នំបានបិទ តែខ្លះទៀតថាមកពីអស់ព្រៃជម្រក ត្រីពងខ្លះទៀតថា មកពីបណ្តែតបណ្តោយឲ្យឈ្មួញប្រើឧបករណ៍ខុសច្បាប់ច្រើនពេក ហើយយូរៗបង្ក្រាបម្តងទើបធ្វើឲ្យត្រីប្រភេទធ្វើប្រហុក ផ្អក ស្ទើរបាត់បង់អស់ក្នុងរយះពេលចុងក្រោយនេះ ជាពិសេសក្នុងរដូវកាលឆ្នាំនេះតែម្តង ។

ផ្ទុយពីការលើកឡើងពីមហាជន លោក ជួង សុភា នាយខណ្ឌរដ្ឋបាលជលផលបាត់ដំបងបានបញ្ជាក់ថា ការខ្វះខាតរកត្រីមិនបានក្នុងឆ្នាំនេះមិនពាក់ព័ន្ធការបិទទំនប់ទឹកមួយរយះឬបទល្មើសនោះទេ គឺមកពីកត្តាទឹកភ្លៀងធ្លាក់មិនបានតាមតម្រូវការប៉ុណ្ណោះ។

លោកបានបន្តបញ្ជាក់ថា ត្រឹម​ថ្ងៃ​ទី១៤ ខែកញ្ញា ឆ្នាំ២០២៣ បឹងទន្លេសាបនៅក្នុងឃុំកោះជីវាំងស្រុកឯកភ្នំ មានកម្ពស់ទឹកទើបតែ ៤.៤០ ម បើធៀបកាលពីថ្ងៃទី១៤ ខែកញ្ញា ឆ្នាំ២០២២ មានកម្ពស់ទឹក ៥,៧០ម ខណះក្នុងឆ្នាំ ២០២២ កម្រិតខ្ពស់​បំផុត ៧,៣៥ម៕

អត្ថបទ៖ សៅ សារិទ្ធ