កម្ពុជា-ជប៉ុន បង្កើនចំណងមិត្តភាពក្នុងខួប​៧០ឆ្នាំ ប្រគុំតន្ត្រីទាក់ទាញអ្នកធុរកិច្ច និងវិនិយោគ

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ  បានលើកឡើងថា ការប្រគំតន្ត្រីអូខេស្ត្រា (Orchestra) ដែលជាសិល្បៈតន្ត្រីរបស់ជប៉ុន នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ជាឱកាសរឹតចំណងមិត្តភាពរវាងប្រទេសទាំងពីរ កម្ពុជា-ជប៉ុន កាន់តែជិតស្និទ្ធមួយកម្រិតបន្ថែមទៀត។

លោករដ្ឋមន្ត្រីបានបញ្ជាក់ថា យុវតន្ត្រីករជប៉ុនពិតជាសម្តែងបានល្អ និងបានថ្លែងអំណរគុណចំពោះគណៈប្រតិភូជប៉ុន ដែលបានធ្វើដំណើរដ៏សែនឆ្ងាយ ដើម្បីមកចូលរួមក្នុងការប្រគំតន្ត្រីដ៏វិសេសវិសាលនេះ។

ព្រឹត្តិការណ៍សិល្បៈនេះ ត្រូវបានប្រារព្ធឡើងនាល្ងាចថ្ងៃទី១៥ ខែកញ្ញា ឆ្នាំ២០២៣ ក្រោមអធិបតីភាព សម្តេច ឃួន សុដារី ប្រធានរដ្ឋសភា និងលោក អ៊ូអិណុ អាត់ត្សឹស៊ី ឯកអគ្គរាជទូតជប៉ុនប្រចាំកម្ពុជា ក្នុងគោលបំណងដើម្បីអបអរ​សាទរខួបលើកទី៧០នៃមិត្តភាពកម្ពុជា-ជប៉ុន សំដៅរឹតចំណងសាមគ្គីភាពរវាងប្រទេសទាំងពីរឱ្យកាន់តែស្និទ្ធស្នាល និងទាក់ទាញការចាប់អារម្មណ៍របស់ប្រជាជន និងអ្នកវិនិយោគជប៉ុនឱ្យមកទស្សនាកម្សាន្ត ធ្វើធុរកិច្ច និងវិនិយោគ​នៅកម្ពុជាកាន់តែច្រើន។

សូមជម្រាបថា មកដល់ឆ្នាំ២០២៣នេះ កម្ពុជា-ជប៉ុនបានឈានដល់កម្រិតដៃគូយុទ្ធសាស្ត្រគ្រប់ជ្រុងជ្រោយ ជាមួយនឹងការប្ដេជ្ញាបន្តពង្រឹងកិច្ចសហប្រតិបត្តិការឱ្យកាន់តែរឹងមាំថែមទៀតផងដែរ។

ដោយឡែកការធ្វើពាណិជ្ជកម្មរវាងប្រទេសទាំងពីរ រយៈពេល ៨ខែ ឆ្នាំ ២០២៣នេះ សម្រេចបាន ១.២ពាន់លានដុល្លារ ថយចុះជិត ១០ភាគរយ។ ក្នុងនោះ ការនាំចេញរបស់កម្ពុជា ទៅជប៉ុន មានចំនួនជាង ៧៧០ដុល្លារ និងនាំចូលមក​វិញមានជាង ៤៣០លានដុល្លារ៕