ព័ត៌មានជាតិ

CAPFish-Capture ផ្ដល់ជំនួយគិតជាទឹកប្រាក់ពី ២ម៉ឺន៥ពាន់ដុល្លារ ទៅ១០ម៉ឺនដុល្លា ដល់សហគ្រាសចំនួន២៨

បានផុស

៣ years មុន

នៅ

ថ្ងៃចន្ទ ១៨ កញ្ញា ២០២៣

ដោយ

គម្រោងអភិវឌ្ឍន៍ជលផលក្រោយប្រមូលផល (CAPFish-Capture) បានគាំទ្រដល់សហគ្រាសចំនួន២៨ ជាជំនួយបច្ចេកទេស និង សម្ភារបរិក្ខារ ទៅដល់សហគ្រាសនីមួយៗដែលមានតម្លៃចាប់ពី ២៥ ០០០ដុល្លារ ដល់ ១០០ ០០០ដុល្លារអាមេរិក ដើម្បីកែលម្អប្រតិ្តបត្តិការអាជីវកម្ម និងអនុវត្តស្តង់ដារសុវត្ថិភាពម្ហូបអាហារ CQS ។ នេះជាការគូសបញ្ជាក់របស់ លោក ពុំ សុថា ប្រតិភូរាជរដ្ឋាភិបាលទទួលបន្ទុកជាអគ្គនាយករដ្ឋបាលជលផល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពុំ សុថា បានគូសបញ្ជាក់ជាមួយអ្នកសារព័ត៌មានបែបនេះ នៅមុនដំណើរទស្សនកិច្ចសិក្សានិងផ្សព្វផ្សាយអំពីសហគ្រាសជលផលក្រោយប្រមូលផលដែលទទួលផលពីគម្រោង CAPFish នៅតាមរាជធានីខេត្តចំនួន៤ ដូចជា រាជធានីភ្នំពេញ កណ្ដាល កំពង់ធំ និងសៀមរាប។

***(រូបថតដោយ៖ ក្រសួងកសិកម្ម រុក្ខាប្រមាញ់ និងនេសាទ)***

លោក ពុំ សុថា បានឱ្យដឹងទៀតថា មានសហគ្រាសចំនួន០៨ ទទួលបាននិមិត្តសញ្ញាគុណភាពផលផលិតផលជលផលកម្ពុជា CQS ដែលក្នុងនោះនិមិត្តសញ្ញាគុណភាពផលផលិតផលជលផលកម្ពុជាពេញលេញ ចំនួន០៤ និង និមិត្តសញ្ញាគុណភាពផលផលិតផលជលផលកម្ពុជាធម្មតាចំនួន០៤។

បើតាមកញ្ញា អ៉ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម បានឱ្យដឹងថា ក្រសួងកសិកម្មបានបង្កើតវប្បធម៌សុវត្ថិភាពម្ហូបអាហារ និងបានរៀបចំបង្កើត និងដាក់អោយប្រើប្រាស់ និមិត្តសញ្ញាគុណភាពផលផលិតផលជលផលកម្ពុជា (CQS) សម្រាប់លើកទឹកចិត្ត ឱ្យវិស័យឯកជនអនុវត្ត ដើម្បីឆ្លើយតបតាមតំរូវការទីផ្សារទាំងក្នុងតំបន់និងអន្តរជាតិ។

(កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ។ រូបថតដោយ៖ ធឿន វ៉ាន់សុង)

ជាមួយគ្នានេះ និមិត្តសញ្ញាគុណភាពផលផលិតផលជលផលកម្ពុជា(CQS) ត្រូវបានដាក់ឱ្យប្រើប្រាស់ជាផ្លូវការនាពេលថ្មីៗនេះ ដើម្បីរួមចំណែកលើកកម្ពស់ ពាណិជ្ជកម្មផល ផលិតផលជលផល។ បន្ថែមពីនេះ ក្រសួងកសិកម្ម នឹងមិនបញ្ឈប់ត្រឹមនេះទេ ដោយនិមិត្តសញ្ញាគុណភាពផលផលិតផលជលផលកម្ពុជា(CQS) អាចនឹងត្រូវបានប្រើប្រាស់សម្រាប់ផលិតផលកសិកម្មផ្សេងទៀត ផ្អែកលើបទពិសោធន៍ជោគជ័យ និងកិច្ចសហការជាមួយអង្គការ UNIDO៕

ដោយ៖ ង៉ិល ណារ៉ាត់