ត្រឹមថ្ងៃទី២៥ ខែកញ្ញា កម្ពុជាផ្ទុះករណីរលាកភ្នែក៩៣ករណី ក្រោយអ្នកភូមិចូលទៅប្រទេសវៀតណាម

គិតត្រឹមថ្ងៃទី២៥ ខែកញ្ញា កម្ពុជាផ្ទុះករណីភ្នែកក្រហម៩៣ករណី ក្នុងនោះជំងឺនេះកើតមានស្ត្រីចំនួន៥៧ករណី ក្រោយអ្នកភូមិចំនួន៨នាក់ បានចូលក្នុងប្រទេសវៀតណាម ដើម្បីចូលរួមកម្មវិធីបុណ្យសពបងប្អូន ហើយត្រឡប់មកវិញក៏កើតមានជំងឺរលាកភ្នែកនេះ ឆ្លងរាលដាលដល់ពលរដ្ឋរស់នៅភូមិជាមួយគ្នា។ ខណៈជំងឺភ្នែកក្រហមនេះ កើតមាននៅភូមិសាស្ត្រ ភូមិប៉ក់តូច ឃុំប៉ក់ញ៉ៃ ស្រុកអូរយ៉ាដាវ ខេត្តរតនៈគិរី ។

នេះបើតាមសេចក្ដីប្រកាសព័ត៌មាន ស្ដីពីករណីជំងឺរលាកភ្នែកក្នុងឆ្នាំ២០២៣ របស់ក្រសួងសុខាភិបាល ដែលផ្សព្វផ្សាយនៅល្ងាចថ្ងៃទី២៦ ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្ដីប្រកាសព័ត៌មានកម្រាស់៣ទំព័ររបស់ក្រសួងសុខាភិបាល បានសរសេរពីដើមចម នៃបន្ទុះជំងឺនេះថា ករណីជំងឺភ្នែកក្រហមនេះ កើតឡើងដោយសារមានអ្នកភូមិចំនួន៨នាក់បានកើតជំងឺនេះ កំឡុងពេលទៅបុណ្យសពបងប្អូន នៅក្នុងភូមិមួយលើទឹកដីប្រទេសវៀតណាមដែលជាភូមិមានព្រំប្រទល់ជាប់នឹងភូមិប៉ក់តូច។

សេចក្ដីប្រកាសព័ត៌មានបានសរសេបន្តថា បន្ទាប់ពីត្រឡប់មកផ្ទះវិញ អ្នកភូមិទាំង៨នាក់ ក៏មានករណីឈឺភ្នែកក្រហមនេះកើតឡើងលើមនុស្សចំនួន៤នាក់នៅផ្ទះផ្សេងៗគ្នា និងបានបន្តចម្លងរាលដាលប៉ះពាល់ដល់អ្នកភូមិជាមួយរហូតដល់៧៣នាក់ នៅក្នុងចំណោមប្រជាជនសរុប ៥៩៤នាក់នៃភូមិប៉ក់តូច។

មន្ត្រីជំនាញនាយកដ្ឋានប្រយុទ្ធនឹងជំងឺឆ្លង មន្ត្រីជំនាញសុខាភិបាល បានចុះទៅពិនិត្យស្រាវជ្រាវ ផ្តល់ការព្យាបាលថែទាំអ្នកជំងឺ នឹងអប់រំភ្លាមៗ បន្ទាប់ពីទទួលបាននូវការរាយការណ៍ពីមណ្ឌលសុខភាពសោមធំនៅយប់ថ្ងៃទី២៣ ខែកញ្ញា ឆ្នាំ២០២៣៕

ដោយ៖ ង៉ិល ណារ៉ាត់