ទំហំពាណិជ្ជកម្មកម្ពុជា-ថៃ សម្រេចបាន ២,៥ពាន់លានដុល្លារ

ថៃជាប់លំដាប់ថ្នាក់លេខ៤ ក្នុងការធ្វើពាណិជ្ជកម្មជាមួយកម្ពុជា បន្ទាប់ពីចិន អាមេរិក និងវៀតណាម។ គិតត្រឹមរយៈពេល ៨ខែ ឆ្នាំ ២០២៣ ពាណិជ្ជកម្មរវាងកម្ពុជា និងថៃ សម្រេចបាន ២,៥ពាន់លានដុល្លារ ថយចុះប្រមាណជិត ២០ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ៣,២ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការនាំចេញទំនិញរបស់កម្ពុជា ទៅថៃ មានចំនួនទឹកប្រាក់ ៦៤៥លានដុល្លារ និងនាំចូលមកវិញមានចំនួន ១,៩ពាន់លានដុល្លារ។ ដោយឡែកសម្រាប់ខែ សីហា ឆ្នាំ ២០២៣ ការនាំចេញរបស់កម្ពុជា ទៅថៃ សម្រេចបានជាង ៧១លានដុល្លារ និងការនាំចូលមកវិញមានចំនួនជិត ២៥០លានដុល្លារ។

កន្លង​មកទំនិញ​ដែល​កម្ពុជា បាន​នាំ​ចេញ​ទៅ​ប្រទេស​ថៃ មាន​ដូច​ជា ផលិតផលកសិផល វត្ថុធាតុដើម វាយនភណ្ឌ និងត្បូងថ្មមានតម្លៃ ហើយបានទិញចូលវិញនូវទំនិញផលិតផលសម្រេចដូចជា ត្រី សាច់ ម្ហូបអាហារ ភេសជ្ជៈ ជីសរីរាង្គ គ្រឿងសំអាងគ្រឿងតុបតែងផ្ទះ ឧបករណ៍អេឡិចត្រូនិក រថយន្ត គ្រឿងបន្លាស់ សម្ភារៈការិយាល័យ និងសំណង់ ជាដើម​។

នៅថ្ងៃទី ២៨ ខែ កញ្ញា ឆ្នាំ ២០២៣នេះ លោក សេដ្ឋា ថាវីស៊ីន នាយករដ្ឋមន្រ្តីថៃ បានអញ្ជើញ បំពេញទស្សន​កិច្ចផ្លូវការលើកដំបូង នៅព្រះរាជាណាចក្រកម្ពុជា។

នៅក្នុងជំនួបទ្វេភាគីរវាងនាយករដ្ឋមន្រ្តីកម្ពុជា និងថៃនេះ ក្នុងគោលបំណងកំណត់ទិសដៅសកម្មភាព ដើម្បីធ្វើឱ្យកាន់​តែស៊ីជម្រៅ និងពង្រីក​បន្ថែមទៀតនូវកិច្ចសហប្រតិបត្តិការលើគ្រប់វិស័យ ដែលផ្ដល់ផល​ប្រយោជន៍ទៅវិញទៅមក ក្នុង​ក្របខ័ណ្ឌទ្វេភាគី និងពហុភាគី។

សូមបញ្ជាក់ថា ពាណិជ្ជកម្មរវាងកម្ពុជា និងប្រទេសថៃ ឆ្នាំ២០២២ សម្រេចបានប្រមាណ ៤,៦៦ពាន់លានដុល្លារ ក្នុងនោះកម្ពុជានាំទៅថៃជាង ៨៣១លាន និងនាំចូលពីថៃមានជិត ៤ពាន់លានដុល្លារ។ កម្ពុជា និងប្រទេសថៃ មានបំណងសម្រេចការធ្វើពាណិជ្ជកម្មរួមគ្នាឱ្យបាន ១៥ពាន់លានដុល្លារនៅឆ្នាំ២០២៥៕