ពី​កិច្ចប្រជុំធុរកិច្ច​អាស៊ានកម្ពុជា សភាពាណិជ្ជកម្មអឺរ៉ុបនៅកម្ពុជា និង AHK វៀតណាម​ឈាន​ទៅ​ចាប់ដៃគ្នាបង្កើនការវិនិយោគ​របស់​អាល្លឺម៉ង់​នៅកម្ពុជា

សភាពាណិជ្ជកម្មអឺរ៉ុបនៅកម្ពុជានិង AHK វៀតណាម បាន​ចុះហត្ថលេខាលើអនុស្សរណៈនៃ​ការយោគយល់​គ្នា​ក្នុងកិច្ចប្រជុំកំពូលធុរកិច្ចអាស៊ាន-កម្ពុជា នៅព្រឹក​ថ្ងៃទី ២៩ ខែកញ្ញា ខណៈ​ដែលភាគីទាំងពីរ​ប្តេជ្ញាសម្រេច​បាននូវគោល​ដៅរួមនា​ពេលអនាគត។

នៅ​ក្នុងចំណោមផ្នែកនៃកិច្ចសហប្រតិបត្តិការ ភាគីទាំងពីរ​នឹងចែករំលែកការអនុវត្តនិងចំណេះដឹងល្អៗ ដើម្បីទាក់ទាញ​ការវិនិយោគនិង​ឱកាស​ពាណិជ្ជកម្ម​កាន់តែច្រើនរវាងប្រទេសអាល្លឺម៉ង់និងកម្ពុជា។

លោក Marko Walde ប្រធានតំណាងរបស់ AHK ប្រចាំប្រទេសវៀតណាម មីយ៉ាន់ម៉ា កម្ពុជា និងឡាវ បានមាន ប្រសាសន៍ថា «យើងមានសេចក្តីសោមនស្សរីករាយក្នុងការពង្រឹងទំនាក់ទំនង​ដែល​កំពុងរីកចម្រើនរវាង AHK និង សភាពាណិជ្ជកម្មអឺរ៉ុបនៅកម្ពុជា​តាមរយៈ​អនុស្សរណៈ​នៃការយោគយល់​គ្នានេះ»។

នៅក្នុងខែឧសភា ដែនសមត្ថកិច្ចរបស់ក្រុមការងារ AHK វៀតណាម​បានពង្រីកដល់ប្រទេសមីយ៉ាន់ម៉ា កម្ពុជា និង ឡាវ ហើយ​គណៈប្រតិភូ AHK រួមទាំងប្រធាន​តំណាងលោក Marko Walde បានមកទស្សនកិច្ចការិយាល័យរបស់​សភា​ពាណិជ្ជកម្មអឺរ៉ុប​នៅកម្ពុជាក្នុងទីក្រុងភ្នំពេញ ដើម្បីពិភាក្សាអំពីទីផ្សារក្នុងប្រទេសកម្ពុជានិង​ស្វែងរកផ្នែកដែលអាចធ្វើកិច្ចសហការបាន។

លោក Martin Brisson នាយក​ប្រតិបត្តិ​​សភាពាណិជ្ជកម្មអឺរ៉ុប​ប្រចាំនៅ​កម្ពុជា​បាន​បញ្ជាក់ថា «យើងមិនអាចធ្វើសកម្មភាព​​តែម្នាក់ឯង​នៅក្នុងអាស៊ានបានទេ ហើយវាជារឿងសំខាន់​ដែលយើង​សហការជាមួយ​ប្រទេសជិតខាង​ដើម្បីជួយ​យើងឱ្យសម្រេចបាននូវគោលដៅ​​​រួមរបស់យើង»។

លោក Martin Brisson លើកឡើង​ពី​អនុស្សរណៈនៃការយោគយល់គ្នាដែលផ្តល់ផលប្រយោជន៍ទៅវិញទៅមកមួយ​នេះ នឹងអនុញ្ញាតឱ្យយើងស្វែងយល់​អំពីភាពស្មុគ្រស្មាញរបស់ទីផ្សារវៀតណាម ហើយ​សង្ឃឹមថា​នឹង​ទាក់ទាញ​អាជីវកម្មឆ្លងកាត់ព្រំដែនមកកម្ពុជា។

ក្រៅពីពាណិជ្ជកម្ម និងការវិនិយោគ អនុស្សរណៈនៃការយោគយល់គ្នានេះស្វែងរកការជំរុញកិច្ច​សហប្រតិបត្តិការ លើ​ការ​ជួយដល់ការ​អភិវឌ្ឍប្រកបដោយចីរភាពរបស់ប្រទេសកម្ពុជា ការ​បង្កើន​ជំនាញ​ដល់​កម្លាំងពលកម្មកម្ពុជានិងការផ្តល់នូវសេវាកម្មអភិវឌ្ឍន៍អាជីវកម្មដល់ក្រុមហ៊ុន៕