ការប្រើប្រាស់ថាមពលសូឡាឬថាមពលកកើតឡើងវិញកាត់បន្ថយការចំណាយជួយកំណើនសេដ្ឋកិច្ចជាតិ

ភ្នំពេញ ៖សភាពាណិជ្ជកម្មអឺរ៉ុបនៅកម្ពុជា (EuroCham) បាននិងកំពុងជំរុញឱ្យកម្ពុជា ក្លាយជាសេដ្ឋកិច្ចជាតិ “បៃតង” ដោយសារស្នើឱ្យដកចេញនូវការគិតថ្លៃអានុភាពប្រើប្រាស់ទៅលើ ថាមពលសូឡា និងអនុវត្តឱ្យបានពេញ លេញនូវការ ប្រើប្រាស់ថាមពលកកើតឡើងវិញ។

យោងតាម​ឯកសារស្ថានភាពស្តីពីថាមពលកកើតឡើងវិញនៅកម្ពុជា របស់សភាពាណិជ្ជកម្មអឺរ៉ុបនៅកម្ពុជា បានបញ្ជាក់អំពីរបៀបនៃការផ្លាស់ប្ដូរទៅរកការប្រើប្រាស់ថាមពលសូឡា ដើម្បីរួមចំណែកជួយជំរុញវិស័យសេដ្ឋកិច្ច។

លោក Tassilo Brinzer ប្រធានសភាពាណិជ្ជកម្មអឺរ៉ុបនៅកម្ពុជា បានលើកឡើថា ការអនុម័តនិងគាំទ្រពេញ លេញទៅលើការប្រើប្រាស់បន្ទះសូឡាលើដំបូលពីសំណាក់រាជរដ្ឋាភិបាល គឺជាការបោះជំហានយ៉ាងធំ​ឆ្ពោះទៅ​រកការធ្វើទំនើបកម្មមូលដ្ឋានផលិតរបស់កម្ពុជា ដើម្បីធ្វើឱ្យប្រទេសកម្ពុជា ទទួលបាននូវកេរ្តិ៍ឈ្មោះ ជាប្រទេសដែលមានបរិស្ថានបៃតង និងកាន់តែមានភាពប្រកួតប្រជែង ថែមទាំងអាចធ្វើសមាហរណកម្ម​ខ្លួនបានល្អប្រសើរ នៅក្នុងសេដ្ឋកិច្ចតំបន់។

លោក បន្ថែមដូច្នេះថា« ប្រការនេះ នឹងជំរុញកម្ពុជាឱ្យក្លាយជាទិសដៅវិនិយោគ ដោយសារតែការវិនិយោគទៅ​លើថាមពល កកើតឡើងវិញ [RE] អាចទទួលបានការគាំទ្រជាគម្រោងវិនិយោគមានគុណវុឌ្ឍនៅក្នុងច្បាប់ស្តីពី ការវិនិយោគថ្មី និងទាក់ទាញក្រុមហ៊ុនផលិតដែលមានគោលដៅថាមពលស្អាតក្នុងការបំពេញ តាមគោលដៅរបស់ខ្លួនបាន»។

លោក Massimiliano Tropeano ជំនាញការផ្នែកចីរភាពរបស់សភាពាណិជ្ជកម្មអឺរ៉ុបនៅកម្ពុជាមើលឃើញថា ប្រទេសកម្ពុជា បច្ចុប្បន្នកំពុងតែជួបប្រទះបញ្ហាប្រឈម និងជម្រើសជាច្រើនដែលអាចនឹងកាត់ បន្ថយភាគរយនៃ​ថាមពលកកើតឡើងវិញរបស់ប្រទេសយ៉ាងធ្ងន់ធ្ងរ។ គោលនយោបាយមានវឌ្ឍនភាព និងបើកចំហជាងមុនឆ្ពោះ​ទៅរកការប្រើប្រាស់ថាមពលសូឡា និងថាមពលពន្លឺព្រះអាទិត្យ អាចជួយដោះស្រាយបញ្ហានានាបាន ដូចជា តម្រូវការថាមពលអគ្គិសនី កំពុងកើនឡើង ការផលិតថាមពលអគ្គិសនីមានតម្លៃទាបជាងមុន និងការពឹងផ្អែកទៅ​លើការនាំចូលថាមពលពីបរទេស ជាដើម។

លោកលើកឡើងទៀតថា «រាជរដ្ឋាភិបាលកម្ពុជា បានចូលរួមក្នុងកិច្ចពិភាក្សាពាក់ព័ន្ធ និងសំខាន់ៗនៅជុំវិញបញ្ហា​នេះហើយ យើងសង្ឃឹមថា រាជរដ្ឋាភិបាលនឹងចាប់យកឱកាសនានា ដែលផ្ដល់ឱ្យដោយថាមពលកកើតឡើងវិញ ដែលបានកំណត់នៅក្នុងឯកសារនេះ»។

បើតាមសភាពាណិជ្ជកម្មអឺរ៉ុបនៅកម្ពុជា បានលើកឡើងអំពីទឡ្ហីករណ៍សម្រាប់ការអនុវត្តឱ្យបាន​ពេញលេញនៃ​ហេដ្ឋារចនាសម្ព័ន្ធ ថាមពលសូឡានៅក្នុងបរិវេណឧស្សាហកម្ម និងរោងចក្រនានា ព្រមទាំងបង្កើនការវិនិយោគនៅក្នុង វិស័យនេះ ដើម្បីជួយឱ្យកម្ពុជាអាចប្រកួតប្រជែងជាមួយប្រទេសវៀតណាម និងថៃបាន។

អត្ថប្រយោជន៍មួយក្នុងចំណោមអត្ថប្រយោជន៍សំខាន់ៗផ្សេងទៀត បន្ថែមពីលើការកាត់បន្ថយការបញ្ចេញកាបូន គឺជាសក្តានុពល​ក្នុងការបង្កើតវិស័យឧស្សាហកម្មថ្មីដែលធានាដល់អនាគតល្អប្រសើរនៅក្នុងថាមពលប្រកបដោយចីរភាព ដែលដឹកនាំដោយការអភិវឌ្ឍន៍បច្ចេកវិទ្យាសូឡា។ រដ្ឋាភិបាលក៏អាចសន្សំសំចៃទៅលើចំណាយប្រតិបត្តិការ និងចំណាយមូលធនពាក់ព័ន្ធនឹងថ្លៃ ចំណាយលើថាមពល តាមរយៈការជំរុញឱ្យមានទីផ្សារ​បន្ទះសូឡាលើដំបូលកាន់​តែទូលំទូលាយ៕