ស្ថានទូតជប៉ុន និងក្រសួងអប់រំ រៀបចំការប្រកួតមហោស្រពភាពយន្តកុមារអន្តរជាតិអាស៊ី ២០២៣

នៅថ្ងៃរសៀលថ្ងៃទី៩ ខែតុលា ឆ្នាំ២០២៣នេះ ស្ថានទូតជប៉ុនប្រចាំកម្ពុជា និងក្រសួងអប់រំ យុវជន និងកីឡាបានសហការគ្នារៀបចំការប្រកួតមហោស្រពភាពយន្តកុមារអន្តរជាតិអាស៊ីឆ្នាំ២០២៣ វគ្គពាក់កណ្តាលផ្តាច់ព្រ័ត្រនៅកម្ពុជាសម្រាប់សិស្សវិទ្យាល័យ ហើយក្រុមដែលឈ្នះវគ្គនេះមានឱកាសបានប្រកួតជាមួយប្រទេសជាសមាជិកអាស៊ានទាំង១០ រួមទាំងទីម័រខាងកើត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនឹងរៀបចំដោយស្ថានទូតជប៉ុន សហការជាមួយក្រសួងអប់រំនៅរសៀលថ្ងៃនេះ នៅសាលអង្គរគីហ្សូណា នៃមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC)។ ការប្រកួតវគ្គពាក់កណ្តាលផ្តាច់ព្រ័ត្រនៅក្នុងប្រទេសកម្ពុជានេះ ធ្វើឡើងក្នុងគោលបំណងជ្រើសរើងរឿងខ្លីដែលមានខ្លឹមសារល្អដាច់គេចំនួន ៣រឿង ទៅប្រកួតបន្តនៅក្នុងមហោស្រពភាពយន្តកុមារអន្តរជាតិអាស៊ី ក្នុងចំណោមសិស្សវិទ្យាល័យជប៉ុន និងប្រទេសសមាជិកអាស៊ាន រួមទាំងទីម័រខាងកើត។

ក្នុងការប្រកួតថ្ងៃនេះ នឹងមានការចូលរួមពីសិស្សវិទ្យាល័យមកពី ៨សាលា និងមានរឿងខ្លីចំនួន៣នាទីដែលមាន១៣រឿង សម្រាប់ការប្រកួតក្រោមប្រធានបទ “អ្វីដែលខ្ញុំចង់បាន (What I want)”។ គួរបញ្ជាក់ថា សិស្សចំនួន៣ក្រុម ដែលបានជាប់មានសមាជិកសរុប ៩នាក់ដែលទទួលបានជ័យលាភីក្នុងការប្រកួតនឹងត្រូវទៅប្រកួតនៅវគ្គផ្តាច់ព្រ័ត្រនៅប្រទេសជប៉ុន នាថ្ងៃទី១៦ ខែធ្នូ ឆ្នាំ២០២៣ខាងមុខ៕