កម្ពុជា-ស្វីស ប្ដេជ្ញារួមគ្នាពង្រឹងថែមទៀតកិច្ចសហប្រតិបត្តិការទ្វេភាគី និងអន្តរជាតិ

ប្រមុខការទូតកម្ពុជា និងឯកអគ្គរដ្ឋទូតស្វីសប្រចាំកម្ពុជា បានប្តេជ្ញាចិត្តរួមគ្នាពង្រឹងថែមទៀតនូវទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរ កម្ពុជា និងស្វីស ក៏ដូចជាក្នុងក្របខ័ណ្ឌអង្គការសហប្រជាជាតិ។ ការប្ដេជ្ញារវាងភាគីទាំងពីរ ធ្វើឡើងតាមរយៈជំនួបពិភាក្សាការងារ កាលពីថ្ងៃទី១០ ខែតុលា ឆ្នាំ២០២៣។

ក្នុងជំនួបនេះ លោកឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងអំណរគុណយ៉ាងជ្រាលជ្រៅចំពោះប្រទេសស្វីស ដែលបានផ្តល់ជំនួយអភិវឌ្ឍន៍ដល់កម្ពុជា ជាបន្តបន្ទាប់ ព្រមទាំងសាទរស្នាដៃដ៏អស្ចារ្យរបស់មន្ទីរពេទ្យគន្ធបុប្ផាសម្រាប់កុមារ និងស្ត្រីកម្ពុជា។

ជាការឆ្លើយតប លោក Pedro ZWAHLEN ឯកអគ្គរដ្ឋទូតស្វីសប្រចាំកម្ពុជា បានកោតសរសើរចំពោះវឌ្ឍនភាពសេដ្ឋកិច្ចរបស់កម្ពុជា ហើយលោក បានបញ្ជាក់នូវការបន្តគាំទ្រដល់ការអភិវឌ្ឍរបស់កម្ពុជាថែមទៀត។ លោកឯកអគ្គរដ្ឋទូត លើកឡើងថា ការជួយគាំទ្រនេះ ត្រូវបានផ្តល់ក្នុងក្របខ័ណ្ឌកម្មវិធីកិច្ចសហប្រតិបត្តិការនៅក្នុងតំបន់មេគង្គ ឆ្នាំ ២០២២-២០២៥។

ភាគីទាំងពីរ បានអះអាងជាថ្មីនូវការប្តេជ្ញាចិត្តក្នុងការពង្រឹងបន្ថែមទៀតនូវទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរ កម្ពុជា និងស្វីស ក៏ដូចជាក្នុងក្របខ័ណ្ឌអង្គការសហប្រជាជាតិផងដែរ៕