ខេត្តបាត់ដំបង ចាប់ផ្តើមបើកការប្រណាំងទូកព្រឹកនេះ

ចាប់ពីថ្ងៃទី ២៨ ដល់ថ្ងៃទី ២៩ ខែតុលាឆ្នាំ ២០២៣ នេះ រដ្ឋបាលខេត្តបាត់ដំបង បានរៀបចំកម្មវិធីប្រណាំង ទូកទៅតាមប្រពៃណី និងទំនៀមទម្លាប់ខ្មែរតាំងពីបុរាណកាលមក ធ្វើឡើងនៅតាមបណ្ដោយដង​ស្ទឹងសង្កែ​កណ្ដាលក្រុងបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅមុនថ្ងៃប្រារព្ធពិធីនេះដែរ គេសង្កេតឃើញថា រដ្ឋបាលខេត្តបានសម្រុកយ៉ាងមមាញឹកដើម្បីរៀបចំឆ្នេរស្ទឹង​សង្កែឲ្យមានសោភ័ណភាព​អមទៅដោយវិមានឯករាជ្យយ៉ាងស្រស់ត្រកាលព្រមទាំងមានរៀបចំភ្លើងចម្រុះពណ៌ និងស្តង់លក់ទំនិញគ្រប់ប្រភេទ។

នៅព្រឹកថ្ងៃទី ២៨ ខែតុលា នេះពិធីប្រណាំងទូកង និងទូកប្រពៃណីបានចាប់ផ្ដើមឡើងក្រោមអធិបតីភាពលោក សុខ លូអភិបាលនៃគណៈអភិបាលខេត្តបាត់ដំបងនិងលោក អ៊ុយ រី ប្រធានក្រុមប្រឹក្សាខេត្តព្រមទាំង មេបញ្ជាការកង​កម្លាំងប្រដាប់អាវុធ និងប្រធានអនុប្រធានមន្ទីរនានាជុំវិញខេត្តបានអញ្ជើញចូលរួមផងដែរ​ដោយឡែកប្រជាពលរដ្ឋ​ដែលមកពីតាមបណ្ដាលស្រុកនានាក៏បានចូលមកឈរត្រៀបត្រានៅសងខាងច្រាំងស្ទឹងសង្កែយ៉ាងច្រើនកុះករ។

យោងតាមរបាយការណ៍របស់គណៈកម្មការនៃពិធីបុណ្យអុំទូកនេះបានបញ្ជាក់ថាចំនួនទូកសម្រាប់ចូលរួមប្រណាំងដែលមកពី ខេត្តពោធិសាត់ បន្ទាយមានជ័យ ប៉ៃលិន និងខេត្តបាត់ដំបង សរុបមានចំនួន ៤៥ ទូកក្នុងនោះគឺ ទូកផ្កាចំណុះពី ៦ ទៅ ១០ នាក់មានចំនួន ៨ ទូក។ទូកខ្នាតអន្តរជាតិនារីចំណុះ ២២ នាក់មាន ២ ទូក។ទូកខ្នាតអន្តរជាតិបុរសចំណុះ ២២ នាក់មាន ៦ ទូក។ទូកខ្លីប្រពៃណីជាតិចំណុះ ២៣ នាក់មានចំនួន ២៣ ទូកក្នុងនោះមានទូកមិត្តភាពចំនួន ៣ ទូក។ទូកងវែងដែលជាទូកប្រពៃណីជាតិចំណុះចាប់ពី ៦៨ នាក់ឡើងទៅមានចំនួន ៦ ទូកដោយសរុបកីឡាករ​និងកីឡាការិនី​មានចំនួន១.៥៩៦ នាក់ក្នុងនោះកីឡាពេញសិទ្ធិមានចំនួន ១.២៧៣ នាក់ និងកីឡាបម្រុងមានចំនួន ៣២៣ នាក់។

ដោយឡែកនៅថ្ងៃទី ២៩ ខែតុលា ដែលជាថ្ងៃបញ្ចប់នៃពិធីបុណ្យអុំទូកហើយក៏ជាថ្ងៃដែលទូកទាំង​អស់ត្រូវប្រកាស​ជ័យលាភី គឺមានវត្តមានដ៏ខ្ពង់ខ្ពស់របស់សម្ដេចក្រឡាហោម ស ខេង ឧត្តមក្រុមប្រឹក្សាព្រះមហាក្សត្រនិងលោក កើត រិទ្ធ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ ដែលនឹងអញ្ជើញមកចូលរួមបិទកម្មវិធីនិងប្រគល់ពាន​រង្វាន់ដល់ទូក​ដែលទទួលបានជ័យជំនះផងដែរ៕ អត្ថបទ: សោ និយមរ័ត្ន