សម្ដេចធិបតី នឹងបំពេញទស្សនកិច្ចផ្លូវការនៅវៀតណាម ក្នុងខែធ្នូ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងទៅបំពេញទស្សនកិច្ចផ្លូវការនៅក្នុងប្រទេសវៀតណាម ក្នុងខែធ្នូ ឆ្នាំ២០២៣ខាងមុខនេះ។ ដំណឹងនៃដំណើរទស្សនកិច្ចរបស់សម្ដេចធិបតតី ត្រូវបានបង្ហាញឱ្យដឹងតាមរយៈសេចក្ដីប្រកាសព័ត៌មានរបស់ក្រសួងការបរទេសកម្ពុជា ស្ដីពីកិច្ចពិគ្រោះយោបល់យោបាយលើកទី៨ រវាងក្រសួងការបរទេសកម្ពុជា និងក្រសួងការបរទេសវៀតណាម  ដែលបានផ្សព្វផ្សាយកាលពីថ្ងៃអាទិត្យម្សិលមិញ។

ដំណើរទស្សកិច្ចរបស់សម្ដេចធិបតី ត្រូវបានជជែកពិភាក្សាដោយលោកស្រី សឿង រដ្ឋចាវី រដ្ឋលេខាធិការក្រសួងការបរទេសកម្ពុជា និងលោក ដូ ហ៊ុង វៀត អនុរដ្ឋមន្ត្រីការបរទេសវៀតណាម នៅក្នុងកិច្ចពិគ្រោះយោបល់នយោបាយលើកទី៨ ដែលរៀបចំឡើងដោយក្រសួងការបរទេសកម្ពុជា និងក្រសួងការបរទេសវៀតណាម នៅលើទឹកដីខេត្តព្រះសីហនុ ចាប់ពីថ្ងៃទី២៥ ដល់ថ្ងៃទី២៦ ខែតុលាឆ្នាំ២០២៣។

សេចក្ដីប្រកាសព័័ត៌មាន បានសរសេរថា “ភាគីទាំងពីរបានឯកភាពគ្នាយ៉ាងជិតស្និទ្ធ ដើម្បីត្រៀមលក្ខណៈរៀបចំដំណើរទស្សនកិច្ចផ្លូវការរបស់សម្ដេចមហាបវរធិបតី ហ៊ុន ម៉ាណែត អញ្ជើញទៅសាធារណរដ្ឋសង្គមនិយមវៀតណាម នៅក្នុងខែធ្នូខាងមុខឱ្យទទួលបានជោគជ័យ” ។​

សូមរំឮកបន្តិចថា កាលពីថ្ងៃទី១១ ខែតុលា ឆ្នាំ២០២៣កន្លងទៅ ក្នុងជំនួបដែលសម្ដេច ហ៊ុន ម៉ាណែត អនុញ្ញាតឱ្យឯកអគ្គរដ្ឋទូតវៀតណាមប្រចាំកម្ពុជា លោក ង្វៀន ហ៊ុយតាំង  សម្ដែងការគួរសម និងពិក្សាការងារ នៅក្នុងវិមានសន្តិភាព ទូតវៀតណាមប្រចាំកម្ពុជា បានអញ្ជើញសម្ដេចនាយករដ្ឋមន្ត្រីកម្ពុជា ធ្វើទស្សនកិច្ចផ្លូវការនៅប្រទេសវៀតណាម៕

ដោយ៖ ង៉ិល ណារ៉ាត់