ខ្លោងទ្វារទន្លេអុំនៃក្រុងអង្គរធំ កំពុងទាក់ទាញភ្ញៀវទេសចរជាតិ និងអន្តរជាតិ ដែលមកលេងអង្គរវត្ត

លោក ឈឹម សុវណ្ណដេត ប្រធានភ្នាក់ងារទេសចរណ៏ប្រចាំខ្លោងទ្វារទន្លេអុំបានឱ្យ«កម្ពុជាថ្មី»ដឹងថា ខ្លោងទ្វារខាងត្បូង ឬខ្លោងទ្វារទន្លេអុំនៃក្រុងអង្គរធំ ជាគោលដៅទេសចរណ៍មួយដ៏ទាក់ទាញសម្រាប់ភ្ញៀវទេសចរមកទស្សនា ហើយកន្លែងនេះតែងមានភាពមមាញឹកខ្លាំងនៅពេលព្រឹក។

លោក ឈឹម សុវណ្ណដេត បានលើកឡើងថា ភ្ញៀវទេសចរតែងនិយមទស្សនាខ្លោងទ្វារទន្លេអុំ ឬក្រុងអង្គរធំ បន្ទាប់ពីការទស្សនាថ្ងៃរះនៅអង្គរវត្ត។ ទីនេះ មានចំណុចពិសេសៗមួយចំនួនដូចជា ចម្លាក់ទេវតា និងយក្សនៃរឿងរ៉ាវកូរសមុទ្រទឹក កសិន្ធុទឹក និងខ្លោងទ្វារដ៏ធំស្កឹមស្កៃ។ លោក បញ្ជាក់ថា ភាគច្រើនភ្ញៀវទេសចរចំណាយពេលក្នុងការ ដើរទស្សនាខ្លោងទ្វារនេះចាប់ពី ១០ទៅ២០នាទី ហើយពេលខ្លះ ពួកគាត់ទៅទស្សនាប្រាសាទក្បែរៗនោះ ដូចជាប្រាសាទបាយក្អែក និងប្រាសាទបក្សីចាំក្រុង ក៏ដូចជាការជិះទូកកម្សាន្តនៅកសិន្ធុ នៅជ្រុងខាងលិចជាដើម។

ខ្លោងទ្វារទន្លេអុំ ក៏ជាកន្លែងទស្សនាថ្ងៃលិចដ៏ទាក់ទាញផងដែរ ក្រៅពីភ្នំបាខែងដែលនៅក្បែរនោះ។ ពន្លឺពណ៌មាសបានចាំងប៉ះលើផ្ទៃទឹកនៃកសិន្ធុអង្គរធំ ដែលជាទិដ្ឋភាពមួយដ៏ស្រស់ត្រកាលសម្រាប់ភ្ញៀវទេសចរ។

តាមការប៉ាន់ស្មានរបស់ប្រធានភ្នាក់ងារទេសចរណ៍នៅទីនោះ បច្ចុប្បន្ននេះ ក្នុងមួយថ្ងៃ មានភ្ញៀវទេសចរចូលទស្សនាខ្លោងទ្វារទន្លេអុំចន្លោះពី ១ ០០០នាក់ ទៅជាង ២ ០០០នាក់។ ដើម្បីសម្រួលដល់កិច្ចការងារនេះ លោក ឈឹម សុវណ្ណដេត បានបញ្ជាក់ថា ក្រុមការងាររបស់លោកក៏បានជួយសម្រួលការដើរទស្សនា ពិសេស សម្រួលចរាចរណ៍បង្ការកុំឱ្យមានគ្រោះថ្នាក់ជាយថាហេតុដល់ភ្ញៀវទេសចរ៕

អត្ថបទ៖ គឿន វេត