ក្រសួងអប់រំ ប្រជុំលើកគោលការណ៍បទប្បញ្ញត្តិបង្ការបាតុភូតប្រឡងទុតិយភូមិខាងមុខ

ក្រសួងអប់រំ យុវជន និងកីឡា បានរៀបចំកិច្ចប្រជុំក្រុមប្រឹក្សាវិន័យប្រឡងសញ្ញាបត្រមធ្យមសិក្សាទុតិយភូមិ ក្រោមអធិបតីភាព បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដោយមានការអញ្ជើញចូលរួមពីមន្ត្រីពាក់ព័ន្ធក្រោមឱវាទក្រសួង និងមន្ត្រីមកពីអង្គភាពប្រឆាំងអំពើពុករលួយ (ACU)។

កិច្ចប្រជុំនេះ ក្នុងគោលបំណងដើម្បីវាយតម្លៃកំណត់ហេតុ និងស្ថានទម្ងន់ទោសចំពោះករណីមិនប្រក្រតីនានាក្នុងអំឡុងពេលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៦ វិច្ឆិកា ២០២៣ នេះ ឈានទៅដាក់ចេញជាគោលការណ៍បទប្បញ្ញត្តិក្រើនរំលឹកបង្ការបាតុភូតផ្សេងៗក្នុងការប្រឡងនាពេលអនាគត។

កិច្ចប្រជុំនេះផ្ដោតពិភាក្សាសំខាន់លើការកំណត់កម្រិតទណ្ឌកម្មការដាក់ពិន័យចំពោះបេក្ខជនប្រឡង ក៏ដូចជាគណៈកម្មការមេប្រយោគ ប្រធាន អនុប្រធានមណ្ឌល គណៈកម្មការកណ្ដាល គណៈកម្មការត្រួតពិនិត្យអគារ គណៈកម្មការអនុរក្ស នៅតាមមណ្ឌលប្រឡងទូទាំងប្រទេស ដែលបានល្មើសបទប្បញ្ញត្តិ ឬអនុវត្តខុសគោលការណ៍ក្នុងអំឡុងពេលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៦ វិច្ឆិកា ២០២៣ កន្លងទៅនេះ ដើម្បីធានាឱ្យបាននូវសុក្រឹតភាពគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន៕